Kelong sukkuruꞌna raja
144
Kelongna Raja Daud.Dipakalaꞌbih to Puang Allataala
to butung buntu batu kunii mentilendung,
sabaꞌ Naajahhinaꞌ parari
Napatujunaꞌ nnewa ewakuꞌ.
2 Iamo Tomangpasalamaꞌkuꞌ,
Tollendungnginaꞌ,
butung benteng mawatang,
butung buntu batu.
Iamo susi perisai kunii mentilendung,
Napupentaloi lako akuꞌ to sininna bangsa, kukuasaii.
3 Oo Puang Allataala, indara tee tolino an-Taingaranni?
Indari ia an-Tajampangngi?
4 Ia to katuoanna tolino cinggaꞌtuꞌra nataꞌde
susi penawa dipessuean,
baꞌtu susiri bajo-bajo mentaꞌde.
5 Oo Puang Allataala, timbakanni to langiꞌ-Taꞌ, Tamellao,
tumbui to buntu namerambu.
6 Pacumbiaꞌi to palepaꞌ-Taꞌ nasisarambuan to ewa,
pempatteranni to pana-Taꞌ napalai sisarak-sarak.
7 Pengkoronganni to lima kamakuasan-Taꞌ jao mai suruga,
Talaꞌparannaꞌ jio mai abalaꞌ to butung wai buda la ssolangnginaꞌ.
Pasalamaꞌnaꞌ jio mai kuasanna bangsa laen,
8 to nakabudai mangnguraga
sola saꞌbi tangtongan.
9 Oo Puang Allataala, la kupakkelongan-Kiꞌ kelong baru mpakalaꞌbih-Kiꞌ,
kupannoni gambus sangpulo ritinna.
10 Kitaꞌ mpupatalo rajana to-Israel,
Tapasalamaꞌ Raja Daud kaunan-Taꞌ.
11 Laꞌparannaꞌ jio mai to la mpaꞌdangnginaꞌ,
pasalamaꞌnaꞌ jio mai kuasanna bangsa laen,
to nakabudai mangnguraga
sola saꞌbi tangtongan.
12 Dennaa upaꞌ na ia to anakkataꞌ muane sipamula malolleꞌna
susii tananan loboh namawatang.
Dennaa upaꞌ na ia to anakkataꞌ baine simaloꞌlok
susi ariri dipaꞌ mballo-balloi istana.
13 Dennaa upaꞌ na ia to sininna paꞌpaktaꞌ ponno
mangrupa-rupa asseleꞌ padang.
Dennaa upaꞌ na ia to dombataꞌ jio padang pangrewan makeanakan,
arannai mangpulo-pulo saꞌbu budanna.
14 Dennaa upaꞌ na ia to sapintaꞌ sabuda-budanna
na teꞌda mate nakanna saki palelean nateꞌda jaji sala.
Dennaa upaꞌ na teꞌda sarro disaꞌding
lako lalan llan kotataꞌ.
15 Masannang to bangsa susi joo,
masannang to bangsa mpupuang Puang Allataala.