Kelong pangpujian
145
Kelongna Raja Daud.Oo Puang Allataala to kusompa! Rajakuꞌ to kupakalaꞌbih,
la makkelongnaꞌ mpakalaꞌbih-Kiꞌ teꞌda anggena.
2 Allo-allonaꞌ la mangsukkuruꞌ lako Kitaꞌ,
kutattaꞌ mpakalaꞌbih-Kiꞌ teꞌda anggena.
3 Malaꞌbih naliwaꞌ makuasa to Puang Allataala,
tangdideteꞌ mpikkiriꞌi to kamakuasan-Na.
4 Nasiturunanni tau la mpuji panggaukan-Taꞌ
napakarebai to kamakuasan-Taꞌ.
5 La napau to kamalaꞌbiran-Taꞌ sola kamakuasan-Taꞌ,
na sininna to mejangngaran Tapugauk la kupikkiriꞌ mandalan.
6 La napangpeissenan tau sininna to mejangngaran Tapugauk,
kucuritai to kamakuasan-Taꞌ.
7 Tuli la napenningaranni tau to kameloan Tapugauk
napukelongngi kumua teꞌda Tamangpasilaenan.
8 Mamase na mangpakamojaꞌ to Puang Allataala,
liwaꞌ sabbaraꞌ na teꞌda Napaja mangpakamojaꞌ.
9 Melo penawan-Na lako sininna tau,
na Nakamasei to sininna Napaden.
10 Oo Puang Allataala, sininna to Tapaden la mpuji-Kiꞌ,
sininna ummaꞌ-Taꞌ la mangsukkuruꞌ lako Kitaꞌ.
11 La napangpeissenan kumua raja to makuasa-Kiꞌ,
nacuritai to kamawatangan-Taꞌ,
12 dikua naissenni tolino to sininna panggaukan-Taꞌ to liwaꞌ mejangngaran,
sola karajaan-Taꞌ to malaꞌbih na maroah.
13 Ia to karajaan-Taꞌ tattaꞌ den,
na kaparentan-Taꞌ teꞌda anggena.
Sininna janjin-Na Puang Allataala Napugauk ngasan,
na ia to Napugauk nanii mpapajanni kumua liwaꞌi mangpakamojaꞌ.
14 Puang Allataala ntulung sininna tomasussa,
Napamasumangaꞌi to tokaꞌtu rannu.
15 Sininna to makkenyawa rrannuan-Kiꞌ,
Tatuli mbenni kande ke wattunnami.
16 Tapagannaꞌi to sininna naparallui,
na teꞌda nakakurangan.
17 Maruruh to Napugauk Puang Allataala,
napajan jio sininna to Napugauk kumua, liwaꞌ-I mangpakamojaꞌ.
18 Puang Allataala tattaꞌ sadia ntulung to tosumarro lako kale-Na,
to lantuk tongan penawanna metaꞌda pangtulung-Na.
19 Nabenni to nakadoangngi to tongkalajaꞌ-ngkasiriꞌ-I,
Napesaꞌdingngi to sarrona, Napasalamaꞌi.
20 Nalendungngi to tongkamaliꞌ-I,
apa Nalanynyaꞌi to togajaꞌ.
21 La tattaꞌnaꞌ mpuji Puang Allataala,
melo ke sininna to makkenyawa
mpakalaꞌbih Puang Allataala teꞌda anggena.