Passambajang metaꞌda tulung
141
Kelongna Raja Daud.Oo Puang Allataala, massambajangnaꞌ, Tatulungmoꞌ too.
Pesaꞌdingnginaꞌ ke metambanaꞌ metaꞌda tulung lako Kitaꞌ.
2 a Dennaa upaꞌ Tatarimai to passambajangkuꞌ
butung dupa passompa lako Kitaꞌ.
Dennaa upaꞌ na ia ke nnangkaꞌnaꞌ limangkuꞌ massambajang
butung passompa karoba ke karuenni.
3 Oo Puang Allataala, jagaii to timungkuꞌ,
danggiꞌ napaui to gajaꞌna.
4 Danggiꞌ elorannaꞌ macinna mpugauk kagajatan.
Danggiꞌ elorannaꞌ siamaꞌ to tompugauk kagajatan,
iarika turuꞌ kumande llan pangrameanna.
5 Ianna den mesaꞌ tomakassing mpakaingaꞌnaꞌ,
tandana gaja napakamojaꞌnaꞌ.
Ia ke lantuk tonganni penawanna mpangngajahhinaꞌ,
butung naminynyakkinaꞌ minynyak masuliꞌ.
Dennaa upaꞌ kutarima meloi.
Apa tuli massambajangnaꞌ nnewa panggaukan gajaꞌna togajaꞌ.
6 Ia ke dipencaꞌbeanmi jao mai buntu batu to tomangparentana tomangpanggaukan gajaꞌ,
maneꞌri naakui tomangpanggaukan gajaꞌ kumua tongan to sininna kadangkuꞌ.
7 Ia to bukunna titaleh jio randan lamunan
susi batu maicak tisamboh jiong litak.
8 Oo Puang Allataala to kusompa,
tattaꞌnaꞌ mangrannuan lako Kitaꞌ
danggiꞌ Taelorannaꞌ dipatei,
sabaꞌ Kitaꞌ kunii mentilendung.
9 Danggiꞌ elorannaꞌ naatta sura to natanan tomangpanggaukan gajaꞌ,
to la nanii ncilakainaꞌ.
10 Akeꞌ na ia naatta surana,
apa ia to akuꞌ, kutengkaii kusalamaꞌ.