Kristus to mantulungita
2
1 Ana-anaku! Laitulihikaku komi humawee lauria bona nemo komi mobabei doha. Naupawee, ane mariata to mobabei doha, Yesus Kristus mantulungita i tingoo Tuama. Yesus Kristus ee mai to mpuu-mpuu nanoro. 2 Hiami to namate bona humawee dohata ra'ampuni. Pade moma wuwu dohata moto, naupawee doha humawee manuhia mui.3 Ane laituruhita parenta-parenta Alatala, eemi tandana ane laincanita mpuu hema Alatala. 4 Tauna to nanguli, “Laincaniku Alatala,” bo moma'i nanturuhi parenta-parenta-Na, tauna ee to pokalowo pade moma naria to nakono hi hia. 5 Naupawee, tauna to nanturuhi lolita Alatala, hia ee mai mpuu-mpuu nampotowe Alatala. Eemi tandana ane natuwuta nohangu rara hante Alatala. 6 Hema-hema to manguli hia nohangu rara hante Alatala, hia kana mantuku ingku Kristus.
Parenta to nabou
7 Ompi-ompi to laipotoweku! To laitulihiku ei moma parenta to nabou. Kakonona ei parenta to nahaemi laiepemi hinungkaimi neparahaya hi Kristus. Parenta to nahae ee mai lolita Alatala to laiepemimi. 8 Naupawee, parenta to laitulihiku ei namala mui rauli nabou. Kabouna parenta ei namala rahilo rara katuwu Kristus pade katuwumi. Apa kalimaua nopamulami naronto, pade kabaa to kakonona nopamulami newanta.
9 Tauna to nanguli ane hia natuwu i rara kabaana naupawee laipodaanadipi ompina, tauna ee natuwu i rara kalimauanadipi duu ei. 10 Tauna to nampotowe ompina, hia natuwu i rara kabaana pade moma'i naria hangkania nopanawu tauna i rara doha. 11 Bo tauna to nampodaa ompina natuwu i rara kalimaua. Hia nomako rara kalimaua pade moma laincanina rima karauana. Moma napa to lainaana habana nalimau.
12 Ana-anaku, laitulihiku hi komi,
apa laiampunimi dohami habana Kristus.
13 Tuama-tuama, laitulihiku hi komi,
apa laincanimimi Yesus, to nariami lako pamulana.
Laitulihiku hi komi to nangura,
apa laidagimimi Magau Heta.
14 Ompi-ompi, laitulihiku hi komi,
apa laincanimi Tuama.
Tuama-tuama, laitulihiku hi komi,
apa laincanimimi Yesus to naria amimi lako pamulana.
Laitulihiku hi komi to nangura,
apa naroho komi,
pade lolita Alatala naria i rarami,
pade laidagimimi Magau Heta.
15 Nemo komi mampotowe ingku to nadaa i dunia ei pade humawee to naria i dunia ei. Ane ingku to nadaa i dunia ei mipotowe, moma laipotowemi Tuama. 16 Humawee to naria i rara dunia ei: dota woto, dota mata pade kahombo, moma narata lako hi Tuama naupawee narata lako dunia. 17 Tauna to nadaa ingkura i dunia ei pade humawee dotara to nadaa nopamulami naronto. Naupawee, tauna to nanturuhi dota Alatala batena motora matuwu duu kahae-haena.
Bali Kristus
18 Ana-anaku, kahudua dunia namohumi! Laikewoka amimo komi ane marata mei bali Kristus. Tempo ei nadeamo neumba tauna to nampobali Kristus. Eemi tanda ane kahudua dunia namohumi. 19 Bali Kristus eera mai ilodora doheta naupawee tempo ei nehuwuramo nampalahita, apa momara mpuu-mpuu namparahaya napa to laiparahayata. Ane ke mpuu-mpuura neparahaya, tantu tapodohe moto oara. Naupawee, nehuwura bona manotomi ane momara hema haduaa to mpuu-mpuu doheta.
20 Naupawee laitarimamimi Inoha to Nagaha lako Yesus Kristus. Etu pade humaweemi nangincani patudu to nakono. 21 Laitulihiku hi komi, moma habana komi moma nangincani patudu to nakono. Naupawee laitulihiku ei apa laincanimi amimi. Pade komi nangincani mui ane moma naria kalowo i rara patudu to nakono ee.
22 Butu tauna to nanguli ane Yesus moma-'I Magau to Pepakahalama to laitipa Alatala, hia ee to pokalowo. Tauna eemi mai bali Kristus, apa moma laipangakuna Tuama pade Ana-Na. 23 Tauna to nampehapuka Ana-Na, moma'i nantarima Tuama. Hema to nampangaku Ana-Na, nantarima Tuama mui.
24 Bo komi, Kareba Belo to laiepemi lako pamulana, kana mipairara mpuu. Ane to laiepemi lako pamulana etu mipairara mpuu, nantantu amimi komi mohangu rara moto oa hante Ana pade Tuama. 25 Laumi ria to laitipa Kristus hi kita, etumi katuwua to moma maria kahuduana.
26 Humawee to laitulihikaku komi ei, nangkambelai tauna to nampehimukui mampahalatara peparahayami. 27 Komi moto, nemopa komi mei rapatudura to ntanina, apa laitarimamimi Inoha to Nagaha lako Kristus. Apa Inoha to Nagaha ee moto nopatudu komi nangkambelai hangu hangaa. Pade napa to laipatuduka-Na komi nakono, moma kalowo. Etumo, kana mohangu rara oa komi hante Kristus ewa to laipatuduka-Na komi Inoha to Nagaha.
Ana-ana Alatala