Kamasannanganna to tomakassing
112
Halleluya!aMasannang to tongkalajaꞌ-ngkasiriꞌ Puang Allataala
to liwaꞌ ngkabudai parenta-Na.
2 La ngkuasaii lino to batiꞌna,
la dibarakkaꞌi to batiꞌ tomaruruh penawanna.
3 La sugih namasannang sola repokkona,
la makassing tarruh penawanna.
4 Ia to tomakassing, tomaruruh, tomamase na mangpakamojaꞌ lako padanna rupa tau,
moi nallan kamasussan den bang rannunna.
5 Maupaꞌ to tomamase to macanning ati mangpeindan,
na maruruh llan sininna to napugauk.
6 Ia to tosusi joo tattaꞌ mawatang,
nadiingaran tarruh teꞌda anggena.
7 Teꞌda namalajaꞌ ssaꞌding kareba melajatan,
teꞌda natitawa-tawa penawanna,
matappaꞌ lako manda Puang Allataala.
8 Teꞌda namalajaꞌ, namatana bang to penawanna,
sabaꞌ la nakita to kaditaloanna ewana.
9 Malaboh ntawa-tawa to napunnai,
nabenni lako tokaasi-asi.
Teꞌda anggena to kameloan penawanna,
namakuasa sola dianggaꞌ.
10 Makani-kani to togajaꞌ ngkitai,
nasunggarigiꞌ-rigiꞌ mabaꞌci.
Ia to nakadoangngi togajaꞌ teꞌda nalajaji,
mangngujuri lako kamasolangan.