Hura Yohanes to Pamulana
Pohabi rasul nangkambelai Lolita to nepakatuwu
1
1 Ihi hura ei nangkambelai Hia to laiuli Lolita to nepakatuwu. Eemile Lolita to naria lako pamulana, to laiepe kami, to laihilo mata kami, to laihabiti kami pade to laitui mpale kami. 2 To nepakatuwu ee naratami i dunia pade laihilo kamimi. Etu pade kami nampotutura bo nangkarebaika komi nangkambelai katuwua to moma maria kahuduana to naria hingkani-ngkani hante Tuama, pade Hia natuwu i dunia hante kami. 3 Hangkanipi ku'uli, Hia to laihilo kami pade to laiepe kami, Hiami to laikarebai kami hi komi, bona kipodohe komi matuwu hingkani-ngkani hante Tuama pade Ana-Na Yesus Kristus. 4 Laitulihi kami humaweena ei bona mpuu-mpuu magoe rarata.Alatala eemi mai kabaa
5 Eimile kareba to laiepe kami lako hi Yesus pade laiparata kami hi komi: Alatala eemi mai kabaa, pade hi Hia moma naria hodia to nalimau. 6 Ane ta'uli natuwuta hingkani-ngkani hante Alatala, bo natuwuta i rara kalimaua, nokalowota pade moma nakono ingkuta. 7 Naupawee ane matuwuta i rara kabaana ewa Hia i rara kabaa, matuwutamo mohangu rara hante to ntanina, pade raa Yesus Ana-Na mampakagahata lako humawee doha.
8 Ane ta'uli moma naria dohata, etu mai namparune wotota moto pade moma naria to nakono hi kita. 9 Ane tapangaku doha-dohata hi Alatala, Na'ampunimi humawee dohata pade Napakagahatamo lako humawee ingkuta to nadaa, apa Alatala ee mai nampakadupa oa napa to laitipa-Na pade nobabei oa napa to nanoro. 10 Ane ta'uli momata naria nobabei doha, ee nahibali hante laipopokalowota Alatala, pade lolita-Na moma laipairarata.