Inoha Alatala pade inoha bali Kristus
4
1 Ompi-ompi to laipotoweku, nemo miparahaya humawee tauna to nangaku naria Inoha to Nagaha hi hira. Naupawee, hilo ncalara olu, bona mincani inoha to naria hi hira lako hi Alataladi ba momadi. Apa nadearamo nabi to moma nakono neumba i dunia ei. 2 Iwei tandana bona mincani ane inoha ee lako Alatala ba moma: Tauna to nangaku ane Yesus Kristus narata i dunia nawali hadua manuhia, etumi tauna to naria Inoha Alatala hi hia. 3 Pade humawee tauna to moma nampangaku Yesus Kristus, etumi tauna to moma naria Inoha Alatala hi hira. Tauna eera mai naria inoha bali Kristus hi hira. Laiepemimi ane marata'i mei inoha bali Kristus, pade naria mpuumi tempo ei i dunia.4 Naupawee ana-anaku, komi ei lako hi Alatala, pade laidagimiramo nabi to moma nakono ee. Apa narohopi Inoha to naria hi komi lako inoha to naria hi tauna to nampomaihi katuwua i dunia ei. 5 Nabi to moma nakono eera mai lako i dunia ei. Etu pade to laipojaritara nantuku pampekiri tauna to i dunia moto, pade tauna to nampomaihi katuwua i dunia ei nangepera. 6 Kita ei lako Alatala. Tauna to nangincani Alatala nanturuhi napa to iuli kami, bo to moma lako hi Alatala momara nanturuhi napa to iuli kami. Etumi tanda bona tancani uma Inoha to nakono pade uma inoha to nepakahalatara.
Alatala ee puu towe
7 Ompi-ompi to laipotoweku, maita momepotowe hadua bo hadua, apa towe ee lako hi Alatala. Butu tauna to nepotowe, hia ee mai ana Alatala pade nangincani Alatala. 8 Hema to moma nepotowe, moma'i nangincani Alatala, apa Alatala ee puu towe. 9 Laipahiloi-Natamo Alatala ane laipotowe-Nata hampena laitudu-Na Ana-Na to hadudua rumai i dunia, bona Ana-Na ee mampawaita katuwua to moma maria kahuduana. 10 Eimile towe ee: Moma kita to nampotowe Alatala, naupawee Alatala to nampotoweta pade laitudu-Na Ana-Na tumai namate nampatolohita bona ra'ampuni humawee dohata.
11 Ompi-ompi to laipotoweku, ane wee pampotowe-Nata Alatala, kita mui kana momepotowe hadua bo hadua. 12 Poma naria haduaa tauna to nampahilo Alatala. Naupawee, ane momepotoweta, Alatala nohangu rara moto oa hante kita, pade towe-Na hi kita mpuu-mpuu laipoingkukata rara katuwuata.
13 Weimile pade laincanitami ane nohangu rara oata hante Alatala pade Alatala mui nohangu rara oa hante kita: Laiwaika-Natamo Alatala Inoha-Na. 14 Kami moto, laihilo mata kamimi Ana Alatala pade laikarebai kami ane Tuamata Alatala nantudu Ana-Na nawali to Pepakahalama dunia ei. 15 Hema-hema to mangaku ane Yesus eemi Ana Alatala, Alatala nohangu rara oa hante hia pade tauna ee nohangu rara moto oa hante Alatala. 16 Laincanita pade laiharumakata mpuu pampotowe-Nata Alatala.
Alatala ee puu towe. Hema-hema to naponu towe, tauna ee nohangu rara oa hante Alatala pade Alatala mui nohangu rara oa hante tauna ee. 17 Nagana mpuumi towe Alatala i rara katuwuata, etu pade mabatita mei mantingohi Kristus ane marata-'I mampabotuhi manuhia, apa natuwuta i dunia ei nahibali hante katuwu Kristus. 18 Ane mpuu-mpuu lairasaita towe Alatala, moma naria ekata. Apa towe Alatala to nagana nampakaroho rarata hampena naronto ekata. Aji, nanotomi ane tauna to naeka mantingohi eo pobotuhia, towe Alatala moma nagana i rara katuwuana. 19 Kita nepotowe, apa lodomi Alatala nampotoweta. 20 Ane hadua tauna manguli, “Laipotoweku Alatala,” naupawee laipodaana ompina, tauna ee nokalowo. Tauna to moma nampotowe ompina to laihilona, moma ami'i nakono hia ee nampotowe Alatala to moma laihilona. 21 Apa eimile to laiparentaka-Nata Alatala: Hema-hema to mampotowe Alatala, kana mampotowe ompina.