Mangsukkuruꞌ dipasalamaꞌ jio mai kamatean
116
Liwaꞌ kukamaliꞌ to Puang Allataala,sabaꞌ Napesaꞌdingngi to sarrokuꞌ,
Naparinawa to petaꞌdangkuꞌ.
2 Padapi kunii tuo Ia kunii metaꞌda tulung,
sabaꞌ tuli Napesaꞌdingnginaꞌ.
3 Natalimbungmoꞌ abalaꞌ kamatean,
malajaꞌnaꞌ iamo ke matenaꞌ,
masussanaꞌ na masse penawangkuꞌ.
4 Iamo joo kumetamba lako Puang Allataala kukua,
“Oo Puang Allataala, pasalamaꞌnaꞌ!”
5 Mangpakamojaꞌ to Puang Allataala na maruruh mangraꞌtah,
mamase to Puang Allataala tasompa.
6 Naparakai Puang Allataala to tobiasa.
Tangpakullemoꞌ apa Napasalamaꞌnaꞌ.
7 Mpakatananaꞌ penawangkuꞌ,
sabaꞌ mangkami Puang Allataala mpugauk kameloan lako akuꞌ.
8 Napasalamaꞌmoꞌ Puang Allataala jio mai abalaꞌ kamatean,
Napakatananaꞌ nateꞌda kukumarrak,
na teꞌda Naelorannaꞌ nakanna abalaꞌ.
9 Pangtulung-Na Puang Allataala,
kuwaꞌding tuo llan tee lino.
10 a Tattaꞌnaꞌ matappaꞌ, moi kumangkada kumua,
“Gaja parriꞌnaꞌ.”
11 Ia tongkupussakmo kumangkada kukua,
“Moi mesaꞌ tau teꞌda dikatappaꞌi.”
12 Apara la kupabalaranni to sininna kameloan
Napugauk Puang Allataala lako akuꞌ?
13 La nnangkaꞌnaꞌ isotan nanii wai anggoroꞌ,
la kupassompan lako Puang Allataala,
ssukkuruꞌi pangtulung-Na.
14 La mpalaꞌpahnaꞌ tinjaꞌkuꞌ lako Puang Allataala
jio olona ummaꞌ-Na.
15 Makeanggaꞌ jio olo-Na Puang Allataala
to sungaꞌna sininna to to-Napakamojaꞌ.
16 Oo Puang Allataala, akuꞌ tee kaunan-Taꞌ,
akuꞌ anakkana kaunan-Taꞌ baine.
Mangkami-Kiꞌ mpasalamaꞌnaꞌ jio mai kamatean.
17 La mpassompannaꞌ karoba pangsukkuruꞌ lako Kitaꞌ,
kumukkun mpakalaꞌbih-Kiꞌ.
18 La mpalaꞌpahnaꞌ tinjaꞌkuꞌ lako Puang Allataala
jio olona ummaꞌ-Na,
19 to sirempun jio tarampak Bola Puang Allataala,
llan tangnga kota Yerusalem.
Halleluya!b