Ɛnza ŋé lámansayoondɔ lɔ́ lákɛɛnyala
5
O kó ólu wɛ́ɛnin ŋó kwɔ,
Ɛnza ni a yɛ kaamɔɔndhye ŋolu sé bhá ó ɲán dɔ́ o mán.
Zelazaka olu yɛ mála o lɔ.
Maki 5.1-20
2 Aa í yíi kúun ŋó kɔ́ɔnnɔn tɛ́nmɛn,
cɛ lɔ é bhɔ kábulu o lɔ téeman kɛ́nan a kunmyɛ,
lámansayoo ne tɛ́ɛ o cɛ o fɛ́.
3 A tɛɛ a ta dínɲanlɔtɛɛ ó kɛ́la kábulu o léelu lɔ.
Mɔɔn sí tɛ́ tɛ́ sháa a silila bhée yáanin nɛɛnyɔlɔkɔ la.
4 I tɛɛ a myaanla lé sɔ́,
kɛ kúun nu bhyáa a sénan,
kɛ a bhóo ó síli nɛɛnyɔlɔkɔ lu la.
Wáa a tɛ́ɛ kúun ŋólu céla lé,
kɛ nɛɛnyɔlɔkɔ olu tɛ́ɛ.
Mɔɔn sí fáan tɛ́ tɛ́ a mannɔnla bhée.
5 Sú ni tee,
a tɛ́ɛ kɛ́la kábulu o léelu lɔ óni tii ólu mán.
A tɛ́ɛ gbáanan,
kɛ a yɛ́ɛmandiin káwa olu la.
6 O cɛ óo Ɛnza nantɔ ó yé mínngɛ ywáaja nɔn,
aa bwée kɛ táa í kúnmɛɛn nɔ́kɛɛ a kɛɛnnan,
7 kɛ gbáa fáanla kó:
«Mínnɛɛn án njɛ,
Fé mbɛ́ kúnndii Ala dhyénjɛ Ɛnza.
Ní í dɛ́lila Ala kósɔn,
í kɛ́nan kólatɔ nan.»
8 Aa fɔ a yɛ kó:
«Lámansayoo ŋó,
bhɔ́ cɛ míin nvɛ́!»
9 Ɛnza ŋé a mánɲaankɛ kó:
«Í tɔ́ɔ díi?»
Aa a yawi kó:
«Ndɔ́ɔ kó yaman,
kɛ mansɔɔ án ni sháa.»
10 Aa Ɛnza dɛ́li koyoongɛ,
kó a kɛ́nan lámansayoo ŋólu cɛ́bhɔ yamaan o la.
11 Gbóyoonin nzɛ́ɛ lɔ́lu tɛ́ɛ lɔ́min kɛla tii ó mán.
12 Lámansayoo ŋólu Ɛnza dɛ́li kɛ fɔ a yɛ kó:
«Án nátaa gbóyoonin ŋólu lɔ,
ké án ni ló olu lɔ.»
13 Aa sɔ́n o mán i yɛ.
Lámansayoo ŋólu bhɔ́ o lé lɔ cɛ ó fɛ́,
kɛ táa lo gbóyoonin ŋólu lɔ.
Oo kɛ́ mínngɛ,
gbóyoonin nzɛ́ɛ óo í cɛ kɛ́ yɛ́ɛ tíi ó ka kɛ́ táa í bé bháji ó lɔ kɛ́ fáa.
I tɛ́ɛ gbóyoonin wáa fyáa lú sí bhɔ́la.
14 Gbóyoonin ngunnansiibhaa olu bɛ́ɛ bwée kɛ táa o kó ó búubhɛɛ só o kɔɔnnɔn,
óni kanman ŋolu la,
oo kɛ́ mínngɛ mɔɔn ólu nan o mánfɛɛ.
15 Ii nan Ɛnza ndɔ́ɔfɛ,
ké lámansayoo nzhɛ́ɛman ndɛ́ɛ cɛ mín nvɛ́ o síinin ɲe,
fáanin óo a kannan,
a wɛ́ɛ í ɲánmanlɔ.
Ii sháan gbútuukɛ.
16 O kó ólu bɛ́ɛ kɛ́ mɔɔn mínnu ɲánla,
olu tɛ́ɛ o ɲánfɔla mɔɔn tɔ́ ólu yɛ,
lámansayoo ŋólu bhɔ́ cɛ ó fɛ́ se ŋó mín ne,
óni kó mín ŋé kɛ́ gbóyoonin ŋólu la.
17 Mɔɔn ólu Ɛnza dɛ́li kó aa bhɔ́ i ta mála o lɔ.
18 Ɛnza ndɛ́ɛ í yɛ́ɛla kúun ŋó lɔ Wáati mínnɔn,
Lámansayoo ŋó tɛ́ɛ cɛ mín nvɛ́ oo a dɛ́li kɛ fɔ a yɛ kó ní aa sé kɛ́ táa ni a le.
19 Wáa Ɛnza mán sɔ́n.
Aa fɔ a yɛ kó:
«Í kwɔ́sɛɛ í bhóo lúman í yɛ́ dhyémaya ólu cɛ́man,
Mantii Ala o wɛ́ɛ kó mín ngɛ í yɛ́,
a yɛ bhɛ́ɛbhɛɛya ó kɔ́ɔnnɔn,
íi o bɛ́ fɔ i yɛ.»
20 Cɛ óo táa óle lɔ Dekapɔli.
Ɛnza ŋé kó óo kó kɛ́ a yɛ,
aa táa o bɛ́ lɔ́sɔɔ.
Mɔɔn óo mɔɔn é a kómankan ŋo myɛ́n,
o bɛ́ kɔɔnnɔn é fii.
Zayilusi dhyémuso óni muso mín ŋé í bhóo túula// Ɛnza ɲɛn déeke o la
21 Ɛnza ŋé í kwɔ́sɛɛ kúun ŋó kɔ́ɔnnɔn kɛ bhɔ́ bhá ó ɲán dɔ́ o mán mínngɛ yamanba é nan a saala bhá lá o la.
Maki 5.21-43
22 Sɛ́ɛbho ŋó kúnndii kée ŋé nan.
A tɔ́ɔ kó Zayilusi.
Aa Ɛnza ɲé tɛ́nmɛn,
aa nan í bíin a kɔɔ lúu mán,
23 kɛ a dɛ́li koyoongɛ kó:
«Nyémuso ó káa saya kɛ́ lé wé,
nan í bhóo lá a ka ké aa kɛ́ɛnya,
kɛ tó i níla.»
24 Ɛnza ni cɛ óo táa.
Yaman é bhyáa a kwɔka.
I tɛ́ɛ a gbɛ́nnɛnnan.
25 Muso lɔ tɛɛ i cɛ́man,
mín ɲɛn káakwo tɛ tɛ wɛɛla tó a wɛɛ kɛ a lá yangalo le kabiini sanɲin tá ni fyáa,
a tɛ tɛ́ í lálɔla.
26 Muso óo sé bhwɛ́ɛkɛbhaa shɛ́ɛman nvɛ́ yénɔn,
yangalo óni bhwɛ́ɛ kɛ́ ó tɛ́wɛɛ a mansɛɛ koyoongɛ.
A kunman wɛ́ɛ o bɛ́ɛ wɛɛ.
Wáa a tɛ mán kɛ́ɛnya bhá.
Yangalo o móo lé tɛ́ɛ kɛ́la a lɔ.
27 O muso óo Ɛnza ngomyɛn mínngɛ,
aa tínmin yaman o cɛ́man kɛ táa í bhóo túu a yɛ́ deeke o lá a kwɔ́man.
28 Kɛ mansɔɔ,
a tɛɛ fɔ́la í kɔ́ɔnnɔn kó:
«Ní ngɛ́ sé kɛ móo túu a yɛ déeke o la gbɛnnzɛn ngɛ,
ɲáan kɛ́ɛnya.»
29 Muso óo í bhóo túu a yɛ déeke o lá tɛ́nmɛn,
a yɛ́ káakwo óo í lɔ́,
o wáati kée ŋó lɔ.
Aa lɔgbɛ a fási ó lɔ óyoo a wɛɛ kɛ́ɛnya.
30 O ywáanin ngée ŋo lɔ,
Ɛnza ŋé a lɔgbɛ í kɔ́lɔ óyoo a yɛ faan o lɔ́ wɛ́ɛ bhɔ́ a fási o lɔ.
Aa í kwɔ́yɛɛman óle lɔ yaman o cɛ́man,
kɛ ɲaankɛli kɛ kó:
«Yɛ́ɛtii í bhóo túu ɲɛ́n déeke o la?»
31 A yɛ kaamɔɔndhye ŋolu a yawi kó:
«Íle gbú ɲán é yaman o lá í gbɛ́ɛndɛla,
tó íi ɲaanli kɛ kó yɛ́ɛtii í bhóo túunan?»
32 Wáa aa í ɲánlakaa a lamiin ŋo lɔ cɛ́ɛne ne,
kɛ cé aa o kɛ́bhaa o yé.
33 Muso o sháan ngóyoo ŋó mán,
a tɛɛ yáayaala,
kɛ mansɔɔ a tɛɛ lɔ ŋóyoo kó mín ŋwɛ́ɛn a sɔɔ.
Aa nan i kúnmɛn ŋó lɔkɛɛ Ɛnza nzé ngɔ́ɔ lúu mán tó kɛ tinɲan o bɛ́ fɔ́ a yɛ.
34 Ɛnza ŋé fɔ a yɛ kó:
«Ndhyémuso,
í yɛ́ lánanya ó wɛ́ɛ í lákɛɛnya,
táa hɛ́lɛ lɔ́,
ké o a kɛ í yɛ́ díin ŋo nɔ́ɔnyanin ne.»
35 A tɛ́ɛ ó kóman o fɔ́la wáati mínnɔn,
o lée kɛ́ mɔɔn lɔ́lu nán le kɛ bhɔ́ sɛ́ɛbho ŋó kúnndii Zayilusi fɛ́ yénɔn,
kɛ́nan fɔ Zayilusi yɛ kó:
«Í dhyémuso wɛ́ɛ wɛɛ saya kɛla,
íi kaamɔɔn ó kannankwaanyala mínnɛɛn lá bhée?»
36 Wáa Ɛnza é o kóman o myɛ́n mínngɛ,
a mán ó yace.
Ɛnza ŋé fɔ sɛ́ɛbho ŋó kúnndii ó yɛ kó:
«Í kɛ́nan sháan,
lá a lá i yóso o lɔ cé dɔlɔun.»
37 A mán í sɔ́n ké mɔɔn sí a táa a manlɔ,
fɔ́ Piyɛli,
Zaki óni Zaki lɔɔcɛ Yaya.
38 Ii lo sɛ́ɛbho ŋó kúnndiicɛ o yɛ lúkɔɔn ó mán mínngɛ,
Ɛnza ŋé táa yaman ó sɔ́ɔ ké ii ɲɔɔn nɔnkaanminnan ni kasi,
ní gbáa ne.
39 Aa lo tó kɛ fɔ i yɛ kó:
«Mínnɛɛn lé kósɔn tó áa ywáa ó lásɔɔnnan,
tó áa kásila?
Dhyé ŋó sayakɛnin ndɛ́,
aa súnnɔɔn le lɔ.»
40 Ii yɛ́ɛbhɔ Ɛnza nɔn.
Aa i bɛ́ lábhɔ,
fɔ́ dhyé ŋó fá óni a wóobhaa,
óni a yɛ kaamɔɔndhye nzawa ó,
o lée lúu nan a manlɔ.
Dhyé ŋó tɛ́ɛ bhó mín ngɔɔnnɔn,
ii lo yénɔn.
41 Ɛnza ŋé dhyé o myáan a bhóo mán,
kɛ fɔ a yɛ kó:
«Talita kumi!»
O kɔ́ɔ o tɔ́ɔ kó:
«Sínngbiinin,
í wíi,
ngó í yɛ́ cé!»
42 O lée kɛ́ sínngbiinin o wíi o lé téeman,
kɛ táamankɛ.
A sanɲin tá ni fyáa lé tɛɛ.
O lée bháa i bɛ́ lɔ,
kɛ i kɔɔnnɔnfii koyoongɛ.
43 Ɛnza ŋé fɔ i yɛ kɛ a mangbɛya kó:
«A kɛ́nan míin nvɔ́ mɔɔn sí yɛ.»
O kwɔ,
aa fɔ i yɛ kó:
«Aa lɔ́min di sínngbiinin ŋo mán.»