Passambajang dilendungngi jio mai ewa
140
Dipatuju lako tomangpalunna tomakkelong. Kelongna Raja Daud.2 Oo Puang Allataala, laꞌparannaꞌ jio mai tomangpanggaukan gajaꞌ,
jagainaꞌ jio mai tomaparrang,
3 to mangngatta bang mpugauk kagajatan,
na allo-allo mpasiroso tau nasisakka.
4 a Gaja taran to lilana susi lila ulah mematean
na gaja mesolangan to kadanna susi ipoh ulah.
5 Oo Puang Allataala, lendungnginaꞌ jio mai togajaꞌ,
jagainaꞌ jio mai tomaparrang,
to mangngatta la ncilakainaꞌ.
6 Ia to tomatampo, butung nakabuatan buninaꞌ poja,
naeꞌteꞌi to ulang susi jala jio lalan,
la nanii nnattanaꞌ.
7 Oo Puang Allataala, mangkadanaꞌ kukua,
“Kitaꞌmo Puang Allataala to kusompa,
Tapesaꞌdingngimi to petaꞌdangkuꞌ.”
8 Oo Puang Allataala to kusompa,
to mawatang mpasalamaꞌnaꞌ,
mangkami-Kiꞌ njagainaꞌ llan kapararian.
9 Oo Puang Allataala, danggiꞌ eloranni jaji to apa nakadoangngi togajaꞌ,
nadanggiꞌ napumatampoi.
10 Akeꞌ na ia to tomatampo ntalimbungnaꞌ,
napolei petangdona.
11 Akeꞌ nasusi uran rambak to api mengkuaro mbolloi joo tomaparrang,
nadicaꞌbean doꞌ garuang mandalan,
nateꞌdamo nakullei messun.
12 Akeꞌ na ia to tomangpau sala nakanna abalaꞌ,
danggiꞌ eloranni to tomaparrang tuo manyaman llan lino.
13 Oo Puang Allataala, kuissen kumua Kitaꞌ mpangngewanni to todipaꞌdikki,
Tapangkadanni kara-karana to tokaasi-asi.
14 Tongan, ia to tomakassing la mpakalaꞌbih-Kiꞌ,
ia to tomaruruh penawanna la torro-Kiꞌ sola.