Yesus nampopalai anudaa lako hadua tauna to Gerasa
5
1 Narataramo Yesus hante ana-ana guru-Na i dipo Rano Galilea i ngatara to Gerasa. 2 Pehompo Yesus lako duanga, narata hadua balailo to laipehua anudaa lako podayoa nampotomu-'I. 3 Tauna ee mai no'oha i podayoa pade momami hema to namala nampahilu'i, nau hante rante muipi. 4 Apa naharomi paana laibalangku hante ahe pade palena laihilu hante rante, naupawee lairentana moto oa rante ee mai hampe naputu pade ahe to laipobalangku paana laipuina. Etu pade momami hema to nelabi karohona nampahoko'i. 5 Butu eona bo bengina'i jala-jalana i podayoa, pade ngare-ngarena i buluna pade nantimolu wotona hante watu.6 Hangka tauna ee mai nampahilo Yesus lako ka'awana, nokumenomi rau nampotomu-'I pade notingkodu i tingoo-Na nampasombaa-'I. 7 Pade narimboho mpuu pongarena, iulina, “Yesus, Ana Alatala to i Lolona, napa uruhia-Mu hante aku? Kuperapi hi Iko i rara hanga Alatala, nemo'akuwo Mupakaheha!” 8 Laiulina ewa ee mai apa kapomana ee Yesus nangulika'i, “Anudaa, palaiko lako tauna ei!”
9 Nepekunemi Yesus hi hia, “Hema hangamu?”
Honoina-'I, “Hangaku Legiona, apa nadea kami.” 10 Lauparia perapina mpuu hi Yesus bona nemora rapopalai lako Gerasa.
11 Moma na'awa lako hee, nadea mpuu wawu bulara nampali pangkoni i wiwi bulu. 12 Nerapiramo anudaa ee mai hi Yesus, “Tudumo kami rau mehua hi wawu-wawu ee mai. Palelemo kami mampehuaira!” 13 Laituruhi-Nami Yesus perapiara. Rauramo anudaa ee mai nampehuai wawu to kadeana maria roncobu maa. Alaana wawu-wawu ee mai nokumeno nengkanawu lako bingkena rau rara rano, hampena namate naonga hangkanira.
14 Hangka laihilora to nampodoo wawu ee napa to nadupa, nokumenora rau nangkewo to nadupa lauria hi tau-tauna i ngatara pade tongki-tongki ngatara, pade humawee tauna rau nampahilo napa to nadupa ee mai. 15 Karatara hi Yesus, laihilora tauna to laipehua anudaa ee mai noncunami, nowarumi pade nanotomi. Nampahilo lauria namangka pade naeka purara. 16 Tau-tauna to nampahilo mata napa to nadupa, nangkewokara tauna to lako narata. Hira nangkewo napa to nadupa hi tauna to laipehua anudaa ee pade to nadupa hi wawu-wawu ee mai. 17 Pangepera to nadupa lauria, todea ee mai namperapi hante mpuu-mpuu hi Yesus bona Napalahimi ngatara.
18 Tempo Yesus nengkahe nculi i duanga, tauna to laipehua anudaa ee hee nerapi hi Yesus bona rapaliu'ihawo mantuku Yesus.
19 Naupawee Yesus moma nampaliu'i. Yesus nangulika tauna ee mai, “Panculimoko rau houmu. Kewokaramo humawee tauna to i ngatamu, hangu hangaa to laibabei Pue hi iko, pade bewa ahi rara-Na hi iko.”
20 Lauparia, nanculimi tauna ee mai pade neongkomi rau Dekapolis.b Laikewokanaramo humawee tauna i Dekapolis napa to laibabei Yesus hi hia. Humawee tauna to nangepe'i nahera.
Yesus nampakatuwu nculi ana Yairus pade nampakauri hadua bangkele to nohaki noraa
21 Naliu ee, Yesus hante ana-ana guru-Na nedipo nculiramo hante duanga rau i dipo Rano Galilea. Nadea tauna narata nahiromu i humpii Yesus. Bula Yesus i wiwi rano, 22 narata hadua to pangkeni i hou pepuea, hangana Yairus. Pangkahilona Yesus, notingkodu'i i paa Yesus, 23 pade nerapi hi Yesus hante rara mpuuna, iulina, “Anaku bangkele nadua ntomo, hangu-hangudimi inohana. Rauta olu i houku pade Muboli pale-Mu i wotona, bona maurimi hakina pade matuwu moto'i.” 24 Lauparia neongkomi Yesus nantuku Yairus. Nadea tauna nantuku Yesus pade nonegompa-gompara nomako i humpii Yesus.
25 Dohera todea ee mai naria hadua bangkele to hampulu rompaemi naharo noraa. 26 Napepa mpuu iepena, napu humawee gaguna laipobayarina hando bona mauri'i, naupawee moma naria pobaliana, aga natetambaiki kapepa iepena. 27 Nariami laiepena kareba nangkambelai Yesus, etu pade nekarincolo i lentongo todea'i pade rau i talikua Yesus, nampatui wuntu waru Yesus, 28 apa laipekirina, “Ane kutuidimi wuntu waru-Na, mauri'amo.” 29 Hangka laituina wuntu waru Yesus, ngkali nentuumi poraana. Pade lairasaina rara wotona naurimi hakina.
30 Laincani-Na Yesus ane naria roho-Na nehuwu lako woto-Na. Laigolina woto-Na nampeilira todea ee mai, pade pekune-Nara, “Hema to nantui waru-Ku?”
31 Ana-ana guru-Na nangulika-'I, “Laihilo-Mu moto nadeadimi tauna nahiromu nonegompa-gompa i humpii-Mu ei mai, nepekune muidapa-Ko hema to nampatui-Ko.”
32 Lauparia Yesus nampeili humangkulili-Na nampali tauna to nampatui waru-Na. 33 Bangkele ee mai nawali naeka pade nokaridi purami apa laincanina to nadupa i wotona. Lauparia notingkodu'imi i tingoo Yesus pade kewonami hi Yesus ane hia to nampatui waru Yesus hampena naurimi hakina.
34 Nangepe lauria, Yesus nangulika bangkele ee mai, “To tina, peparahayamu hi Aku nampakauriko. Panculimoko hante goe raramu apa naurimi hakimu.”
35 Bula Yesus nojaritadipi hi bangkele ee mai, narataramo tauna lako hou Yairus, nangulika Yairus iwei, “Anamu namatemi. Nemopi mupakaheha guru.”
36 Laiepe-Na Yesus napa to iulira ee mai, naupawee iulika-Na Yairus, “Nemoko maeka, parahaya-'Amo.”
37 Namohurapa i hou Yairus, Yesus nantagi tau ntanina mantuku-'I. Wuwu Petrus, Yakobus hante Yohanes ompi Yakobus aga to Napodohe. 38 Karatara i hou Yairus, laihilo-Na tauna nogeho, to nakeo pade to potantangi. 39 Pehua Yesus rara hou ee mai, iulika-Nara tauna ee mai, “Napa to laikakeohimi pade potantangikami? Ngana ei moma'i namate, naleta moto'i.” 40 Naupawee, laitawanakara moto-'I, apa ngana ee mai namatemi.
Lauparia Yesus nampopehuwu humawee tauna ee. Laikeni-Naramo tina pade tuama ngana ee mai hante ana guru-Na tolu dua nampodohe-'I nehua i rara kamara popadulea ngana ee mai. 41 Laikakamu-Nami Yesus pale ngana ee mai pade iuli-Na, “Talita kum.” Batuana, “Ana, Ku'ulikako, pematamoko!” 42 Ngkali nemata mpuumi ngana ee mai, nokangkore pade nomako. Umuru ngana ee mai hampulu rompaemi. Humawee tauna to naria i hee, nahera nampahilo ngana ee mai natuwu nculimi. 43 Naupawee Yesus nampaulikara bona nemo mpuu rakewora hi tau ntanina napa to nadupa ee mai. Pade Yesus nantudura mopakoni ngana ee mai.