Kɛ́wɛɛ 16

Pɔli ní Timote yɛ́ ɲɔ́ɔnmyɛ ŋó

Pɔli é táa sé Dɛlibe, kɛ bhɔ́ yé kɛ táa Lisitili. Ii kaamɔɔndhye nɔ sɔɔ Lisitili, o tɔ́ɔ tɛ́ɛ kó Timote; a wóobhaa tɛ́ɛ Yawudhyaa lé le, o lánin ndɛ́ɛ Ɛnza nan, a fa tɛ́ɛ Gɛlɛki lé le. 2 Bhádhye mínnu Lisitili óni Ikoniyɔmu olu tɛ́ɛ a tɔ́ɔɲwaan fɔla. 3 Pɔli tɛ́ɛ fɛ́ kɛ́ Timote kɛ a bháalakɛɲɔɔn le. Aa táa Timote yɛ kɛ́ɛn o kɛ, Yawudhyaa mínnu o mala o lɔ́ olu kósɔn, kɛ mansɔɔ i bɛ́ tɛɛ lɔ ŋóo a fá tɛ́ɛ Gɛlɛki lé le.

4 Pɔli ní Silasi tɛ́ɛ tínminnan so mínnu la, céladhye ŋólu ní Yeluzalɛmu cɛba olu kó mín nátɛɛ, i tɛ́ɛ o fɔla lánanbhaa ólu yɛ, ké ii o sháa ólu látaaman. 5 Egilizi olu tɛ́ɛ faan sɔɔla, kɛ táa ɲɛ́n lánanya o lɔ, óni lɔ tɛ́ɛ fálala i ka ló ŋóo ló.

Pɔli kíi o Masedwanin

6 Ní Sɛnnɛnyanin ŋó man sɔ́n ké Pɔli ní a táamanɲɔɔn olu á Ala yɛ saaninkan ŋó láse Azi mala o lɔ́ mínngɛ, ii Filizi mala óni Galati mala o lɔ́timin. 7 Ii súnɲan Mizi mala o la mínngɛ, ii a lɔswaan kɛ táa Bitini. Wáa Ɛnza ɲɛ Ní Sɛnnɛnyanin ŋó mán sɔ́n ke ii táa. 8 Oo kɛ́ mínngɛ ii Mizi mala o lɔ́timin kɛ táa Tolowasi. 9 Ló nɔ́ sú lɔ, Pɔli é Masedwaninnga cɛ lɔ yé óyoo shoo lɔ, a lɔ́nin ndɛ́ɛ, o tɛ́ɛ a dɛ́lila kɛ fɔ a yɛ kó: «Nan Masedwanin kɛ́ nan án nyɛman.» 10 Pɔli é o yé mínngɛ, án ní a ɲiin jónan kɛ táa Masedwanin mala o lɔ, o le kósɔn a tɛ́ɛnga ndɛ́ɛ án móo kó Ala lée án ngíi kɛ táa Sanmankanmɛɛ o láse o mɔɔn olu mán.

Lidi yɛ́ lánanya o Ɛnza nan

11 Án ní ló kúun nɔ kɔ́ɔnnɔn Tolowasi, kɛ án ndée kɛ táa Samotasi. O lúusɔgbɛ o án ní táa Nehapolisi. 12 Án ní bhɔ́ yénɔn kɛ táa Filipi, mín ŋé Masedwanin mala o só o bhá o lɔ lé. Óni ii Lomɛn olu tá fáan o le kɔɔ. Án ní an nzíi o só o la yénɔn tée laman kɔ́ɔnnɔn.

13 Lɔnwɛɛnlilo ŋóo sé mínngɛ, án ní bhɔ́ só ó kɔ́ɔnnɔn kɛ́ táa bhá lɔ mánshaafɛ. A tɛɛ kɛ́la án ɲíiman oo Yawudhyaa olu ɲɔɔn nádhyɛla yénɔn kɔɔ kɛ i sɛ́ɛ. Án ní táa muso lɔ́lu ládhyɛnin nzɔ́ɔ yénɔn, án ní án nzíi ni olu le, kɛ́ bhálo kɛ ni ile. 14 Muso lɔ tɛ́ɛ i cɛ́man, o tɔ́ɔ ko Lidi, aa bhɔ́la Tiyatili. Julayakɛbhaa le tɛ́ɛ o le, a tɛ́ɛ fáanin sɔɔngbɛɛ^a ne féle la. Ala ɲɛ́nnzhaanmaa le tɛ́ɛ ale. A tɛɛ án nɔ́nmyɛn nan, Mantii o a yósokun ŋó láka, aa i tóomanlɔ Pɔli yɛ kóman o lɔ́ cɛ́ɛne. 15 Ale ní a yɛ lúmanmɔɔn olu bɛ́ bátizenin ŋó kwɔ́, áa an dɛ́li kɛ fɔ́ an ɲɛ́n kó: «Ní a wɛɛ lá a lá kó ne wɛɛ sɔ́n Mantii o mán tínɲan in ne, o bhóoman áa nan i mányii ne bhóo lúman.» Áa o fɔ, kɛ o mángbɛya gbútuukɛ.

Pɔli ni Silasi é kasola Filipi

16 Ló nɔ́ la, án ndɛ́ɛ táa sɛ́ɛlaa lɔ mínngɛ, yɔmuso lɔ é án ngúmyɛ. Jínan ne tɛ́ɛ o sínngbiinin ŋó fɛ, o le sɔ́ɔbu la a tɛ́ɛ lɔgbɛli kɛ́la, kɛ wɛ́ɛ shɛ́ɛman nzɔ́ɔ kɛ o dí a kunndii ólu man. 17 O muso oo i bhyáa Pɔli ní án neelu kwɔ́, kɛ táa gbáa né kó: «Mɔɔn míinnu Ala kɔɔtaninmba o yɛ bháalakɛdhye neelu le! Ii kísili sháa o le lásela á mán!»

18 Aa o kɛ tée shɛ́ɛman ngɔ́ɔnnɔn. Oo kɛ mínngɛ, Pɔli é mwɛ́nnɛn kɛ i ɲán yɛ́ɛman a lɔ kɛ fɔ jínan ŋó yɛ kó: «Ɛnza Ngílisi tɔ́ɔ o la, ní fɔla i yɛ kó íi bhɔ́ muso míin nɔn!» O wáati kée ŋó lɔ jínan ŋó bhɔ́ muso o fɛ.

19 O yɔmuso o kunndii olu a yé mínngɛ óo i yɛ wɛ́ɛsɔɔlaa o wɛɛ cáan, ii Pɔli ní Silasi myáan kɛ i sánman fáanla kɛ táa ní ile lúutii tóo kɔɔ i yɛ ɲɛ́nmɔɔn olu fɛ́ yé. 20 Ii táa ni íle lúutii o saala, kɛ́ fɔ́ o yɛ́ kó: «Mɔɔn míinnu é án ɲɛ́n só o ɲáanmin nan le. Yawudhyaa lée ile. 21 Ii mɔɔn olu kálanan laanan lɔ́lu la, án née Lomɛnka ólu mánngan kɛ sɔ́n o laanan olu mán, óni kɛ a sháa o látaaman.» 22 Yaman óo o myɛ́n mínngɛ, íi muluti Pɔli ní Silasi man. Lúutii ólu kó ii Pɔli ní Silasi yɛ déeke o sawa kɛ bhɔ́ i kannan, kɛ i gbási gbéle la. 23 Ii í gbási bhɛ́ɛbhɛɛ le mínngɛ, ii i bhyáa kasola, kɛ fɔ kasobho ŋó kunnansiibhaa o yɛ kó aa i yáakii tó i lɔ cɛ́ɛne. 24 Kasobho ŋó kunnansiibhaa óo o kóman o myɛ́n mínngɛ, aa Pɔli ní Silasi bhyáa kasobho ŋó kɔ́ɔnnɔnlaa o lɔ, tó kɛ i sé ŋó bhyáa kúun ŋo la.

Kasobho ŋó kunnansiibhaa o yɛ lánanya o

25 Sú o cɛ́manlaa o mánshaafɛ, Pɔli ní Silasi tɛ́ɛ Ala dɛ́li o la óni kɛ lɔ́na kɛ Ala tándo. Kasodhye ŋólu tɛ́ɛ i lɔ́myɛnnan. 26 O ywáaninngee ŋó lɔ lúukolo oo yáayaa fáanla, fɔ́ kasobho ŋó zusíinin ŋé kawa mínnu ka, o yáayaa la; o ywáaninngee ŋó lɔ kasobho ŋó lá o bɛ́ɛ í láka, tó nɛɛnyɔlɔkɔ ólu bɛ́ɛ fwée kɛ bémbe. 27 Kasobho ŋó kunnansiibhaa oo kúun súnnɔɔn lɔ, kɛ yé óo kasobho ŋó lá olu lákanin ɲé mínngɛ, aa a yɛ sháanva ŋó sawa kó a káa a yɛ́ɛ fáa, kɛ mansɔɔ a tɛ́ɛ yéla óo kasodhye ŋólu wɛɛ bwée. 28 Wáa Pɔli é gbáa kɛ fɔ kó: «Í kɛ́nan kóyoo ngɛ́ i yɛ́ɛla, án mbɛ́ɛ yánun.» 29 O lɔ kasobho ŋó kunnansiibhaa óo fitinan olu kófɔ, aa i láteeya kɛ ló kasobho ŋó kɔ́ɔnnɔnlaa o lɔ, a yaayaatɔ óo i bé Pɔli ní Silasi sé ngɔɔ. 30 Aa bhɔ́ Pɔli ní Silasi le kɛ́ɛnman kɛ i manɲaankɛ kó: «Kaamɔɔn, ne kákan kɛ mínnɛɛn le kɛ, kɛ kísi?» 31 Ii a yawi kó: «Lá Mantii Ɛnza nan, í yáa kísi, íle ní í yɛ dhyémaya o.»

32 Ii Mantii o saaninkan ŋo fɔ́ a yɛ, óni mɔɔn óo mɔɔn tɛ́ɛ a bhóo lúman. 33 O wáati kée ŋó lɔ, sú o cɛ́man, kasobho ŋó kunnansiibhaa o Pɔli ní Silasi tá, tó kɛ i yɛ lá o kwó. O ywáaninngee ŋo lɔ, ii a bátize, ale ní a yɛ dhyémaya o bɛ́. 34 Kasobho ŋo kunnansiibhaa o táa Pɔli ní Silasi le a bhóo lúman kɛ lɔ́min dí i man. Ale ní a yɛ bhónanbhaa ólu bɛ́ɛ i nisɔdhyaa gbútuukɛ, kɛ mansɔɔ i wɛ́ɛ lá Ala la.

35 Kɛ́ɛn o bhɔ́ mínngɛ, lúutii ólu swáasi lɔ́lu bhyáashaa kɛ táa fɔ kasobho ŋo kunnansiibhaa o yɛ kó aa Pɔli ní Silasi lábhyaa. 36 Kasobho ŋo kunnansiibhaa o táa o kóman o fɔ Pɔli yɛ kó: «Lúutii ólu wɛ́ɛ mɔɔn lɔ́lu bhyáashaa kó kɛ á lábhyaa. Áa bhɔ́ kɛ táa hɛ́lɛ lɔ́.» 37 Wáa Pɔli é fɔ swáasi ólu yɛ kó: «I wɛ́ɛ án gbási yaman o ɲanla kɛ́ án myáa kaso o la. Kwáalenin, ii fɛ kɛ́ án myáa loo nɔn ŋán? Kɛ́ɛke Lomɛnka lée án ne. I mán kítitɛɛ án nga. O táa kɛ, fɔ́ ílee gbúlu á nan án nan bhɔ́.»

38 Swáasi olu i kwɔ́sɛɛ kɛ táa o kóman ólu fɔ́ lúutii ólu yɛ. Olu bhɔ́ a ɲan le mínngɛ, kó Pɔli ní Silasi é Lomɛn yamaan o dhyé ne lé, ii sháan. 39 Ilee gbúlu é nan, kɛ Pɔli ní Silasi dɛ́li kɛ i lábhyaa, kɛ a ɲíin i fɛ kó: ii bhɔ́ só o kɔ́ɔnnɔn. 40 Pɔli ní Silasi é bhɔ́ kaso o kɔ́ɔnnɔn mínngɛ, ii táa Lidi fɛ yé. Ii bhádhye ŋólu ládhye kɛ i yóso lágbɛya tó kɛ tó táala.