Patudu Yesus nangkambelai doha pade peparahaya
17
1 Yesus nangulikara ana guru-Na, “Natantu ami kana maria to mampakanawu tau ntanina i rara doha, naupawee mahilakami tauna to nobabei lauria. 2 Aginalaupi tambolo tauna ee rapantoeni watu pogilia to nabohe pade ralimpa'i i rara tahi. Aginapi iwee bona nemo'i mampakanawu i rara doha hadua lako to moma naria bununa ei. 3 Etumo, maingahawo!Ane ompimu mobabei doha, palingai'i. Ane mancoro'i, ampuni'i. 4 Ane rarana haeo pitu ngkani'i mobabei doha hi iko, pade pitu ngkani mui'i marata mangulikako, ‘Nancoro'amo,’ kana muampuni'i.”
5 Napu ee, ana-ana guru-Na nangulika-'I, “Pue, pakarohoki peparahaya kami.”
6 Nehono Pue, “Ane peparahayami ewa kabohe beha sesawi aga, mamala komi mampabahai kau bohe ei, ‘Katewukamoko, pade matetuda i rara tahi!’ Kau ee mai kana manturuhi komi.”
Ingku batua to nakono
7 “Rapana maria hadua lako hi komi to naria batuana nopajeko ba nampaewu ewuana. Panculina batuana ee lako pobagoana, tauna ee mei moma mangulika batuana ee iwei, ‘Maitamo, pangkonimo.’ 8 Naupawee naulika'i mei, iwei, ‘Pahadiaka'a olu pangkoniku, kahadiako pade mupodoo'a duuku mahudu mangkoni bo manginu. Napu ee pade mamaladako mangkoni bo manginu.’ 9 Moma'i miuli nadea belona hi batua ee ane naturuhi napa to ibahaika'i. 10 Wee moto mui komi, ane manturuhi humawee to laibahaika komi, kana miuli, ‘Kami ei mai batua biaha to moma mahipato raune, apa kami nobabei napa to mahipato kibabei aga.’ ”
Hampulu dua to nohaki kusta
11 Rara pomakoa-Na rau Yerusalem, Yesus nantara i katoa Samaria pade Galilea. 12 Pehua-Na i hangu ngata, hampulu dua to nohaki kusta rau mampotomuka-'I. Nokangkorera i ka'awaana 13 pade nongare, “Yesus, Guru! Potowe kamikawo!”
14 Yesus nampanaara pade iuli-Na, “Koimo komi, pahiloimi wotomi hi imam-imam.”
Rancara nomako, ngkali naurimi hakira. 15 Hadua lako hi hira hangka laihilona naurimi hakina, nanculiki'i rau hi Yesus pade pahimukuna nampaune Alatala. 16 Karatana hi Yesus, notingkodu'i i tingoo-Na pade nanguli nadea belona. Tauna ee mai, to Samaria.
17 Napu ee iuli-Na Yesus, “Hampulu duara he to laipakauri. Rau rimara to hahio dua? 18 Bewa pade to moma Yahudi eidimi to nanculi nampaune Alatala?” 19 Napu ee Yesus nangulika tauna ee, “Pokangkoremoko, pade koimoko. Nauriko habana neparahayako hi Aku.”
Tempo Alatala marata moparenta i dunia
20 Bahangkua dua to Farisi nepekune hi Yesus, “Bulauma Alatala marata moparenta halaku Magau i dunia?”
Nehono Yesus, “Poparentaa Alatala moma'i Napamula hante tanda to mamala rahilo. 21 Moma mui hema haduaa tauna to mamala manguli, ‘Hilo, ei'i!’ ba, ‘I ria'i!’ Apa kakonona nopamulami Alatala noparenta i lentongomi.”
22 Napu ee Yesus nangulikara ana guru-Na, “Maria mei tempona mingki mihilo haeo lako eo-eo Ana Manuhia, naupawee moma'i mamala mihilo. 23 Pade maria mei tauna mangulika komi, ‘Hilo, i ria-'I!’ ba, ‘Ei-'I!’ Naupawee, nemo miparahaya to iulira pade nemora mituku rau mampahilo napa to iulira. 24 Apa nahibali hante kila nabaa pade newanta lako wuntu langi to hamika rau wuntu langi to hamikana, wee moto mui mei karata nculi Ana Manuhia marawa mihilo. 25 Naupawee kapomana humawee lauria madupa, Hia kana mangkolo madea kahehaa pade raporaura to natuwu tempo ei.
26 Bewa ingku manuhia tempo katuwua Nuh, wee moto mui ingku manuhia ane marata nculipi Ana Manuhia. 27 Humawee manuhia nangkoni bo nanginu, noncamoko bo laipoponcamoko, duuna Nuh nehua rara kapala tahi. Napu ee, narata ue mowo to nampakatala dunia nampakaropu humawee manuhia. 28 Wee moto mui ingku manuhia i ngata Sodom tempo katuwua Lot. Hira nangkoni bo nanginu, neoli bo nobalu, notuda bo nopatuna hou. 29 Naupawee, pehuwuna Lot lako ngata Sodom, apu pade watu to norea ngkali narona ewa uda lako langi nampakaropu humawee manuhia. 30 Wee moto mui ingku manuhia ane marata nculipi mei Ana Manuhia.
31 Tempo ee mai, tauna to bulara i lolo houra pade rewa-rewara naria i rara hou, nemora mehompo mangala rewa-rewara ee mai. Wee mui to bulara i pampa, weturamo manculi i hou. 32 Linga napa to nadupa hi bangkele Lot!a 33 Hema-hema to nampehimukui mampakahalama tuwuna, kana makarontoa tuwuna. Pade hema-hema to makarontoa tuwuna habana nantuku Alatala, hia kana mahalama. 34 Ku'ulika komi, ane ngkawengia maria rodua tauna moturu i hangu poturua, hadua rakeni pade to hadua rapalahi. 35 Ane maria rodua bangkele nodohe nogili pae, hadua rakeni pade to hadua rapalahi. [ 36 Ane maria rodua tauna i pampa, hadua rakeni pade to hadua rapalahi.”]
37 Napu ee ana-ana guru-Na nepekune hi Yesus, “Pue, i rima mei to ewa etu madupa?”
Nehono Yesus, “I rima maria binata mamate, i hee mui tonci kaloaa nopahintobu nantilo.”b