Yesus rau i Yerusalem i eo bohe Bamaru Tawe
7
1 Napu ee mai Yesus nomako nantungkai ngata-ngata i Galilea. Moma-'I nadota rau i Yudea, apa i ria hira to pangkeni to Yahudi nampehimukui mampatehi-'I. 2 Tempo ee mai parami eo bohe Bamaru Tawe to Yahudi.a 3 Lauparia, tuai-tuai Yesus nangulika-'I, “Peongkomo-Ko lako hei rau i Yudea, bona rahilora muihawo to pantuku-Mu humawee to nepakahera to laibabei-Mu. 4 Habana moma naria tauna nobabei hangu hangaa i kaleruana, ane mingki'i tau ntanina mangincani napa to laibabeina. Ane Mubabei to nepakahera ewa etu mai, pahiloimi woto-Mu hi humawee tauna.” 5 Tuai-tuai-Na nanguli ewa ee, apa hira moto moma-'I laiparahayara.6 Nehono Yesus hi hira, “Poma narata tempo-Ku. Ane komi naria moto oa logami rau Yerusalem. 7 Manuhia i dunia ei mai momara namala nampodaa komi, naupawee Aku laipodaara, habana laiulika-Kura ane ingkura nadaa. 8 Koimo komi i pohuhaa eo bohe etu. Poma-'A rau Aku, apa poma narata tempo-Ku.” 9 Weemi to iulika-Nara, pade natida i Galilea moto-'I.
10 Naupawee raurapa tuai-tuai-Na i pohuhaa ee mai, rau bongo muimihawo Yesus i hee. 11 I pohuhaa ee mai, hira to pangkeni to Yahudi nampali Yesus pade nepekune, “I rima-'I?” 12 Pade nadea tauna nonetewai nangkambelai Yesus. Nariara to nanguli, “Hia ee rau Tauna to nabelo.” Naria muira to nanguli, “Moma. Hia ee rau Tauna to nopahalatara todea.” 13 Naupawee moma hema nabia nojarita nahimuku nangkambelai Yesus, apa naekara hi hira to pangkeni to Yahudi.
Panguli Yesus nangkambelai woto-Na moto
14 Kalentongoha huha ee mai, Yesus nehua i karawaa Hou Alatala pade nopatudu i ria. 15 Nangepe popatudu Yesus, hira to pangkeni to Yahudi nahera pade iulira, “Bewa Tauna ei nangincani humaweena bo moma naria to nampatudukii-'I?”
16 Nehono Yesus hi hira, “Popatudu-Ku moma narata lako hi Aku moto, naupawee lako Alatala to nampahuro-'A. 17 Hema to madota mobabei dota Alatala, nancani moto mei ba lako Alataladi popatudu-Ku ei, ba lako woto-Ku motodi. 18 Hema to nopatudu nantuku pekirina moto, hia ee mai mingki rabila. Naupawee hema to mampehimukui bona to nampahuro'i rabila, hia ee mai to nanoro, moma'i to pebagiu. 19 Laiwaikanamo komi Musa patudu Taurat. Naupawee moma komi hema haduaa to nampoingkuka patudu Taurat ee mai. Napa pade laipehimukuimi mampatehi-'A?”
20 Todea ee mai nampahonoi-'I, “Iko ei laipehua heta. Hema to nampehimukui mampatehi-Ko?”
21 Nehono Yesus hi hira, “Hangaadipi to nepakaherab laibabei-Ku tempo eo Pentuua to Yahudi, nakonce puramo komi. 22 Musa nampawaika komi ada popatini. Kakonona ada popatini ee mai, moma Musa to nobabei, naupawee popatini ee mai ada tumpulokota amimi. Pade komi moto mui nopatini ngana naupa nambela eo Pentuua to Yahudi. 23 Aji, ane komi nopatini tauna tempo eo Pentuua to Yahudi bona nemo mantiboki patudu Taurat to laitulihi Musa, napa pade nahodo komi hi Aku habana laipakauri-Ku hadua tauna tempo eo Pentuua to Yahudi? 24 Nemo mampahalai tauna mantuku napa to laihilomi moto. Naupawee halaimi tauna mantuku napa to nakono.”
Pomebili todea nangkambelai hema-'I Yesus
25 Bahangkua dua tauna to Yerusalem nanguli, “Apa moma Hia eimi to mingki rapatehira? 26 Naupawee hilo motomi, moma-'I nakoroa nojarita i tingoo todea pade moma hema to nampabili napa to iuli-Na. Ba laincaniramidi to pangkenita ane Hia ee mai Magau to Pepakahalama to laitipa Alatala? 27 Naupawee Hia ei mai laincanita lako rima-'I narata. Bo ane Magau to Pepakahalama marata, moma hema haduaa to mangincani lako rima-'I marata.”
28 Tempo Yesus nopatudu i karawaa Hou Alatala, laipahimuku-Na nanguli iwei, “Laincanimi-'A pade laincanimi mui lako rima-'A. Naupawee Aku narata moma nantuku dota-Ku moto. Narata-'A nantuku dota to nampahuro-'A. Hiami to mamala raparahaya. Naupawee moma-'I laincanimi. 29 Ane Aku, laincani-Ku-'I, habana Aku narata lako hi Hia, pade Hiami to nampahuro-'A.”
30 Nangepe to iuli Yesus lauria, bahangkua dua tauna to naria i hee nampehimukui mampahoko Yesus, naupawee moma naria haduaa to namala nampahoko-'I apa poma narata tempona to laipakatantu Alatala. 31 Naupawee, lako hi hira todea ee mai, nadeara to neparahaya hi Yesus, iulira, “Ane marata-'I mei Magau to Pepakahalama to laitipa Alatala, mamala-'I mei mobabei tanda to nepakahera to meliu lako to laibabei Tauna ei mai?”
32 Bahangkua dua to Farisi nangepe todea nonetewai nanguli humawee lauria nangkambelai Yesus, etu pade imam-imam to i matana pade hira to Farisi nantudura to nampodoo Hou Alatala mampahoko Yesus.
33 Lauparia Yesus nanguli, “Moma-'Amo mahae mipodohe, mapu ei rau-'Amo hi Hia to nampahuro-'A. 34 Mipali-'A mei, naupawee moma-'A mihuma, habana moma komi mamala marata i rima karaua-Ku.”
35 Nangepe to iuli Yesus lauria, hira to pangkeni to Yahudi noneulika hore hira, “Rimahawo mei karaua-Na, hampena moma-'I tahuma? Ba rau-'I hi to Yahudi to natida i ngatara to moma Yahudi, bona i ria-'I mopatudura to moma Yahudi? 36 Napahawo batua jarita-Na to nanguli iwei, ‘Mipali-'A mei naupawee moma-'A mihuma, pade moma komi mamala marata i rima karaua-Ku’?”
Ue to nampawai katuwua
37 Pade i eo kahuduana pohuhaa ee mai, nokangkoremi Yesus pade laipahimuku-Na nanguli iwei, “Hema to nabai wuuna, karatami hi Aku bona manginu'i! 38 Hema to meparahaya hi Aku, lako rara tauna ee mei moili ue to mampawai katuwua, ewa to laitulihi rara Buku to Nagaha.” 39 To laipatuju-Na nanguli lauria nangkambelai Inoha to Nagaha to ratarimara mei tauna to neparahaya hi Hia. Inoha to Nagaha ee mai poma'i narata, apa Yesus poma-'I laiongko rau huruga bo laipemabohe Alatala.
40 Bahangkua dua lako todea ee mai, to nangepe to laiuli Yesus, nanguli, “Mpuu-mpuu Hia eimi nabi to laipopeata.” 41 To ntanina nanguli, “Hia ei mai Magau to Pepakahalama to laitipa Alatala.” Naupawee to ntanina mui nanguli, “Moma. Magau to Pepakahalama to laitipa Alatala moma-'I marata lako Galilea! 42 Apa Buku to Nagaha nanguli ane Magau to Pepakahalama to laitipa Alatala marata lako muli Magau Daud, lako ngata Betlehem, katidaa Magau Daud owi.” 43 Lauparia neumbami pomebilira todea ee mai habana Yesus. 44 Bahangkua dua lako todea ee mai mingki mampahoko Yesus, naupawee moma hema haduaa to namala nampahoko-'I.
Nikodemus nampotunui Yesus
45 Napu ee hira to nampodoo Hou Alatala ee mai rau hi imam-imam to i matana pade hi hira to Farisi to nantudura. Karatara i ria, imam-imam to i matana pade hira to Farisi nampekunera, “Napa pade moma-'I laikenimi tumai?”
46 Nehonora to nampodoo Hou Alatala ee mai, “Poma naria manuhia nanguli ewa to laiuli Tauna ee ria!”
47 Hira to Farisi ee mai nangulikara, “Hante komi muikowo laipahalatara-Na? 48 Hilo, poma naria haduaa lako to pangkenita ba to Farisi neparahaya hi Hia. 49 Wuwu todea aga to neparahaya hi Hia, apa moma incanira patudu Taurat. Nahukura mei Alatala!”
50 Hadua lako hira to Farisi to ikahangai Nikodemus, to naria'i hangkani narata hi Yesus, nangulikara, 51 “Ane mantuku patudu Taurat, moma mamala hadua tauna rahuku, ane poma'i raepe pade poma'i rancani napa to laibabeina.”
52 Iulira dohena, “Ewa to Galilea muikokowo. Baha belo Buku to Nagaha bona muncani ane moma naria nabi to narata lako Galilea.”
Bangkele to nogau hala