Kɛ́wɛɛ 15

Sɔ́sɔli míin kɛ kɛ́ɛnko ó lɔ

Mɔɔn lɔ́lu é bhɔ́ Zude mala o lɔ kɛ́ nan Antiyɔsi, i tɛ́ɛ bhádhye ŋólu kalanan, kɛ fɔ i yɛ kó: «Ní a mán táa kɛ́ɛnlɔ kɛ kéeɲan ni céla Musa yɛ laanan o le, a táa sé kɛ kísi.» 2 Pɔli ní Baanabasi mán sɔ́n o kóman o mán, óo kɛ sɔ́sɔli gbɛ́yanin né ile ni o mɔɔn olu cɛ. O lɔ, ii a látɛɛ kó Pɔli ní Baanabasi óni lánanbhaa lɔ́lu a táa Yeluzalɛmu, kɛ o ɲan fɔ́ céladhye ŋolu ní ɲɛ́nmɔɔn olu yɛ́.

3 I manko tɛ́ɛ fé mínnu la i yɛ táaman o lɔ, Kílisi yɛ́ mɔɔn ólu o dí i man. I táatɔ o lé, ii tinmin Fenisi mala óni Samali mala o lɔ. Síya gbɛ́ɛ olu wɛ́ɛ kɛ́ lánanbhaa ɲán mín man, i tɛ́ɛ o lɔ́sɔɔla. I tɛɛ bhádhye ŋolu bɛ nisɔdhyaala. 4 Ii se Yeluzalɛmu mínngɛ, Kílisi yɛ́ mɔɔn olu ní céladhye ŋólu ní cɛ kɔɔnin ŋolu i labhyɛ. Ala é ko mínnu kɛ́ ní ile, ii o bɛ́ lɔ́sɔɔ i yɛ. 5 Wáa, Falizɛn ŋolu yɛ mɔɔn mínnu tɛ wɛ́ɛ kɛ lánanbhaa le, oluu fɔ, kó mínnu tɛ́ Yawudhyaa le tó i wɛ́ɛ sɔ́n Ɛnza man, kó fɔ́ olu a bhɔ́ kɛ́ɛnlɔ dhyaalagboya la, óni kó i kákan né kɛ Musa yɛ sɛ́liya o látaaman. 6 Oo kɛ́ mínngɛ, céladhye ŋolu ní cɛ kɔɔnin ŋolu ɲɔ́ɔn nándhyɛ kɛ́ o ko o yace myaan.

Sɔsɔli o Yeluzalɛmu

7 O kóman óo kɛ sɔ́sɔliba lé i cɛ. Piyɛli é í wíi kɛ í lɔ kɛ kóman o tá kɛ fɔ kó: «Mádhye ólu, áa a lɔ ŋóo, kɛ a tá ló njónan o mán, Ala é ne bhɔ́ á cɛ́man mínngɛ, ké né lá o a sanmankanmɛɛ o láse síya gbɛ́ɛ olu mán, ké ii Ala sáaninkan ŋó myɛ́n, kɛ lá Ɛnza nán. 8 Ala mín ŋán mɔɔnninnvin ŋólu bɛ́ yóso o lɔ́, o wɛ́ɛ i sɛ́ɛya ládi ko a wɛɛ Ní Sɛnnɛnyanin ŋó dí i man, óyoo aa o dí án man ɲán mín man. 9 Ala mán lɔ́bhɔ lɔ́lɔ. Kɛ mansɔɔ a wɛɛ i yoso o sɛ́nnɛnya lánanya o bháaka lɔ. 10 Ni aa cé, mínnɛɛn le kósɔn áa fɛ kɛ Ala lɔ́swaan? Án myɛ́nman olu ní án neelu mán sé lwée mín ngɔɔ, mínnɛɛn le kósɔn áa fɛ kɛ o lwée ŋó síi kaamɔɔndhye ŋolu kúnman? 11 Kɛ mansɔɔ án nanin ŋé a lá óo: Án ŋwɛ́ɛn kísi Mantii Ɛnza ɲɛn nɛ́nmɛn o le kósɔn, ilee wɛ́ɛ kísi o ɲán kée ŋó le mán.»

12 Yaman o bɛ́ɛ i lúmandhye, kɛ Baanabasi ní Pɔli lɔ́myɛn, Ala é káwananngo mínnu kɛ́, óni sɛ́ɛya mínnu kɛ́, i bhóo, síya gbɛ́ɛ olu cɛ́man, ii o bɛ́ lɔ́sɔɔ yaman o yɛ.

13 Pɔli ní Baanabasi é wɛ́ɛ kóman o la mínngɛ, Zaki é kóman o ta kɛ fɔ kó: «Mádhye ŋólu, áa nɔ́nmyɛn. 14 Ala hákii é tó síya gbɛ́ɛ olu lɔ ɲán mín man a lamyaan o lɔ, kɛ́ lɔ́lu tá i cɛ́man, kɛ i kɛ́ a gbú tá le, Simeɔn wɛ́ɛ o bɛ́ lɔ́sɔɔ a yɛ kɛ bhá. 15 O kóman óni céla olu yɛ kóman o wɛ́ɛ bhyɛ́ kée mán, kɛ mansɔɔ a sɛwɛnin ŋé kitabu o kɔ́ɔnnɔn, kó:

16 ‹O ko olu kwɔ́, ne yáa ngwɔ́sɛɛ kɛ́nan.

Laula yɛ bhó mín ŋwɛ́ɛn bé, né yáa o lɔ kókwaa kɛ.

Ne yáa bhó ngbáa kɔ́ɔ o láwii kɛ a latee.

17 Ké mɔɔn tɔ́ olu bɛ́ á Mantii o ɲíin,

ɔɔn síya gbɛ́ɛ mínnu to né tɔ́ɔ o i ká.

Mantii o mín ŋwɛ́ɛn o láheli ó tá.

Mantii o lé ko cé.

18 Ale lée o kó olu yáa kabiini wáatija.›^a

19 O le kósɔn, ne Yangubha tá miliya o lɔ, síya gbɛ́ɛ mínnu wɛ́ɛ sɔ́n kɛ i yɛ́ɛman Ala mánshaa fɛ, án ngɛ́nan gbɛ́ya láse olu mán. 20 Wáa án ni sɛ́wɛ míin myáa i man, kɛ fɔ i yɛ kó: ii i yɛ́ɛ myaan jó olu wɛɛ fé min nánɔɔn ólu mán, i kɛ́nan kaanngɛ, i kɛ́nan jífasoo o lɔ́ɔ, óni yée o. 21 Kɛ mansɔɔ, kabiini wáatija, só olu bɛ́ la, sanmankan násebhaa oluu Musa yɛ sɛliya o le lásela, tínɲan in né, ii a yɛ sɛ́wɛ o fɔla lɔnwɛɛnlilo ŋoo lɔnwɛɛnlilo, sɛ́ɛbho olu kɔ́ɔnnɔn.»

Sɛ́wɛ míin bhyáashaa lánanbhaa olu man

22 Oo kɛ́ mínngɛ, céladhye ŋolu ní cɛba olu, óni Kílisi yɛ́ mɔɔn olu bɛ́ɛ bhyɛ a man kó i kákan kɛ mɔɔn lɔ́lu bhɔ́, kɛ olu fála Pɔli ní Baanabasi ká, kɛ i bhyáa kɛ táa Antiyɔsi. Zudasi mín ŋé kíila kó Balisabasi, ii o bhɔ́, óni Silasi, bhádhye ŋólu tɛ́ɛ o mɔɔn fyáa olu yacela gbútuukɛ. 23 Ii sɛ́wɛ ló olu bhóo, kɛ fɔ kó: Án mádhye mínnu é síya gbɛ́ɛ olu le ní Yawudhyaa tɛ́ ile, tó i síinin ŋé Antiyɔsi, óni Sili, óni Silisi, a bhádhye céladhye ŋolu ní cɛba olu ní Kílisi yɛ́ mɔɔn olu sɛ́wɛ míin myáashaala a mán, án ní á twáala. 24 Án ŋwɛ́ɛn myɛ́n kó mɔɔn lɔ́lu wɛ́ɛ bhɔ́ án nvɛ́ ya, kɛ́ɛke án née mán olu bhyáashaa, i wɛɛ a kɔɔnnɔn múun, óni a hánminnin ɲé, i yɛ kóman olu kósɔn. 25 O le kósɔn, án ŋwɛɛn bhyɛ kéeman kɛ fɔ kó án ní mɔɔn lɔ́lu bhɔ́ án njɛ́man kɛ olu bhyáashaa á mán, óni án mádhyemannjɛ Baanabasi óni Pɔli, o mínnu a dí án ɲɛn. 26 I wɛɛ dhyɛn i ní o lɔ Mantii Ɛnza Ngílisi tɔ́ɔ o kósɔn. 27 O bhóo o man, an ŋwɛ́ɛn Zudasi ní Silasi bhyáashaa á mán, án ŋwɛɛn mín nvɔ́ sɛ́wɛ o kɔ́ɔnnɔn, olu gbú lá o yáa o lɔsɔɔ a yɛ́. 28 Kɛ mansɔɔ, a wɛ́ɛ dhyáa Ní Sɛnnɛnyanin ŋo yɛ, óni án neelu yɛ kó án mánngan kɛ lwée gbɛ́ɛ la á ká mée, fɔ́ mínnu kúu a gbɛ́ɛ. 29 Oo lɔ́ mínngɛ, bhyáa mínnu wɛ́ɛ ta kɛ jó olu sɔ, áa i yɛ́ɛ lɔmyaan olu mán, óni yée o, óni jífasoo olu, óni kaanngɛ o. Ní a kɛ sé kɛ fála o kó ólu la, áa kóbhɛɛ lé la wé. Án mɛ.

30 Ii mɔɔn olu bhyáa kɛ táa, ii sé Antiyɔsi mínngɛ, ii Kílisi yɛ́ mɔɔn olu ládhyɛ kɛ sɛ́wɛ o ló i bhóo. 31 Ii sɛ́wɛ o kála mínngɛ, sɛ́wɛ o kɔ́ɔnnɔn kán ŋóo i fáan ló, o le kósɔn ii i nísɔdhyaa. 32 Zudasi ní Silasi gbúlu tɛ́ɛ céla le lé, i tɛɛ bhádhye ŋólu fáan lónan óni kɛ i lɔ́ja lánanya o mán ni ládhyelikan nzhɛ́ɛman ne. 33 Zudasi ní Silasi é tée laman laman kɛ ni ile, o kwɔ́, bhádhye ólu lwaau bhyáa i fɛ́, kɛ i bhyáa kɛ́ táa i cébhaa ólu saala láha lɔ. 34 [Wáa Silasi é fɔ kó ale káa tó Antiyɔsi. Zudasi kée ŋé táa Yeluzalɛmu.] 35 Pɔli ní Baanabasi é tó Antiyɔsi. Ile ní mɔɔn gbɛ́ɛ lú tɛ́ɛ tóla, kɛ lánanbhaa olu kála, kɛ Mantii o yɛ Sanmankanmɛɛ o láse.

Pɔli ní Baanabasi é fáanan ɲɔ́ɔnnan

36 Tée laman tínminnin ŋó kwɔ́, Pɔli kó Baanabasi mán kó: Án ŋwɛ́ɛn tinmin só mínnu la kɛ Mantii o yɛ kóman o láse, án ni án ngwɔ́sɛɛ o ywáa ólu lɔ án Mádhye mínnu yénɔn, ke olu ɲán mín man, kɛ táa o mánfɛɛ.

37 Baanabasi é a fɛ, ké Yaya míin kíila ko Maki, o a táa ní ile. 38 Wáa, Pɔli mán sɔ́n o mán, kɛ mansɔɔ kɛ i tó Panfili mala o lɔ, aa bhɔ́ i kwɔ, a mán tó ní ile kɛ bháala o lábha. 39 O kó óo kɛ sɔ́sɔliba le Pɔli ní Baanabasi cɛ, a lábha ŋó, ii fáa ɲɔ́ɔnnan. Baanabasi é Maki tá, ii ló kúun nɔ́ kɔ́ɔnnɔn kɛ táa Shipulu. 40 Pɔli é Silasi tá kɛ táa; bhádhye ŋólu Ala dɛ́li i yɛ, kɛ i kɛ́ɛfa Mantii o yɛ nɛ́nmɛn o mán. 41 Aa tinmin Sili óni Silisi yamaan o lɔ, kɛ Kílisi yɛ́ mɔɔn olu fáan ló.