Filipika olu i

Pɔli é sɛ́wɛ mín nátaa

Filipika ólu

mán

Sɛ́wɛ o kɔ́ɔnnɔnlaa o ɲánfɔ o

Ɛnza ɲɛn kaamɔɔndhye Pɔli é sɛ́wɛ míin nzɛ́wɛ lé, kɛ a to kasola. Pɔli é sanmankanmɛɛ o láse Filipi só o kɔ́ɔnnɔn a yɛ táaman fyáaɲɔn o wáati óle lɔ (Kɛ́wɛɛ 16.11-40). O wáati o lée kɛ́ Filipi Egilizi o lamyaan o le. Filipi é sóba lé le, Masedwani mála ó lɔ, Gɛlɛsi yamaan o lɔ, mín ndɛ́ɛ Lɔmuka olu tá faan o kɔɔ. O Egilizi o lée kɛ́ Egilizi jónan o lé o ywáa o lɔ.

Pɔli ní Filipi lánanbhaa olu tɛ́ɛ twáanva ɲɔ́ɔnman né le. Filipika olu tɛ́wɛɛ wɛ́ɛ lɔbhyaa Pɔli mán kɛ a lɔdhyɛman sanmankanmɛɛ o láse o lɔ (4.15). Filipika olu gbaa myáan Pɔli la ikwɔ, kɛ a to kasola (4.18). Pɔli é sɛ́wɛ míin nátaa o lé lɔ, kɛ i bálika bhɔ́.

Sɛ́wɛ míin ngɔɔnnɔn, Pɔli é Filipi lánanbhaa olu yóso lágbɛya, ké ii i lɔ́ja kɛ tó lánanya o lɔ, kɛ tɔ́lɔya óni sɛɛ ó bɛ́ lɔmyaan (1.27-30). A ko fé mín ngaa olu nánfa, sannin olu a o ɲíin, olu kákan ne, kɛ i manyii ɲɔɔnɲɛn ótun, kɛ bhyɛ kéeman dhyáaɲɔɔnya o lɔ (2.1-5). Aa a yaa Filipi lánanbhaa olu la ikwɔ ko Ala é i kisi Mantii Ɛnza ngéene bháaka lɔ, lánanya o sɔ́ɔbu la; kɛ táamankɛ Yawudhyaa olu yɛ́ sɛliya o ka o nɔ́n tɛ (3.3-9).

Pɔli tɛ́ɛ kasola sanmankanmɛɛ o láse o le kósɔn, waa o bɛ́ kwɔ aa i ɲaanli (1.18). Aa fɛ ké lánanbhaa olu á í ɲáanli; Pɔli ko: «Áa í ɲáanli wáati bɛ́ ni Mantii o le! Ní o fɔla íkwɔ, áa í ɲáanli!» (4.4).