Atoran-Na Puang Allataala
Kamasannanganna to tonturuꞌ atoran-Na Puang Allataala
119
Masannang to totuo teꞌda caccana,natattaꞌ nturuꞌ atoran-Na Puang Allataala.
2 Masannang to tonturuꞌ pangpangngajah-Na Puang Allataala,
na lantuk tongan penawanna mpangngattaii la nnissenni to Napueloh Puang Allataala.
3 Masannang to tonturuꞌ pakkaeloran-Na Puang Allataala,
na teꞌda namangpanggaukan gajaꞌ.
4 Oo Puang Allataala, mangkamokan Taben parenta-Taꞌ,
dikua kipugauk tonganni.
5 Dennaa upaꞌ kupengkullei tonganni
nturuꞌi to atoran-Taꞌ.
6 Ia ke kuparinawa tonganni to parenta-Taꞌ,
teꞌda kuladipakasiriꞌ.
7 Ia ke kupelajahhii to atoran-Taꞌ to tangmangpasilaenan,
la lantuk tongan penawangkuꞌ mangsukkuruꞌ lako Kitaꞌ.
8 La tattaꞌnaꞌ nturuꞌ atoran-Taꞌ,
danggiꞌ lalo Tasalainaꞌ.
Tattaꞌ nturuꞌ parenta-Na Puang Allataala
9 Ia ke tattaꞌi nturuꞌ kadan-Taꞌ to kallolo llan katuoanna,
battuananna njagaii kalena danggiꞌ namangpanggaukan gajaꞌ.
10 Oo Puang Allataala, lantuk tongan penawangkuꞌ mpangngattaii la nnissenni to Tapueloh.
Iamo joo danggiꞌ elorannaꞌ mpabokoꞌi penawa to parenta-Taꞌ.
11 Kupallan penawa tongan to pangpangngajah-Taꞌ,
dikua nadanggiꞌ kumadosa lako Kitaꞌ.
12 Oo Puang Allataala, kupakalaꞌbih-Kiꞌ!
Ajahhinaꞌ atoran-Taꞌ.
13 Mpematonggoinaꞌ gamarangkuꞌ
mpangpeissenan atoran-Taꞌ.
14 Masannangnaꞌ mpugaukki to pangpangngajah-Taꞌ
susi kamasannangan nnampui mangrupa-rupa kasugiran.
15 La kupikkiriꞌ mandalan to parenta-Taꞌ
kuparinawai to pakkaeloran-Taꞌ.
16 Kupumasannang to atoran-Taꞌ,
la kuingaran tarruh to kadan-Taꞌ.
Dipumaupaꞌ to mpugauk atoran-Na Puang Allataala
17 Tapugaukmi to kameloan lako tee akuꞌ kaunan-Taꞌ,
kutuo tattaꞌ nturuꞌ kadan-Taꞌ.
18 Pamapahangnaꞌ,
kuwaꞌding nnissenni to pangpangngajah mejangngaran llan atoran-Taꞌ.
19 Tomentoraturaꞌ llan tee lino,
Tapemapahangnginaꞌ parenta-Taꞌ.
20 Tuli gaja maliꞌnaꞌ,
la mpahang tonganni to atoran-Taꞌ.
21 Kitaꞌ nggarraꞌi to tomatampo,
Tatangdoii to tociaꞌ nturuꞌ parenta-Taꞌ.
22 Danggiꞌ eloran tau tangnnanggaꞌnaꞌ sola ncaccanaꞌ,
sabaꞌ nturuꞌnaꞌ pangpangngajah-Taꞌ.
23 Moi namesaꞌ penawa to tomakuasa nnewanaꞌ,
la tattaꞌnaꞌ akuꞌ tee kaunan-Taꞌ mpikkiriꞌ mandalan atoran-Taꞌ.
24 Ia to pangpangngajah-Taꞌ iamo mpakaingaꞌnaꞌ,
na mpamasannang penawangkuꞌ.
Mamaliꞌ nturuꞌ atoran-Na Puang Allataala
25 Susi to la mate mandamoꞌ sabaꞌ masussanaꞌ,
eloranpaꞌ tuo situruꞌ kadan-Taꞌ.
26 Kucuritanmi-Kiꞌ to katuoan pura kuolai, na Tapesaꞌdingngimoꞌ.
Ajahhinaꞌ atoran-Taꞌ.
27 Tatulungnaꞌ kuwaꞌding mpahangngi to parenta-Taꞌ,
kupikkiriꞌ mandalanni to panggaukan-Taꞌ to mejangngaran.
28 Maparriꞌnaꞌ mperasai kamasussan,
Tapamawatangnaꞌ situruꞌ kadan-Taꞌ.
29 Danggiꞌ elorannaꞌ mangnguraga,
ajahhinaꞌ atoran-Taꞌ situruꞌ kameloan penawan-Taꞌ.
30 Kupileimo akuꞌ to tattaꞌ nturuꞌ-Kiꞌ,
kutuli mpugaukki to atoran-Taꞌ.
31 Oo Puang Allataala, kuturuꞌmo to pangpangngajah-Taꞌ,
danggiꞌ elorannaꞌ dipakasiriꞌ.
32 Masannangnaꞌ nturuꞌ parenta-Taꞌ,
sabaꞌ Tapemapahangngi tongannaꞌ.
Sambajang metaꞌda kapaissenan
33 Oo Puang Allataala, ajahhinaꞌ battuananna to atoran-Taꞌ,
kuturuꞌi ratu lako matekuꞌ.
34 Pemapahangnginaꞌ atoran-Taꞌ kuturuꞌi,
kuwaꞌding mpugauk tonganni.
35 Dennaa upaꞌ kupentoei tonganni to parenta-Taꞌ
sabaꞌ kukabudai.
36 Tapatuju lakoi pangpangngajah-Taꞌ to penawangkuꞌ,
danggiꞌ kuangngah saro tanghallalaꞌ.
37 Danggiꞌ elorannaꞌ nnangahhi to teꞌda buaꞌna,
patujunaꞌ kutuo situruꞌ pakkaeloran-Taꞌ.
38 Tapemawatangngimi to janjin-Taꞌ lako tee kaunan-Taꞌ,
janji to dipatujui lako tongkalajaꞌ-ngkasiriꞌ-Kiꞌ.
39 Pamabelai to katangdianggasan jio mai kalekuꞌ to kukalajaꞌ,
sabaꞌ melo to atoran-Taꞌ.
40 Gaja kukamaliꞌ mpugauk parenta-Taꞌ
patujunaꞌ kutuo maruruh sabaꞌ maruruh-Kiꞌ.
Rrannuan atoran-Na Puang Allataala
41 Oo Puang Allataala, pakitannaꞌ kumua tattaꞌ-Kiꞌ mpakamojaꞌnaꞌ,
pasalamaꞌnaꞌ situruꞌ janjin-Taꞌ,
42 kuissenni mpebalii kadanna to toncaccanaꞌ,
sabaꞌ mpattuannaꞌ kadan-Taꞌ.
43 Tatulungnaꞌ kutuli mangkada tongan,
sabaꞌ rrannuannaꞌ atoran-Taꞌ.
44 La tattaꞌnaꞌ nturuꞌ atoran-Taꞌ
teꞌda anggena.
45 Teꞌda kukagiangan katuoankuꞌ,
sabaꞌ kupangngattai nturuꞌ parenta-Taꞌ.
46 La kupangpeissenan lako raja to pangpangngajah-Taꞌ,
na teꞌda kulamasiriꞌ.
47 Masannangnaꞌ mpugauk parenta-Taꞌ,
sabaꞌ kukabudai.
48 Kuanggaꞌ na kukabudai too to parenta-Taꞌ,
kupikkiriꞌ mandalanni to atoran-Taꞌ.
Mpikkiriꞌ mandalan atoran-Na Puang Allataala
49 Danggiꞌ Takalupaii to janjin-Taꞌ lako tee akuꞌ kaunan-Taꞌ,
iamo joo janjin-Taꞌ kurannuan.
50 Ia to janjin-Taꞌ kumua tattaꞌ-Kiꞌ mbennaꞌ katuoan,
iamo mpakatananaꞌ llan kamaparrisankuꞌ.
51 Ia to tomatampo liwaꞌ ncapaꞌnaꞌ,
apa teꞌda kupabokoꞌi penawa to atoran-Taꞌ.
52 Oo Puang Allataala, kuingaran to atoran-Taꞌ to denmo mellao jiona mai,
iamo mpamatananaꞌ.
53 Gaja gallinaꞌ lako togajaꞌ,
sabaꞌ napabokoꞌi penawa to atoran-Taꞌ.
54 Angge tuokuꞌ llan lino to cinggaꞌtuꞌra,
atoran-Taꞌ kupukelong mpuji-Kiꞌ.
55 Oo Puang Allataala, tuli kuingaran-Kiꞌ ke bongii,
na la tattaꞌnaꞌ mpugauk atoran-Taꞌ.
56 Maupaꞌnaꞌ,
sabaꞌ tattaꞌnaꞌ nturuꞌ parenta-Taꞌ.
Mpangngakui nturuꞌ atoran-Na Puang Allataala
57 Oo Puang Allataala, Kitaꞌ mandara to kupu-Puang,
kupangngakuimo la nturuꞌ kadan-Taꞌ.
58 Memmase tongannaꞌ lako Kitaꞌ,
Takamaseinaꞌ situruꞌ janjin-Taꞌ.
59 Kupikkiriꞌ to pessiparankuꞌ,
kupangngakuii la nturuꞌ pangpangngajah-Taꞌ.
60 Taꞌpa la kupugaukmo to parenta-Taꞌ,
teꞌda kulamangtorro-torro.
61 Napumpungnaꞌ passedena togajaꞌ,
apa tattaꞌ kuingaran to atoran-Taꞌ.
62 Miꞌcok tangnga bonginaꞌ mangsukkuruꞌ lako Kitaꞌ,
sabaꞌ maruruh to pangraꞌtah-Taꞌ.
63 Sisobaꞌnaꞌ sininna tongkalajaꞌ-ngkasiriꞌ-Kiꞌ
sola tompugauk parenta-Taꞌ.
64 Oo Puang Allataala, tattaꞌ Tapakamojaꞌ to tolino,
ajahhinaꞌ atoran-Taꞌ.
Makeanggaꞌ to atoran-Na Puang Allataala
65 Oo Puang Allataala, mangkami-Kiꞌ mpugauk kameloan lako tee akuꞌ kaunan-Taꞌ
situruꞌ kadan-Taꞌ.
66 Ajahhinaꞌ kamaccan, patujunaꞌ kapaissenan,
sabaꞌ kukatappaꞌi to parenta-Taꞌ.
67 Ia tonna teꞌdapa kudisessa, lao salanaꞌ,
apa ia too kuturuꞌ tonganmo to kadan-Taꞌ.
68 Melo penawan-Taꞌ na melo to Tapugauk,
ajahhimoꞌ atoran-Taꞌ.
69 Napau salanaꞌ tomatampo,
apa ia tee akuꞌ lantuk penawangkuꞌ nturuꞌ parenta-Taꞌ.
70 Mpamatojoi penawanna na teꞌda napahangngi to atoran-Taꞌ to tomatampo,
apa ia to akuꞌ kupumasannang to atoran-Taꞌ.
71 Kupumelo ke Tasessanaꞌ,
dikua kuwaꞌding mpelajahhi atoran-Taꞌ.
72 Laꞌbi makeanggaꞌ to atoran-Taꞌ lako akuꞌ,
na ia to massaꞌbu-saꞌbu bulawan sola peraꞌ.
Maruruh to atoran-Na Puang Allataala
73 Kitaꞌ ngkabuaꞌnaꞌ kuden,
bennaꞌ kamapahangan dikua kuwaꞌding mpelajahhi parenta-Taꞌ.
74 La masannang to tongkalajaꞌ-ngkasiriꞌ-Kiꞌ ngkitanaꞌ,
sabaꞌ mangrannuan lakonaꞌ kadan-Taꞌ.
75 Oo Puang Allataala, kuissen kumua maruruh to pangraꞌtah-Taꞌ.
Tasessanaꞌ, sabaꞌ situruꞌ janjin-Taꞌ la Tasessa to tokasalan.
76 Dennaa upaꞌ napakatananaꞌ pangpakamojaꞌ-Taꞌ,
situruꞌ janjin-Taꞌ lako tee akuꞌ kaunan-Taꞌ.
77 Dennaa upaꞌ Takamaseinaꞌ kutattaꞌ tuo,
sabaꞌ kupumasannang to atoran-Taꞌ.
78 Akeꞌ namemmasiriꞌ to tomatampo,
to mangpanggaukan gajaꞌ lako akuꞌ na teꞌda sabaꞌna,
apa ia to akuꞌ, la kupikkiriꞌ tongan to parenta-Taꞌ.
79 Dennaa upaꞌ napusobaꞌ poleꞌnaꞌ to tongkalajaꞌ-ngkasiriꞌ-Kiꞌ,
tonnissenmo pangpangngajah-Taꞌ.
80 Dennaa upaꞌ nalantuk tongan penawangkuꞌ nturuꞌ atoran-Taꞌ
na danggiꞌ kudipakasiriꞌ.
Passambajang metaꞌda dipasalamaꞌ
81 Gaja mamaliꞌnaꞌ Tapasalamaꞌ,
na kurannuan to kadan-Taꞌ.
82 Mangingngimoꞌ mangtajan dikua ken-Tapugaukmo janjin-Taꞌ,
kumangkada kukua, “Piranra Talampakatananaꞌ?”
83 Moi natinggaressumo kuliꞌkuꞌ susi sepuꞌ kuliꞌ maluse,
apa kuingaran tarruh to atoran-Taꞌ.
84 Pirapara masainna la kunii sabbaraꞌ mangtajan tee akuꞌ kaunan-Taꞌ?
Na piranra Talassessai to ewa nnulaꞌ bangnaꞌ?
85 Nagaraganmoꞌ garuang la nanii mpojanaꞌ,
totangmessipaꞌ na totangnturuꞌ atoran-Taꞌ.
86 Sininna parenta-Taꞌ dikatappaꞌi.
Tatulungmoꞌ, sabaꞌ naulaꞌnaꞌ ewakuꞌ nateꞌda sabaꞌna.
87 Ciꞌdiꞌmora nadeteꞌnaꞌ la napatei,
apa teꞌda kulampessakkanni parenta-Taꞌ.
88 Dennaa upaꞌ kutattaꞌ tuo, sabaꞌ mangpakamojaꞌ-Kiꞌ,
kutattaꞌ nturuꞌ pangpangngajah-Taꞌ.
Matappaꞌ lako atoran-Na Puang Allataala
89 Oo Puang Allataala, tattaꞌ to kadan-Taꞌ jao suruga teꞌda anggena.
90 Tattaꞌ Tapugauk to janjin-Taꞌ lako ummaꞌ-Taꞌ ratu lako batiꞌna.
Kitaꞌ mpadenni tee lino, natattaꞌ den.
91 Kitaꞌ mpangparentanni, naden to sininna apa ratu lako too allo,
naturuꞌ ngasanni to parenta-Taꞌ.
92 Ia kenna teꞌda kupumasannangngi to atoran-Taꞌ,
tantu masaimoꞌ mate napubuaꞌ kamaparrisankuꞌ.
93 La tattaꞌ kuingaran to parenta-Taꞌ,
sabaꞌ iamo Tapake mbennaꞌ katuoan.
94 Pasalamaꞌmoꞌ tee akuꞌ taun-Taꞌ,
kupengkulleii mpugauk parenta-Taꞌ.
95 Mangtajan bangmi to togajaꞌ la mpateinaꞌ,
apa ia tee akuꞌ tattaꞌnaꞌ mparinawa pangpangngajah-Taꞌ.
96 Na kuissen kumua sininna to llan lino den ngasan anggena,
apa ia to parenta-Taꞌ teꞌda anggena.
Ngkamaliꞌ atoran-Na Puang Allataala
97 Liwaꞌ kukamaliꞌ to atoran-Taꞌ,
natuli kupikkiriꞌ mandalan.
98 Laꞌbi maccanaꞌ na ewakuꞌ,
sabaꞌ tuli kuingaran to parenta-Taꞌ.
99 Laꞌbi melo pangpikkirisankuꞌ na ia to gurungkuꞌ,
sabaꞌ sininna pangpangngajah-Taꞌ tattaꞌ kupikkiriꞌ mandalan tongan.
100 Laꞌbi mapahangnaꞌ na ia to tomatua,
sabaꞌ nturuꞌnaꞌ parenta-Taꞌ.
101 Kupessalai to sininna panggaukan gajaꞌ,
dikua na kadan-Taꞌ kuturuꞌ.
102 Tattaꞌ kuturuꞌ to atoran-Taꞌ,
sabaꞌ Kitaꞌ to nnajahhinaꞌ.
103 Gaja canning to kadan-Taꞌ.
Laꞌbi macanning na canik llan angaꞌkuꞌ.
104 Parenta-Taꞌ mbennaꞌ kamapahangan,
iamo kukabaꞌcii to sininna sipaꞌ majekkong.
Atoran-Na Puang Allataala butung sulo katuoan
105 Ia to kadan-Taꞌ susi sulo ssuloi katuoankuꞌ,
susi arrang nnarrangngi lalankuꞌ.
106 Mangkamoꞌ massapah kumua,
la kupugauk tongan to atoran-Taꞌ to maruruh.
107 Oo Puang Allataala, gaja parriꞌnaꞌ,
eloranpaꞌ tuo situruꞌ kadan-Taꞌ.
108 Dennaa upaꞌ Tatarimai to passompakuꞌ mangrupa kelong pangpujian.
Dennaa upaꞌ Taajahhinaꞌ atoran-Taꞌ.
109 Moi kuoloi abalaꞌ to la kupumate,
apa tattaꞌnaꞌ nningaran atoran-Taꞌ.
110 Natanananmoꞌ poja togajaꞌ la mpasala lalannaꞌ,
apa tattaꞌnaꞌ nturuꞌ parenta-Taꞌ.
111 Kupumanah to pangpangngajah-Taꞌ teꞌda anggena,
sabaꞌ kupumasannang ngasan.
112 Kupangngattai la mpugauk tarruh atoran-Taꞌ
ratu lako cappaꞌ tuokuꞌ.
Dipumanyaman to atoran-Na Puang Allataala
113 Kukabudai to atoran-Taꞌ,
apa kukabaꞌci to tomangdua penawa.
114 Kitaꞌra mpangkadannaꞌ, Talendungnginaꞌ susi perisai,
kurannuan to kadan-Taꞌ.
115 Ee tomangpanggaukan gajaꞌ, palai kamuꞌ!
La tattaꞌnaꞌ akuꞌ mpugauk parenta-Na Puang Allataala to kusompa.
116 Pemawatangnginaꞌ susi to janjin-Taꞌ, kutattaꞌ tuo,
danggiꞌ elorannaꞌ dipakasiriꞌ, sabaꞌ mangrannuannaꞌ lako Kitaꞌ.
117 Tatulungnaꞌ kusalamaꞌ,
kutuli mparinawai to atoran-Taꞌ.
118 Teꞌda Tatarimai to tociaꞌ nturuꞌ atoran-Taꞌ,
na teꞌda buaꞌna to kamajekkonganna.
119 Takita buraukri to togajaꞌ, Tacaꞌbeanni,
iamo kukamaliꞌi to pangpangngajah-Taꞌ.
120 Mbeꞌbehnaꞌ, sabaꞌ malajaꞌnaꞌ lako Kitaꞌ,
kukalajaꞌ to pangsessa-Taꞌ.
Tattaꞌ nturuꞌ atoran-Na Puang Allataala
121 Kupugaukmo to katonganan sola maruruh mangraꞌtah,
danggiꞌ eloranni to tompandasana' ngkuasainaꞌ.
122 Mangjanjimi-Kiꞌ kumua la Tatulungnaꞌ,
danggiꞌ eloranni to tomatampo mpaꞌdikkinaꞌ.
123 Gaja boꞌjoꞌmoꞌ ntajan-Kiꞌ la mpasalamaꞌnaꞌ,
na gaja maliꞌmoꞌ joo janjin-Taꞌ to tongan.
124 Kamaseimoꞌ, sabaꞌ tattaꞌ-Kiꞌ mangpakamojaꞌ.
Taajahhinaꞌ atoran-Taꞌ.
125 Pamapahangnaꞌ tee akuꞌ kaunan-Taꞌ,
kuwaꞌding nnissenni to pangpangngajah-Taꞌ.
126 Oo Puang Allataala, nadeteꞌmi wattunna Tanii rraꞌtah kara-karana tolino,
sabaꞌ teꞌda naturuꞌi to atoran-Taꞌ.
127 Laꞌbi kukadoangngi akuꞌ to parenta-Taꞌ na ia to bulawan,
moi na bulawan massang.
128 Iamo joo kutuo maruruh situruꞌ parenta-Taꞌ,
kukabaꞌci to panggaukan majekkong.
Mpangngattai nturuꞌ atoran-Na Puang Allataala
129 Mejangngaran to pangpangngajah-Taꞌ,
iamo nalantuk penawangkuꞌ mpugaukki.
130 Mpamacora pangpikkirisan, ke dipamanassai to kadan-Taꞌ,
na mpamapahang totangmapahangpa.
131 Ngkamaliꞌnaꞌ parenta-Taꞌ,
susi ngkadoangngi kande.
132 Parinawamoꞌ Takamaseinaꞌ,
susi to Tapugauk lako tongkamaliꞌ-Kiꞌ.
133 Pemawatangnginaꞌ llan katuoankuꞌ situruꞌ kadan-Taꞌ,
danggiꞌ nakuasainaꞌ kagajatan.
134 Laꞌparannaꞌ jio mai to tompandasanaꞌ,
kuwaꞌding tattaꞌ mpugauk parenta-Taꞌ.
135 Barakkaꞌi pangpakamojaꞌ-Taꞌ tee kaunan-Taꞌ,
Taajahhinaꞌ atoran-Taꞌ.
136 Lolong wai matangkuꞌ susi wai salu,
sabaꞌ teꞌda naturuꞌi tau to atoran-Taꞌ.
Maruruh to atoran-Na Puang Allataala
137 Oo Puang Allataala, teꞌda Tamangpasilaenan
na tongan to atoran-Taꞌ.
138 Tabenmokan joo atoran to tangmangpasilaenan,
na dikatappaꞌi.
139 Makani-kaninaꞌ ngkita ewakuꞌ,
sabaꞌ teꞌdamo naparinawai to kadan-Taꞌ.
140 Gaja dikatappaꞌi to janjin-Taꞌ,
naliwaꞌ kukabudai.
141 Ia tee akuꞌ to tangdianggaꞌnaꞌ,
apa teꞌda kupasalaii penawa to parenta-Taꞌ.
142 Teꞌda anggena to kamarurusan-Taꞌ mangraꞌtah,
natattaꞌ tongan to atoran-Taꞌ.
143 Moiraka kuperasai kamasussan sola kamaparrisan,
apa parenta-Taꞌ mpamarionaꞌ.
144 Maruruh to pangpangngajah-Taꞌ teꞌda anggena,
pemapahangnginaꞌ kutattaꞌ tuo.
Massambajang metaꞌda dipasalamaꞌ
145 Oo Puang Allataala, lantuk tongan penawangkuꞌ metaꞌda tulung lako Kitaꞌ. Tapebalimoꞌ!
Madoangnaꞌ nturuꞌ atoran-Taꞌ.
146 Metaꞌda tulungnaꞌ lako Kitaꞌ, Tapasalamaꞌnaꞌ.
Madoangnaꞌ nturuꞌ pangpangngajah-Taꞌ.
147 Subu unapa kumiꞌcokmo massambajang metaꞌda tulung,
na ia to kadan-Taꞌ kurannuan.
148 Panaꞌding tangnga bonginaꞌ,
mpikkiriꞌ mandalanni to pangpangngajah-Taꞌ.
149 Oo Puang Allataala, Tapesaꞌdingnginaꞌ,
sabaꞌ tattaꞌ-Kiꞌ mangpakamojaꞌ,
parakaii katuoankuꞌ
sabaꞌ maruruh-Kiꞌ.
150 La nadeteꞌmoꞌ to tonnulaꞌnaꞌ,
to la ssolangannaꞌ,
to toteꞌda naparinawa atoran-Taꞌ.
151 Oo Puang Allataala, teꞌda Tamabela jio mai kalekuꞌ,
natongan to sininna parenta-Taꞌ.
152 Mellao jiona mai kupelajahhi to pangpangngajah-Taꞌ,
na Tapattantumo kumua teꞌda anggena.
Massambajang metaꞌda tulung
153 Taparinawami to paꞌdikkuꞌ, Tapasalamaꞌnaꞌ,
sabaꞌ tattaꞌ kuingaran to atoran-Taꞌ.
154 Pangkadanni to kara-karakuꞌ, Talaꞌbaknaꞌ,
pemeloi poleꞌi katuoankuꞌ situruꞌ janjin-Taꞌ.
155 Masussa la salamaꞌ to togajaꞌ,
sabaꞌ teꞌda naparinawai to atoran-Taꞌ.
156 Oo Puang Allataala, liwaꞌ-Kiꞌ mamase,
parakaii katuoankuꞌ sabaꞌ maruruh-Kiꞌ.
157 Buda tau nnewanaꞌ, naulaꞌ melakonaꞌ,
apa teꞌda kupasalaii penawa to pangpangngajah-Taꞌ.
158 Makani-kaninaꞌ ngkitai totangdikatappaꞌi,
sabaꞌ teꞌda naturuꞌi to kadan-Taꞌ.
159 Oo Puang Allataala, Takitai, liwaꞌ kukabudai to parenta-Taꞌ,
Taparakaii katuoankuꞌ, sabaꞌ Tapakamojaꞌnaꞌ.
160 Tongan to sininna kadan-Taꞌ,
maruruh na teꞌda anggena to atoran-Taꞌ.
Nturuꞌ atoran-Na Puang Allataala
161 Naulaꞌ melakonaꞌ tomakuasa,
moi nateꞌda sabaꞌna,
apa teꞌda kumalajaꞌ,
kadan-Taꞌra to kukalajaꞌ.
162 Kupumario to janjin-Taꞌ
susi to tonnampaꞌ buda kasugiran.
163 Gaja kukabaꞌci sola kukakoꞌdoꞌ to mangnguraga,
apa atoran-Taꞌra to kukabudai.
164 Tuli mangsukkuruꞌnaꞌ lako Kitaꞌ,
sabaꞌ maruruh to atoran-Taꞌ.
165 Liwaꞌ napumanyaman to tongkabudai atoran-Taꞌ,
butung teꞌda naputitodo llan katuoanna.
166 Oo Puang Allataala, mangtajannaꞌ la Tapasalamaꞌ,
na kupugauk to parenta-Taꞌ.
167 Kuturuꞌ to pangpangngajah-Taꞌ,
naliwaꞌ kukabudai.
168 Kuturuꞌ to parenta-Taꞌ sola pangpangngajah-Taꞌ,
sabaꞌ teꞌda nakabunianan to sininna panggaukankuꞌ lako Kitaꞌ.
Passambajang metaꞌda tulung
169 Oo Puang Allataala, dennaa upaꞌ Tapesaꞌdingngii tee passambajangkuꞌ,
pemapahangnginaꞌ situruꞌ kadan-Taꞌ.
170 Dennaa upaꞌ Tatarimai tee petaꞌdangkuꞌ.
Dennaa upaꞌ Tapasalamaꞌnaꞌ situruꞌ janjin-Taꞌ.
171 Tuli la kupakalaꞌbih-Kiꞌ,
sabaꞌ Taajahhinaꞌ atoran-Taꞌ.
172 La makkelongnaꞌ mpukelong janjin-Taꞌ,
sabaꞌ maruruh to atoran-Taꞌ.
173 Dennaa upaꞌ Tatuli ntulungnaꞌ,
sabaꞌ kupileimo akuꞌ to nturuꞌ parenta-Taꞌ.
174 Oo Puang Allataala, gaja doangnaꞌ Tapasalamaꞌ,
na kupumario to atoran-Taꞌ.
175 Dennaa upaꞌ kutattaꞌ tuo dikua kupakalaꞌbih-Kiꞌ,
dennaa upaꞌ natulungnaꞌ atoran-Taꞌ.
176 Pusanaꞌ susi domba sala lalan,
patujui tee kaunan-Taꞌ nnola lalan tongan,
sabaꞌ tattaꞌ kuparinawa to parenta-Taꞌ.