Peparahaya hi Kristus nampadagi pehori dunia
5
1 Tauna to namparahaya ane Yesus eemi Magau to Pepakahalama to laitipa Alatala, hia eemi ana Alatala. Butu tauna to nampotowe Tuama, tauna ee mui nampotowe ana-ana-Na. 2 Eimi tandana ane kita nampotowe ana-ana Alatala: Laipotoweta Alatala pade laituruhita parenta-Na. 3 Apa nanturuhi humawee parenta-Na, nahibali hante nampotowe Alatala. Parenta-Na moma nakoro ratuku, 4 apa humawee ana Alatala laibukura nampadagi humawee pehori i dunia ei. Laidagita pehori i dunia ei hante peparahayata. 5 Tauna to namala nampadagi pehori i dunia ei, wuwu tauna to namparahaya ane Yesus eemi Ana Alatala.Pohabi nangkambelai Ana Alatala
6 Yesus Kristus eemi to narata i dunia. Yohanes to Pediu nampadiu-'I hante ue, pade tempo kamate-Na i kau salib raa-Na noili. Moma-'I wuwu laidiu, naupawee namate muipi pade raa-Na noili. Inoha to Nagaha motomi to nohabi ane ee nakono, apa Inoha to Nagaha ee moma naria nokalowo.a 7 Naria tolu to nampahabiti ane nakono-'I narata i dunia ei: 8 Inoha to Nagaha, ue pade raa. To tolu ee mai nahibali pura pohabira.b 9 Pohabi manuhia laiparahayata, neparauli pohabi Alatala to neliu mpuu karohona pade kakonona. Pohabi Alatala ee mai nangkewokata nangkambelai Ana-Na. 10 Tauna to neparahaya hi Ana Alatala nantarima pade nopairara pohabi ee. Bo to moma neparahaya hi Alatala nampopokalowo Alatala, apa moma laiparahayara to laiuli Alatala nangkambelai Ana-Na. 11 Eimi pohabi ee: Laiwaika-Natamo Alatala katuwua to moma maria kahuduana, pade Ana-Na eemi mai puu katuwua ee. 12 Tauna to nantarima Ana Alatala, nantarima katuwua to moma maria kahuduana. Tauna to moma nantarima Ana Alatala, moma nantarima katuwua ee.
Katuwua to moma maria kahuduana
13 Humaweena ei laitulihiku hi komi to neparahaya hi Ana Alatala, bona mincani ane laitarimamimi katuwua to moma maria kahuduana. 14 Nabatita i tingoo Alatala, apa laiparahayata ane laitarima-Na perapiata, ane to laiperapita hi Hia to laipodota-Na. 15 Ane laincanita laitarima-Nami perapiata, laincanita mui ane laiwaika-Natamo napa to laiperapita hi Hia.
16 Ane maria komi mampahilo ompimi mobabei doha to moma mampakaronto katuwua to moma maria kahuduana, hambayani'i, bona Alatala mampawaika'i katuwua ee. Naria mui doha to mampakaronto katuwua to moma maria kahuduanac. Nangkambelai tauna to nobabei doha ewa ee, moma komi iulikaku bona mihambayani'i. 17 Humawee ingku to nadaa ee mai, doha. Naupawee naria doha to moma mampakaronto katuwua to moma maria kahuduana.
18 Laincanita ane humawee ana-ana Alatala momara nobabei oa doha. Apa Ana Alatala nampotolawaira pade Magau Heta moma namala nobabei napa-napa hi hira. 19 Laincanita ane kita ei ana-ana Alatala pade humangkulili dunia laiparenta Magau Heta. 20 Pade laincanita mui ane Ana Alatala naratami nampawaikata noto, bona Alatala to nakono tancani. Nohangu rarata hante Alatala to nakono, apa nohangu raratamo hante Ana-Na Yesus Kristus. Hiami Alatala to nakono pade katuwua to moma maria kahuduana.
21 Ana-anaku, maingahawo, nemo komi mantuku pue-pue ntanina.