Sumarro lako Puang Allataala
142
1 a Kelong pangpangngajahna Daud tonna llan loꞌkoꞌ. Passambajang.2 Mpematonggoinaꞌ gamarangkuꞌ lako Puang Allataala,
metamba metaꞌda tulung.
3 Sumarronaꞌ jio olo-Na,
kupauan ngasanni to kamasussankuꞌ.
4 Ia tongkupussakmo,
Taissen Kitaꞌ to jaji lako akuꞌ.
Ia to lalan la kuola,
iamo nanii ewakuꞌ ntananannaꞌ sura.
5 Takita jio saꞌdekuꞌ,
nang teꞌda bang tau nturunninaꞌ.
Nang teꞌda bang to tolendungnginaꞌ
baꞌtu tomparinawanaꞌ.
6 Oo Puang Allataala, kukua metamba lako Kitaꞌ,
“Kitaꞌra kunii mentilendung.
Kitaꞌra to kupumanah llan katuoankuꞌ.”
7 Pesaꞌdingngii to sarrokuꞌ,
sabaꞌ pussakmoꞌ.
Tapasalamaꞌnaꞌ jio mai sininna ewakuꞌ,
sabaꞌ tangkukulle la nnewai.
8 Laꞌparannaꞌ jio mai tee kamaparrisan to butung mpumpungnaꞌ,
kuwaꞌding mpakalaꞌbih-Kiꞌ.
Naratu to tomakassing kisirempun sola mpakalaꞌbih-Kiꞌ,
sabaꞌ mpugauk-Kiꞌ kameloan lako akuꞌ.