Sura' Nabi
Yunus
Nabi Yunus cia' mpesa'dingngi parenta-Na PUANG Allataala
1:1-17
1
Den wattu namangkada PUANG Allataala lako Nabi Yunus anakkana Amitai. 2 Nakua, “Ta'pa maleko lako kota lompo Niniwe mupauanni to tau jio kumua la kusolanganni, nasaba' kuissenmo to panggaukanna liwa' gaja'.” 3 Apa sibalikanna madoang ori mpamambela kalena Nabi Yunus jio mai PUANG Allataala. Malei lako kota Yope, naampa' kappala' to la mangnguju lako kota Tarsisa. Ia tonna mangka mbajah sewa kappala'na, endekmi de' sola pangjama kappala' la male lako kota Tarsis, dikua namambela kalena jio mai PUANG Allataala. 4-5 Ia tonna jaomo kappala', mellaomi Nabi Yunus do' ngenan majiong, anna mamma' naleppeng.Naparatumi PUANG Allataala to angin bara' lan tasik to mpaden bombang gaja tonggo, nagasai to kappala', na ci'di'mora naancuru'. Simalajatanmi to pangjama kappala', anna pada metamba lako dewatanna to nasompa. Namane' nca'beanni do' tasik to apa nabawa kappala', dikua namaringngan danggi' natallan.
6 Ia tonna mellao to puanggawa kappala', naampai to Nabi Yunus leppeng, nakuanni, “Ee, ciapari mumamma' bang, mi'cokko ammumassambajang lako dewatammu, inda nnissenni ke nakamasei unaki', napasalama'ki' jio mai abala'.”
7 Ia tonna endekmo de', sipangkada-kadami puanggawa kappala' sola pangjamana nakua, “Melo ke taundii antaissenni kumua indara napusaba' naratuiki' tee abala'.” Naundimi, na sanganna Nabi Yunus endek. 8 Nakutanaimi to Nabi Yunus, “Pauankan, tongannaraka iko napusaba' na den tee abala'? Topole umboroko? Apara jamanmu na ciapari muinde'?” 9 Napebalii Nabi Yunus nakua, “To-Ibranina', to ssompana' PUANG Allataala. Iamo Puang jao suruga, to mpajaji tasik sola gantanan.” 10 Namane' ncuritanni, umbo nakua namadoang mpamambela kalena jio mai PUANG Allataala. Simalajatanmi to pangjama kappala' ssa'dingngi kadanna Nabi Yunus nakuanni, “Liwa'ko iko bango' mpugaukki tee panggaukan.” 11 Samangngiri'-iri'na to angin bara' na samatonggo-tonggona too to bombang. Mekutanami to pangjama kappala' lako Nabi Yunus nakua, “Apara to la sipato' kipugauk lako kalemu anna radan tee angin bara'?” 12 Napebalii Yunus, “Buangna' do' tasik, manassa la radan tee angin bara'. Nasaba' kuissen kumua aku' napupasaba' na den tee angin bara' ngkanna kamu'.”
13 Te'da unapa napembuanganni to pangjama kappala' to Nabi Yunus do' tasik. Sibalikanna napengkulle-kulle unapi mbisei joo kappala' lako randan tasik, apa kannori samangngiri'-iri'na to angin bara' nggasai. 14 Iamo joo namassambajang lako PUANG Allataala nakua, “Oo PUANG, meta'dakan danggi' Tapasalakan ke kibuangngi tee tau do' tasik to te'da nakasalan lako kami'. Oo PUANG, pakkaeloran-Ta'mo to jaji.” 15 Namane' nnangka'i to Nabi Yunus napembuanganni do' tasik, anna ta'pa radan to angin bara'. 16 Memmalaja' ngasanni lako PUANG Allataala to pangjama kappala'. Ia tonna ratumo lako gantanan mangkarobami namangtinja' toopa lako PUANG Allataala.
17 Namane' mparatui PUANG Allataala to bale matonggo naamma'i to Nabi Yunus. Natorro lan ba'tang bale tallung allo tallung bongi.