Puang Allataala manda to sipatoꞌ dipakalaꞌbih
115
Oo Puang Allataala, tangngiara kamiꞌ,nang tangngiara kamiꞌ,
apa Kitaꞌra to sipatoꞌ dipakalaꞌbih,
sabaꞌ mamase-Kiꞌ Tatattaꞌ mpugauk janjin-Taꞌ.
2 Danggiꞌ Taeloranni to bangsa laen ncapaꞌkan kumua,
“Umbori to Puang Allataala nasompa to-Israel?”
3 Jao-I suruga to Puang Allataala tasompa.
Napugauk to Nakabudai.
4 a Ia to napudewata bangsa laen, bulawanra sola peraꞌ dikabuaꞌ,
na panggaraga tolinora.
5 Ketimu, apa teꞌda nasumu,
kemata, apa teꞌda napakita,
6 ketalinga, apa teꞌda napasaꞌding,
keillong, apa teꞌda namangnguduk.
7 kelima, apa teꞌda namentoe,
keaje, apa teꞌda nalumingka,
na den gora-gorana, apa teꞌda namenggamara.
8 La susi toomi joo to tongkabuaꞌi,
sola tongkatappaꞌii joo dewata.
9 Ee to-Israel, matappaꞌ lako kamuꞌ Puang Allataala!
Iara ntulung kamuꞌ, Nalendungngi too kamuꞌ.
10 Ee sininna imang batiꞌna Harun, matappaꞌ lako kamuꞌ Puang Allataala!
Iara ntulung kamuꞌ, Nalendungngi too kamuꞌ.
11 Ee sininna to tongkalajaꞌ-ngkasiriꞌ Puang Allataala, matappaꞌ lako kamuꞌ Puang Allataala!
Iara ntulung kamuꞌ, Nalendungngi too kamuꞌ.
12 Naingaranmikiꞌ Puang Allataala, la mangbarakkaꞌi-Mi,
la mbarakkaꞌi to-Israel,
la mbarakkaꞌi sininna imang batiꞌna Harun.
13 b La mbarakkaꞌi sininna tongkalajaꞌ-ngkasiriꞌ-I,
la tobiccuꞌ, la tomapangkaꞌ.
14 Dennaa upaꞌ Nabarakkaꞌi kamuꞌ Puang Allataala mimembuda,
nabuda anakkami, nabuda too batiꞌna anakkami.
15 Dennaa upaꞌ Nabarakkaꞌi kamuꞌ Puang Allataala,
to mpaden langiꞌ sola lino.
16 Ia to langiꞌ, Puang Allataala manda ngkuasaii,
apa ia tee lino Napabarakkanni lako tolino.
17 Tangngia to tomatemo la mpakalaꞌbih Puang Allataala,
tangngia to tojiongmo lamunan,
18 apa kitaꞌra to tuo unapa
la mpakalaꞌbih Puang Allataala
mangpamula too teꞌda anggena.
Halleluya!c