To poewu to nabelo
10
1 “Mpuu-mpuu Ku'ulika komi, hema to mehua i pompo bimba pade moma'i mantara womo naupawee mengkahe waladi, hia ee mai to pangio bo to perampaki. 2 Naupawee, hia to mehua mantara womo pompo ee, hia ee mai to poewu bimba. 3 To nampodoo pompo mobeaka to poewu ee womo pompo. Bimba eera mai mangepe pojarita to poewura. Nakio hangara hamaa bo hamaa pade nakenira mehuwu lako pompo ee. 4 Ane napopehuwuradamo to poewu ee humawee bimbana, momakomi mampoilodokara pade bimbana eera mantuku'i apa laincanira pojaritana. 5 Moma amira madota mantuku tau ntanina. Metibora lako hi tauna ee apa moma laincanira pojaritana.”6 Yesus nampotutura porapa lauria hi hira, naupawee moma'i laipahara napa batuana to laiuli-Na.
7 Iuli-Na mui Yesus, “Mpuu-mpuu Ku'ulika komi, Akumile womo to rapehuaira bimba ee. 8 Humawee tauna to narata kapoma-Ku narata, hira ee mai to pangio bo to perampaki. Pade bimba-bimba ee momara ne'epe hi hira. 9 Akumile womo. Hema to mehua mantara hi Aku, hia mei rapakahalama pade mamala'i mehua ba mehuwu mamparata pangkoni. 10 To pangio narata muntu mangio, mepatehi bo mepakahilaka. Aku narata bona raratara katuwua to nelabi kabelona pade to moma'i naria kakuraana.
11 Akumile to poewu to nabelo, to nahadia mamate bona mahalamara bimba-Ku. 12 To poewu to laigaji, moma'i to poewu mpuu pade moma'i koro tumpu bimba. Ane marata serigala, malai'imi pade napalahiramo bimbana ee. Alaana serigala ee mampadapa hokora bimba ee hampena magarora. 13 Malai'i apa to laigaji moto'i pade bimba ee momara laipotowena.
14 Akumile to poewu to nabelo pade laincani-Ku bimba-bimba-Ku. Bimba-bimba-Ku mui nangincani-'A, 15 nahibali hante Tuama-Ku nangincani-'A pade Aku nangincani Tuama-Ku. Nahadia-'A mamate bona mahalamara bimba-Ku. 16 Naupawee, naria muira bimba-Ku to ntanina to momara i pompo ei. Bimba eera kana Kuewu mui pade raepera pojarita-Ku. Kahuduana mei humawee bimba-Ku ee mawali hangu kahiromua pade hadua-Ku aga to mawali to poewu. 17 Laipotowe-Na-'A Tuama-Ku apa nahadia-'A mamate bona mahalamara bimba-Ku. Naupawee matuwu nculi moto-'A mei. 18 Moma hema haduaa to mamala mampatehi-'A, naupawee Aku mampopewai woto-Ku rapatehi mantuku dota-Ku moto. Nabaraka-'A mampopewai woto-Ku rapatehi pade nabaraka mui-'A matuwu nculi. Apa eimi parenta to laitarima-Ku lako hi Tuama-Ku.”
19 Lauparia nonebiliramo to Yahudi nangepe to iuli Yesus lauria. Nadeara nanguli, 20 “Tauna ee rau laipehua heta pade nagila. Napa pade nadota komi nangepe to iuli-Na?”
21 To ntanina nanguli, “To laipehua heta moma iwee pojaritana. Mamalakona heta mampopenaa to naburo?”
Yesus moma-'I laitarimara to Yahudi
22 Tempo ee, tau-tauna nobabei huha eo bohe Pampalinga Pampehua Hou Alatala i Yerusalem. Huha eo bohe ee nambela tempo eo lengi. 23 Yesus nomako-mako i pengkanaolua i Hou Alatala to laikahangai Gandaria Salomo. 24 Lauparia narataramo to Yahudi nahiromu nampatikuhi Yesus pade nangulika-'I, “Hangkuapi kahaena Mupalele kami mokarara? Ane mpuu-mpuu-Ko Magau to Pepakahalama to laitipa Alatala, ulikamo kami.”
25 Nehono Yesus, “Iulika-Ku amimo komi, naupawee moma'i parahayami. Humawee bago to laipobago-Ku laibabei-Ku hante baraka Tuama-Ku. Eemi habi nangkambelai Aku. 26 Moma-'A laiparahayami apa moma komi bimba-Ku. 27 Bimba-bimba-Ku nangincani pojarita-Ku. Aku mui nangincanira pade laitukura-'A. 28 Laiwaika-Ku muira bimba-Ku ee katuwua to moma maria kahuduana, pade momara mamate duu kahae-haena. Moma hema tauna to mamala mamparampakira bimba ee lako rara mpale-Ku. 29 Tuama-Ku to nampopewaira bimba ee hi Aku. Hiami to nelabi kabaraka-Na lako humaweena pade moma hema to mamala mamparampaki bimba-bimba ee lako rara mpale Tuama-Ku. 30 Aku pade Tuama-Ku nohangu rara.”
31 Nangepe to laiuli Yesus lauria, laitimara muimi to pangkeni to Yahudi watu mingki mampawunu Yesus. 32 Naupawee Yesus nangulikara, “Nadeami bago to nabelo to laiwaika-Na-'A Tuama-Ku laipopahiloi-Ku hi komi. Lako humawee bago ee, uma bago to mahipato miwunuka-'A?”
33 Nehonora to pangkeni to Yahudi ee, “Moma bago-Mu to nabelo etu kiwunuka-Ko naupawee pampopore-Mu Alatala pade panguli-Mu ane Ikomi Alatala, bo manuhia biaha motoda-Ko.”
34 Iulika-Na muira Yesus, “Rara atura agamami naria laitulihi lolita Alatala iwei, ‘Aku nanguli, komi etu ewa Alatala.’ 35 Ncanita hingkani ane to laitulihi rara Buku to Nagaha, moma'i mamala rabaliki. Aji, ane tauna to nantarima lolita Alatala ee laiuli-Na ewa Alatala, 36 napa pade iulimi nampopore Alatala-'A ane Ku'uli Ana Alatala-'A? Bo Aku ei laipelihi Tuama-Ku pade laihuro-Na rumai i dunia. 37 Ane moma bago to laiparahayaka-Na-'A Tuama-Ku Kupobago, nemo-'A miparahaya. 38 Naupawee apa bago to laiparahayaka-Na-'A Tuama-Ku to laipobago-Ku, parahayami napa to laipobago-Ku, naupa moma komi neparahaya hi Aku. Ane wee, mincanimi pade mipahami ane Aku nohangu rara hante Tuama-Ku pade Tuama-Ku nohangu rara hante Aku.”
39 Nangepe lauria, pehimukuikira mui mampahoko Yesus, naupawee natepetibo moto-'I.