Filipika olu 1

Pɔli é sɛ́wɛ mín nátaa

Filipika ólu

mán

Pɔli yɛ twaali olu

A faanan ne Pɔli ni Timote la, Ngílisi yɛ yɔ ŋolu, kɛ a dí mɔɔn óo mɔɔn mín nzɛ́nnɛnyanin ŋé ní Ɛnza Ngílisi le olu bɛ́ man Filipi, ɲɛ́nmɔɔn olu ni bháalakɛbhaa olu.

2 Ké án Nvá Ala óni Mantii Ɛnza Ngílisi yɛ nɛ́nmɛn óni láha ó á kɛ́ á fɛ́!

Pɔli yɛ sɛ́ɛ o filipika olu yɛ

3 Ngɛ míli á mán wáati óo wáati lɔ, ni bálika bhɔ́la ɲɛ́n Ala o yɛ. 4 Ní nzɛ́ɛla á bɛ́ yɛ wáati o bɛ́ lɔ, ní o kɛla ni nisɔdhyaa lé lé wáati bɛ́. 5 Tínɲan in ne, ní bálika bhɔ́la Ala yɛ, kɛ mansɔɔ, kɛ a ta tée jónan o mán kɛ nán sé fɔ́ɔ bí o mán, án ni kée ne sanmankanmɛɛ láse o mán. 6 Né lánin ɲé a la óo: mín ŋwɛ́ɛn bháalabhɛɛ lamyaan á yoso o lɔ, o yáa o labha, kɛ táa se fɔ́ɔ Ngílisi ta lo ŋo man. 7 No ɲó lée a lɔ ké míliya míin wé o á kɛ́ né la á tá fán nvɛ́, tínɲan in ne á kó é ngɔ́ɔnnɔn gbútuukɛ, kɛ mansɔɔ Ala wɛɛ nɛ́nmɛn mín ngɛ, né ni ále bɛ́ wɛɛ lɔsɔɔ o lɔ, ké ní kɛ kaso la, wáman ké ní kɛ́ sanmankanmɛɛ o kwɔkɔɔdhyɛla óni kɛ a sɛ́ɛya ladi. 8 Tínɲan in ne, Ala gbú é nzɛ́ɛya lé: Á bɛ́ bɛ́ a dí ɲɛ́n gbútuukɛ, Ɛnza Ngílisi tín ŋó lɔ.

9 Ní mín dɛ́lila ɲɛn sɛ́ɛ o lɔ, o lée ko lɔ á fala á yɛ dhyáaɲɔɔnya o ka, ni lɔninyabhɛɛ sɔɔ le, kɛ bhɔ ko olu ɲánle cɛ́ɛne, 10 ké áa se kɛ kó kuugbɛɛ ŋolu bhɔ́ngangɛ, ké áa kɛ́ mɔɔn sɛwɛman nú le, óni yóo kóo ngɛ́nan kɛ́ á lá, Kílisi yɛ lo ŋo kósɔn, 11 ké á fánin ŋán kɛ́ téenin o la mín ŋé bhɔ́la Ɛnza Ngílisi lɔ. O bhóo o mán, Ala yaa kunnanwee ŋóni bwóɲan sɔɔ.

Pɔli yɛ gbɛ́ya o sanmankanmɛɛ o kósɔn

12 Mádhye ŋolu, ní fɛ ké áa bhɔ́ a ɲan le: Tínɲan in ne, ko míin né sɔɔ, o lé yɛ́ɛ é sanmankanmɛɛ láse o tɔ látaa ɲɛn. 13 O bhóo o mán, yámaantii o yɛ bháalakɛbhaa olu ni mɔɔn tɔ́ olu bɛ́ á a lɔ, óo ní kasola Kílisi lé kósɔn. 14 Né ta kasolabhyaa o kósɔn, lɔ wɛ́ɛ bhyaa án mádhye ŋolu fánmba yɛ lánanya o ka Mantii o la: I lɔ́janin ɲé, kɛ Ala saaninkan ŋo láse shaanɲan lo ndɛ́ i lɔ.

15 Tínɲan in ne, mɔɔn lɔ́luu Kílisi yɛ ko olu lásela mɔɔn olu man, ɲánngboya o le kósɔn óni keeya o kósɔn. Wáa lɔ́lu a kɛ́la ni i yóso gbɛ́nin ŋó lé le; 16 ii o kɛ́la dhyáaɲɔɔnya le kósɔn. Ii lɔ ŋóo née kasola sanmankanmɛɛ o kwɔ́kɔɔdhyɛ o le kósɔn.

17 Wáa mɔɔn dɔ olu, olu Kílisi yɛ ko olu lásela keeya o le kósɔn; i tɛ́ a kɛla sɛ́wɛbhoo man. Oluu a yéla oo i kɛ a kɛ ce, o yáa lɔ fala ne ta tɔ́lɔya o ka kasola.

18 Wáa, o sí tɛ ne ɲánla fóyi le. Míliya gbɛ́ɛ á kɛ́ i la oo, wáman ii a kɛ tínɲan la oo, ne kwɛ́nnin ŋán mín nɔ, Kílisi yɛ ko olu í lásela, o lée ne nísɔdhyaala.

Ne yáa nisɔdhyaa ikwɔ, 19 kɛ mansɔɔ né á a lɔ ŋóo o gbɛya o bɛ́ labha ŋo yaa kɛ́ né mán kísili le, á yɛ́ sɛ́ɛ olu bháaka lɔ, óni Ngílisi yɛ́ Sɛ́nnɛnyanin ŋo yɛ dhyɛmanli o bháaka lɔ. 20 Ɲée síinin ɲe mín ne, tó a lɔɔ é nán, o lée kó: Ndáa maloya kó sí lɔ. Wáa Kílisi yaa kunnanwee nzɔɔ né fɛ bí, óyoo aa sɔɔ ɲán mín man kɔɔ; ɲáan nɔ́ja. Ní ngɛ to nila, a yaa kunnanwee nzɔɔ ɲɛn dínɲanlɔtɛɛ o kɛ séɲan o fɛ, wáman ní ngɛ sayakɛ a yaa kunnanwee nzɔɔ né ta saya o fɛ.

21 Kɛ mansɔɔ né fɛ́ ye, dínɲanlɔtɛɛ o lée Kílisi le, óni saya o nánfa é a la né mán! 22 Wáa, ní ngɛ́ tó ní la, ɲáan sé kɛ bháala nánfaman ngɛ bhée. O bhóo o mán, ngáa mín ndá, mán o lɔ. 23 Miliya o wɛ́ɛ i lɔ́taa fyáa le: née fɛ kɛ bhɔ́ dínɲan míin nɔn, ké ní kɛ́ ni Kílisi le, kɛ mansɔɔ o le á fisaa kɛ tinmin. 24 Wáa né kɛ́ tó dínɲan lɔ, o lé nánfa é a la gbútuukɛ á lée lu man, 25 né lánin ŋé o la. O bhóo o man, ní lɔ ŋoo ne yáa tó á tɔ́ɔfɛ, ké á yɛ́ lánanya o á táa ɲɛnnvɛ, óni ké á nisɔ á dhyáa lánanya o lɔ, 26 ké á kunnanweenin ŋán kɛ́ cɛ́ɛne Ɛnza Ngílisi kó ó lɔ né kósɔn, óni ne kwɔsɛɛ o sɔ́ɔbu la á fɛ́ yé.

Dínɲanlɔtɛɛ mínnin lánanya o táa kéene

27 Kó óo kó kɛ táa kɛ, áa á yɛ́ dínɲanlɔtɛɛ o kɛ, kɛ bhyɛ Kílisi yɛ sanmankanmɛɛ o mán. O bhóo o man, ní ngɛ́ nan á fɛ́ yénɔn oo, wáman ní mán nan oo, ɲáan á kó lámyɛn, ko áa tó miliya kée ŋo lɔ, ko áa kɛɛ kɛ ni yoso kée ŋo le, sanmankanmɛɛ o lánanya o ta sháa fɛ, 28 á tɛ́ sháannan á yúu olu ɲɛn ko si lɔ. O lée yaala olu la ko i wɛɛ túun, wáa o lée yaala á léelu la ko á wɛɛ kísi, Ala bháaka lɔ. 29 Kɛ mansɔɔ, mín ŋé nan kɛ́ Kílisi le, Ala wɛ́ɛ o kóɲwaan o kɛ á yɛ́, kɛ lá a la o dɔlɔun ŋó kó tɛ, wáa óni kɛ gbɛya myaan ale kósɔn. 30 Áa kɛ́ɛ mín ɲé né fɛ́ yé, tó áa a myɛ́nnan kwáalenin, áa o kɛ́ɛ kée ŋo le lá wé.