Naissen ngasan Puang Allataala to katuoanna tolino
139
Dipatuju lako tomangpalunna tomakkelong. Kelongna Raja Daud.Oo Puang Allataala, Kitaꞌ to mparessanaꞌ,
na Tatarruh to penawangkuꞌ.
2 Taissen to sininna panggaukankuꞌ,
moi umbo kunii Taissen to kupikkiriꞌ.
3 Moi kumangjama
baꞌtu kenden mpasau boꞌjoꞌkuꞌ,
Tatarruh to penawangkuꞌ,
na Taissen to sininna kupugauk.
4 Teꞌdapa namessun jio timungkuꞌ
Taissen jolomo to la kupau.
5 Talendungngi mengguririknaꞌ,
Taonganninaꞌ kamakuasan-Taꞌ.
6 Tangkukulle mpahangngi to kapaissenan-Taꞌ,
tangnadeteꞌ pangpikkirisankuꞌ.
7 Nang teꞌda kulaꞌpah jio mai kuasan-Taꞌ
na teꞌda kulangkullei mpalaian kalekuꞌ jio mai olo-Taꞌ.
8 Ia ke malenaꞌ deꞌ langiꞌ jao-Kiꞌ,
ia ke mammaꞌnaꞌ jiong lino tomate, jiong too-Kiꞌ.
9 Ia kengkulamentiaꞌ lako kadellekan,
baꞌtu torro llannaꞌ kalambunan to gaja bela,
10 jio too Tanii ntulungnaꞌ,
na lima kanan-Taꞌ ntoenaꞌ.
11 Moi kumangkada kumua, “Maꞌnamo nasamboinaꞌ kamalillinan,
na membongi to masiang ngguririkkinaꞌ,”
12 apa ia joo kamalillinan nang tattaꞌ masiang lako Kitaꞌ,
ia ke bongii, mariwang susi ke alloi,
na ia ke malillinni susi una to macora.
13 Kitaꞌ mpaden batang kalekuꞌ,
Tatampa simesaꞌ-mesaꞌi to lesoankuꞌ
tongkumaneꞌ llan ngenan taunna indokuꞌ.
14 Mangsukkuruꞌnaꞌ lako Kitaꞌ, sabaꞌ mejangngaran kuwaꞌding den!
Kukanassai tongan kumua sininna to Tapugauk mejangngaran.
15 Ia tongkumaneꞌ den llan baꞌtangna indokuꞌa,
kuloboh llan joo ngenan kabunianan,
teꞌda bukungkuꞌ kabunianan lako Kitaꞌ.
16 Takitanaꞌ tongkumaneꞌ den llan ngenan taunna indokuꞌ,
na ia to allo katuoankuꞌ Tapattantumo diukiꞌ ngasan llan boꞌ-Taꞌ,
moi nateꞌdapa kujaji.
17 Oo Puang Allataala, makeanggaꞌ
na gaja buda to pangpikkirisan-Taꞌ.
18 Ia ke la kurekenni, laꞌbi buda ia na kassiꞌ.
Ia ke pajamoꞌ mangreken,
tattaꞌ teꞌda kupahangngi to pangpikkirisan-Taꞌ.
19 Oo Puang Allataala, akeꞌ Talanynyaꞌii to togajaꞌ,
Tapamabelai jio mai akuꞌ sininna to topapatean!
20 Teꞌda buaꞌna joo togajaꞌ sipaꞌna mpau sala-Kiꞌ
sola nnewa-Kiꞌ.
21 Oo Puang Allataala, kukabaꞌci to tongkabaꞌci-Kiꞌ,
makani-kaninaꞌ lako to tonnewa-Kiꞌ.
22 Gaja kukabaꞌci to tosusi joo,
kuewai.
23 Oo Puang Allataala, paressanaꞌ Takitai to llanna penawangkuꞌ,
ujinaꞌ, Taissenni to kupikkiriꞌna.
24 Takitai ke denni panggaukan gajaꞌ kupugauk,
Tapatujunaꞌ lako lalan katuoan melo teꞌda anggena.