Mpakalaꞌbih Puang Allataala
111
Halleluya!aLa lantuk tongan penawangkuꞌ mangsukkuruꞌ lako Puang Allataala
llan kasirempunan tomakassing,
iamo to ummaꞌ-Na Puang Allataala.
2 Liwaꞌ mejangngaran to Napugauk Puang Allataala,
sipatoꞌ napikkiriꞌ mandalan to tongkabudaii.
3 Malaꞌbih na melo to jaman-Na,
na teꞌda anggena mangraꞌtah maruruh.
4 Mamase na mangpakamojaꞌ to Puang Allataala.
Sininna to Napugauk mejangngaran,
iamo la dinii tattaꞌ nningaran-Ni.
5 Nabenni Puang Allataala to la naputuona tongkalajaꞌ-ngkasiriꞌ-I,
Natattaꞌ nningaran janjin-Na lako ummaꞌ-Na.
6 Kamawatangan-Na Puang Allataala nnalai tana manahna bangsa laen,
Natawa-tawai lako ummaꞌ-Na,
Nanii mpangpekitan kuasan-Na.
7 Maruruh na tongan to Napugauk Puang Allataala.
Teꞌda nakesulle to sininna parenta-Na,
8 na mawatang teꞌda anggena,
tattaꞌ dipugauk situruꞌ katonganan na kamarurusan.
9 Nalaꞌparanni Puang Allataala to ummaꞌ-Na,
Nampaden janji teꞌda anggena lako ummaꞌ-Na.
Malaꞌbih na gaja watang to Puang Allataala!
10 b Ia to garontoꞌna kamaccan iamo to ngkalajaꞌ-ngkasiriꞌ Puang Allataala.
Ia to tompugauk parenta-Na, mandalan pangtangngaranna.
Pakalaꞌbih-Hi Puang Allataala teꞌda anggena!