3
1 Hilo, nabohe mpuu towe Tuama hi kita, hampena laikahangai-Nata ana-Na! Moma wuwu laikahangai-Na, naupawee mpuu-mpuu laipowali-Na ana-Nata. Etu pade tauna to nampomaihi katuwua i dunia ei moma laincanira hemata kakonona, apa momara nangincani Alatala. 2 Ompi-ompi to laipotoweku, nawali ana Alatalatamo. Pomata laikewoka bewa ka'adaata eo ngkapurina mei. Naupawee, laincanita ane maratadimi Kristus, kita mei mahibali hante Hia. Apa tahilo mpuumi mei lence-Na. 3 Butu tauna to nampaharumaka lauria hi Kristus, mampakagaha katuwuna ewa Kristus nagaha.4 Butu tauna to nobabei oa doha, nampaewa parenta Alatala, apa nobabei doha nahibali hante nampaewa parenta Alatala. 5 Laincanimi moto ane karata-Na i dunia ei, tumai-'I nampa'ampuni dohata. Bo Hia moto, moma naria hodia doha-Na. 6 Humawee tauna to nohangu rara hante Kristus, momaramo mobabei oa doha. Hema to nobabei oa doha, momara naria nampahilo Kristus bo nangincani-'I.
7 Ana-anaku to laipotoweku, nemo mipalele nau hema mui mampakahalatara komi. Hema nobabei to nanoro, hia tauna to nanoro, ewa Kristus nanoro. 8 Hema to nobabei oa doha, hia eemi ana Magau Heta. Apa lako pamulanami Magau Heta ee nobabei doha. Eimile pade narata-'I Ana Alatala. Rumai-'I nampakaropu bago Magau Heta.
9 Butu tauna to nawali ana Alatala, momami mobabei oa doha, habana hipa Alatala naria hi hia. Apa Alatala etumi Tuamana, etu pade moma'i mamala mobabei oa doha. 10 Eimile pontaniana ana-ana Alatala pade ana-ana Magau Heta. Hema-hema to moma nobabei to nanoro pade moma nampotowe ompina, hia ee mai moma ana Alatala.
Towe hi ompi nampopahiloi katuwua to moma maria kahuduana
11 Lako pamulana kareba ei laiparata amimi hi komi: Kana momepotoweta hadua bo hadua. 12 Nemota ewa Kain to nawali ana Magau Heta, nampatehi tuaina moto. Napa pade laipatehina tuaina? Apa humawee to laibabei Kain nadaa pade humawee to laibabei tuaina nabelo.
13 Aji, ompi-ompiku, nemo komi mahera ane tau-tauna i dunia ei mampodaa komi. 14 Laincanita ane kita ei nehuwutamo lako kamatea noencu rau i rara katuwua. Laincanita ee, habana laipotoweta ompita. Tauna to moma nepotowe, natida rara kamateadipi. 15 Tauna to nampodaa ompina nahibali hante tauna to nepatehi. Laincanimi moto ane to nepatehi moma'i nangkami katuwua to moma maria kahuduana. 16 Weimile dalana bona tancani bewa mampotowe ompita: Laipopewai-Nami Kristus inoha-Na habana kita. Wee moto mui kita, kana tapopewai inohata habana ompi-ompita. 17 Ane maria tauna to magana, mampahilo ompina maheha, naupawee moma'i madota mantulungi ompina ee, natantu amimi moma naria towe Alatala hi hia. 18 Ana-anaku, nemo aga i nguduta manguli matowe, pade moma tapoingkuka. Matoweta hante kabuloli rarata to marawa i rara ingkuta to nabelo.
Kaparahayaata i tingoo Alatala
19 Ane natoweta hi ompita, laincanitami ane kita ei mai nantuku napa to nakono, pade mamalatamo mampakanone rarata i tingoo Alatala. 20 Apa ane rara bongota manguli nahalata, nabohepi to laincani Alatala lako to laincani rara bongota, pade hangu hangaa laincani-Na. 21 Ompi-ompi to laipotoweku, ane rara bongota moma mangulikata nahala, mabatita marata hi Alatala. 22 Pade bonau napa laiperapita laiwaika-Nata, apa humawee parenta-Na laituruhita pade laibabeita to laipomambela-Na. 23 Eimile to laiparentaka-Nata; kana meparahayata hi Ana-Na, Yesus Kristus, pade momepotoweta ewa to laiparentaka-Nata Kristus. 24 Hema-hema to nanturuhi humawee parenta-Na, hira nohangu rara oa hante Alatala pade Alatala mui nohangu rara oa hante hira. Pade laincanita ane Alatala nohangu rara oa hante kita, apa laiwaika-Nata Inoha to Nagaha.