Ee sininna to Napaden Puang Allataala, pakalaꞌbih-Hi
148
Halleluya!Ee sininna to ntorroi suruga, pakalaꞌbih-Hi Puang Allataala,
pakalaꞌbih-Hi jao ngenan malaꞌbih-Na.
2 Ee sininna malaekaꞌ, tentara jao suruga,
pakalaꞌbih-Hi Puang Allataala!
3 Ee allo sola bulan, na sininna bintuin cumbiaꞌ-biaꞌ,
pakalaꞌbih-Hi Puang Allataala!
4 Ee langiꞌ to kaminang majao, pakalaꞌbih-Hi!
Ee wai jao langiꞌ, pakalaꞌbih-Hi Puang Allataala!
5 Melo ke sininna to Napaden Puang Allataala, mpakalaꞌbih sangan-Na,
sabaꞌ mangkada manda-I, naden ngasan to apa.
6 Napattantui to ngenan nanii mpanii,
Napattantuanni atoran to la naturuꞌi teꞌda anggena.
7 Ee sininna issinna lino,
sininna naga jiong tasik, na sininna tasik maluah,
pakalaꞌbih-Hi Puang Allataala!
8 Ee palepaꞌ na bua uran, salju na saleuꞌ mapattang
na angin baraꞌ to nturuꞌ parenta-Na,
pakalaꞌbih-Hi Puang Allataala!
9 Ee sininna buntu na membuntu-buntunna,
kaju membua sola kaju aras llan pangngalah,
pakalaꞌbih-Hi Puang Allataala!
10 Ee sininna patuoan sola olok-olok masiaꞌ,
sininna olok-olok lumemeꞌ na manuk-manuk,
pakalaꞌbih-Hi Puang Allataala!
11 Ee sininna raja sola bangsa,
sininna tomakuasa llan lino,
12 sininna kallolo sola anaꞌdara,
sininna pea sola to matua,
13 melo ke mpakalaꞌbih ngasan kamuꞌ Puang Allataala,
sabaꞌ sangan-Na manda to malaꞌbih,
kamalaꞌbiran-Na njaoanni langiꞌ na lino.
14 Mangka-Mi Puang Allataala mpemawatangngi ummaꞌ-Na,
iamo napakalaꞌbih-Hi to-Israel,
ummaꞌ-Na to gaja Napakamojaꞌ
to tattaꞌ mpugauk pakkaeloran-Na.
Halleluya!