Kamakuasan-Na sola kamamasean-Na Puang Allataala
147
Halleluya!Nang melo ke mpakalaꞌbihkiꞌ Puang Allataala,
sabaꞌ gaja mesannangan to mpakkelongan-Ni kelong pangpujian!
2 La Napemeloi poleꞌi Puang Allataala to kota Yerusalem,
Napapole poleꞌi lako kampongna to to-Israel to dipaliꞌ.
3 Napamatanai penawanna to tomasse,
butung dijampi to kojongna.
4 Puang Allataala mpattantui to budanna bintuin jao langiꞌ, Nasangaii.
5 Liwaꞌ makuasa na mawatang to Puang Allataala tasompa,
na teꞌda anggena to kamaccan-Na.
6 Ia ntulung todipandasa,
apa mpakasiriꞌ togajaꞌ.
7 Pakkelongan-Ni kelong pangpujian to Puang Allataala,
pannonianni cuꞌbekan Puang Allataala to tasompa.
8 Ia mpatitaleh saleuꞌ jao langiꞌ,
Namparatu uran naputuoi reu jao buntu.
9 Ia mbenni to la naputuona patuoan
sola anak kaok to mangkaok-kaok.
10 Tangngia nyarang mawatang to Nakabudai Puang Allataala,
tangngia too tobarani.
11 Iara Nakabudai to tongkalajaꞌ-ngkasiriꞌ-I,
to tattaꞌ rrannuan kamamasean-Na.
12 Ee to-Yerusalem, pakalaꞌbih-Hi Puang Allataala!
Ee to-Sion, pakalaꞌbih-Hi Puang Allataala to misompa,
13 sabaꞌ Puang Allataala to mpemawatangngi babangan kotami,
Nabarakkaꞌii to tontorroii.
14 Ia njagai kampongmi mitattaꞌ manyaman,
Napebarahhi kamuꞌ gandum kaminang melo.
15 Napangparentanni to kadanna tama lino
nataꞌpa jaji.
16 Ia mparatui to salju mabusa susi kapah,
Napatisambohhi susi bungin.
17 Ia mparatu bua uran,
to tangdisara ngkakaꞌi sabaꞌ macaringking.
18 Naparentai namewwai joo bua uran,
Napairiꞌii angin, nalolong joo wai.
19 Mangkada-I lako batiꞌna Yakub,
Napangpeissenanni to sininna atoran-Na lako to-Israel.
20 Teꞌda Napugaukki susi joo lako bangsa laen,
na teꞌda naissenni bangsa laen to atoran-Na.
Halleluya!