Passambajang metaꞌda tulung
143
Kelongna Raja Daud.Oo Puang Allataala, metaꞌdanaꞌ Tapesaꞌdingngii passambajangkuꞌ,
parinawai tee petaꞌda tulungkuꞌ.
Pebalii passambajangkuꞌ
sabaꞌ tattaꞌ-Kiꞌ mpugauk janjin-Taꞌ
napajan kumua teꞌda Tamangpasilaenan.
2 a Danggiꞌ Takara-karanaꞌ tee akuꞌ kaunan-Taꞌ,
sabaꞌ teꞌda tau tangkasalan jio olo-Taꞌ.
3 Naulaꞌnaꞌ, natalonaꞌ ewakuꞌ,
natarungkunaꞌ llan ngenan malillin,
na susi to kumua masainmoꞌ mate.
4 Pussakmoꞌ,
teꞌdamo kuissen apa to la kupugauk.
5 Kuingaran to wattu pura dibokoꞌ,
kupikkiriꞌi to sininna mangka Tapaden,
kunawa-nawai to sininna Tapugauk.
6 Mempalaꞌnaꞌ massambajang lako Kitaꞌ,
gaja kukamaliꞌ-Kiꞌ,
susi padang tangnatuoi tananan ngkamaliꞌ uran.
7 Oo Puang Allataala, madoiꞌ-Kiꞌ mpebalinaꞌ,
sabaꞌ pussakmoꞌ.
Danggiꞌ Tasalainaꞌ,
na danggiꞌ kususi to tojiongmo lamunan.
8 Tuli pangngingarannaꞌ ke makaleꞌi kumua, tattaꞌ-Kiꞌ mangpakamojaꞌ,
sabaꞌ Kitaꞌra kukatappaꞌi.
Tapatujunaꞌ lako lalan to sipatoꞌ la kuola
sabaꞌ Kitaꞌra kunii metaꞌda.
9 Oo Puang Allataala, laꞌparannaꞌ jio mai ewakuꞌ,
Kitaꞌra kunii mentilendung.
10 Patujunaꞌ mpugauk pakkaeloran-Taꞌ,
sabaꞌ Kitaꞌra Puang Allataala to kusompa.
Dennaa upaꞌ na kameloan penawan-Taꞌ
ssolannaꞌ lako lalan kameloan.
11 Oo Puang Allataala, pasalamaꞌmoꞌ napumalaꞌbihhi sangan-Taꞌ,
laꞌparannaꞌ jio mai kapussakan,
sabaꞌ teꞌda Tamangpasilaenan.
12 Lanynyaꞌi to ewakuꞌ, sabaꞌ tattaꞌ-Kiꞌ mpakamojaꞌnaꞌ.
Solangngi ngasanni to tompaꞌdikkinaꞌ, sabaꞌ akuꞌ tee, kaunan-Taꞌ.