Sura'na Paulus lako jamaa jio kota
Efesus
Kada dipajolo
Ia tee sura'na Paulus lako jamaa jio kota Efesus mpangpeissenanni akkatta-Na Puang Allataala kumua namesa' penawa to sininna issinna lino sola suruga anna Puang Isa Almaseh menjaji kapalana. Ia tee sura' diparatu lako umma'-Na Puang Allataala dikua napahang tonganni joo akkatta-Na.
Ia tee sura' mpangngajaranni umbo nakua joo kapangmesan penawa mangka jaji. Dinii mpamanassai umbo nakua Puang Allataala mangka mpilei sola ndampangan umma'-Na nasaba' Puang Isa Almaseh. Ia to tombacai tee sura' disua la sikalino anna ia to kapangmesan penawa wa'ding jaji.
Ia to Paulus mpake ba'tu pira-pira pangpasusian mpapajanni kumua mangkamo memmesa' to sininna tomatappa', nasaba' mangkai memmesa' sola Almaseh. Ia to jamaa dipasangrapangngi batang kale, na Almaseh dipasangrapangngi ulunna. Ba'tu ia to jamaa dipasangrapangngi bola, na Almaseh dipasangrapangngi pangrantena. Ba'tu ia to jamaa dipasangrapangngi baine, na Almaseh dipasangrapangngi muanena. Ia to sininna apa nauki' mpapajan ngasan pangpakamoja'-Na Almaseh, susinna kamaparrisan-Na, kamangdampangan-Na sola kameloan penawan-Na.
Issinna Sura'
Pamula sura' 1:1-2
Almaseh sola taun-Na 1:3-3:21
Katuoan baru 4:1-6:20
Tampakkana sura' 6:21-24