Kelong ssukkuruꞌi pangtulung-Na Puang Allataala
138
Kelongna Raja Daud.Oo Puang Allataala, la lantuk tongan penawangkuꞌ
mangsukkuruꞌ lako Kitaꞌ.
Kumakkelong mpakalaꞌbih-Kiꞌ
jio olona tomakuasa jao suruga.
2 Kusujuꞌ mangngolo lako Bola malaꞌbih-Taꞌ,
kupakalaꞌbih sangan-Taꞌ,
sabaꞌ tattaꞌ Tapugauk to janjin-Taꞌ,
Tatuli mamase.
Tapakalaꞌbih to sangan-Taꞌ sola janjin-Taꞌ
to njaoanni sininna apa.
3 Ia tongkumetamba metaꞌda tulung lako Kitaꞌ, Tapebalinaꞌ.
Tapamasumangaꞌnaꞌ kubarani.
4 Oo Puang Allataala, sininna raja llan lino la mangsukkuruꞌ lako Kitaꞌ,
sabaꞌ nasaꞌdingmo to janjin-Taꞌ.
5 La napukelong to sininna Tapugauk
sabaꞌ liwaꞌ-Kiꞌ malaꞌbih.
6 Malaꞌbih-Kiꞌ, apa Taparinawa to tokaasi-asi,
na moi umbo nanii to tomatampo, Tatarruh penawanna.
7 Ia tongkuperasai kamasussan,
kamakuasan-Taꞌ kutuo unapa.
Taewa to ewakuꞌ maparrang
na kuasan-Taꞌ mpasalamaꞌnaꞌ.
8 Oo Puang Allataala, nang la Tapugauk to janjin-Taꞌ lako akuꞌ,
na nang la tattaꞌ-Kiꞌ mamase teꞌda anggena,
danggiꞌ Tapaja mparakai ummaꞌ-Taꞌ to Tapaden.