Kelong kapataloan
118
1 a Mangsukkuruꞌ kamuꞌ lako Puang Allataala, sabaꞌ melo penawan-Na,sabaꞌ tattaꞌ-I mangpakamojaꞌ teꞌda anggena.
2 Melo ke mangkadai to to-Israel kumua,
“Tattaꞌ-I mangpakamojaꞌ Puang Allataala teꞌda anggena.”
3 Melo ke mangkadai to imang batiꞌna Harun kumua,
“Tattaꞌ-I mangpakamojaꞌ Puang Allataala teꞌda anggena.”
4 Melo ke mangkadai to tongkalajaꞌ-ngkasiriꞌ Puang Allataala kumua,
“Tattaꞌ-I mangpakamojaꞌ Puang Allataala teꞌda anggena.”
5 Metaꞌda tulungnaꞌ lako Puang Allataala tongkukaꞌtu rannu
Napebalinaꞌ, Nalaꞌparannaꞌ.
6 b Teꞌda kumalajaꞌ sabaꞌ Nasolannaꞌ Puang Allataala,
teꞌdamo apa la napugauk tolino lako akuꞌ.
7 Puang Allataala jio saꞌdekuꞌ ntulungnaꞌ,
la ngkitanaꞌ ewakuꞌ ditalo.
8 Laꞌbi melo ke mentilendung lakokiꞌ Puang Allataala,
na ia to mpattuan tolino.
9 Laꞌbi melo ke mentilendung lakokiꞌ Puang Allataala,
na ia to mpattuan tolino dipekapuangngi.
10 Natalimbungnaꞌ buda bangsa,
apa kuasan-Na Puang Allataala ntulungnaꞌ, kutaloii.
11 Natalimbungnaꞌ jio mai sininna ngenan,
apa kuasan-Na Puang Allataala ntulungnaꞌ, kutaloii.
12 Nakalibuꞌbunaꞌ susi wani mangkalibuꞌbu,
apa kuasan-Na Puang Allataala ntulungnaꞌ, kutaloii.
Susii pangngalah duri,
cinggaꞌtuꞌra nacappuꞌi api.
13 Gaja parrangngi ssumbanannaꞌ kumelolin,
apa Natulungnaꞌ Puang Allataala.
14 c Napasalamaꞌnaꞌ Puang Allataala,
to kupakalaꞌbih, to mpamawatangnaꞌ.
15 Pesaꞌdingngiri topeoli mario kapataloan llan tenda tomakassing nakua,
“Puang Allataala mpugauk panggaukan liwaꞌ mawatang!
16 Kuasan-Na Puang Allataala mbenkiꞌ kapataloan!
Puang Allataala mpugauk panggaukan liwaꞌ mawatang!”
17 Teꞌda kulamate, apa tattaꞌnaꞌ tuo,
kupangpeissenanni to sininna apa Napugauk Puang Allataala.
18 Liwaꞌnaꞌ Nasessa Puang Allataala,
apa teꞌda Naelorannaꞌ mate.
19 Timbakannaꞌ salliꞌ babanganna tomakassing,
kuolai mentama la mangsukkuruꞌ lako Puang Allataala.
20 Iamo tee to babangan Bola Puang Allataala,
la naola tomakassing.
21 Mangsukkuruꞌnaꞌ lako Kitaꞌ, sabaꞌ Tatarimai to petaꞌdangkuꞌ,
Tapasalamaꞌnaꞌ.
22 d eIa to batu nacaꞌbean pande bola,
menjajimi batu kaminang parallu.
23 Iamo joo to Napugauk Puang Allataala,
to liwaꞌ mejangngaran takita.
24 Iamo tee to allo Napattantu Puang Allataala,
male kamuꞌ mai tamario mangmaroah-roah.
25 f Oo Puang Allataala, metaꞌdakan Tapasalamaꞌkan,
memmasekan Tabenkan kapataloan!
26 g Dibarakkaꞌi to toratu mpusanga sangan-Na Puang Allataala!
Metaꞌdakan midibarakkaꞌi tooh llan mai Bola Puang Allataala.
27 Puang Allataala Iamo Puang Allataala to mamase lako kitaꞌ.
Na kamamasean-Na butung allo nnarrangngikiꞌ.
Male kamuꞌ situruꞌ-turuꞌ sitangke kaju kendaun,
ngguririkki ngenan pangkaroban.i
28 Oo Puang Allataala to kusompa, la mangsukkuruꞌnaꞌ lako Kitaꞌ,
la kupakalaꞌbih-Kiꞌ.
29 Mangsukkuruꞌ kamuꞌ lako Puang Allataala,
sabaꞌ melo penawan-Na,
sabaꞌ tattaꞌ-I mangpakamojaꞌ teꞌda anggena.