Passambajangna to todipau gajaꞌ
109
Dipatuju lako tomangpalunna tomakkelong. Kelongna Raja Daud.Oo Puang Allataala, to tattaꞌ kupakalaꞌbih,
danggiꞌ Takita-kita bangnaꞌ,
2 sabaꞌ tangrapaꞌ timunna to togajaꞌ mpau salanaꞌ.
Teꞌda natongan to kadanna joo tomajekkong.
3 Gaja baꞌcii ngkada-kadainaꞌ,
teꞌda passabaranna naewanaꞌ.
4 Ia to pangpakamojaꞌkuꞌ napabalahhi mpau gajaꞌnaꞌ,
apa tattaꞌi kupassambajangan.
5 Ia to kameloan kupugauk napabalahhi kagajatan,
na ia to pangpakamojaꞌkuꞌ napabalahhi kamabaꞌcian.
6 Pileanni tomangraꞌtah gajaꞌ, naraꞌtahhi to kara-karana ewakuꞌ,
akeꞌ nakara-karai ewana.
7 Na ia ke dikara-karai dipattantui kumua salai,
na ia ke massambajangngi napumadosa.
8 a Akeꞌ namadoiꞌ mate,
nadiben tau lekoꞌ to jamanna.
9 Akeꞌ nabiung to anakkana,
nabalu to bainena.
10 Akeꞌ nadiulaꞌi jio mai bola roꞌpokkona to anakkana,
namale melako bang, kataꞌda-taꞌda.
11 Akeꞌ naalai tompaindannii to sininna napunnai,
naalai bangngi tau to asseleꞌ toꞌdoan aꞌpuhna.
12 Danggiꞌ naden tau mbenni penawa melo,
baꞌtu ngkamasei anakkana to biungmo.
13 Akeꞌ namusa to sininna batiꞌna,
na moi sanganna teꞌdamo naissenni batiꞌ to maneꞌ la dioloi lako.
14 Akeꞌ Natattaꞌ Puang Allataala nningaranni to panggaukan gajaꞌna tojolona,
na ia to dosana indona, teꞌda nadiaddampangan,
15 Natuli nningaranni Puang Allataala to dosana,
na teꞌdamo nadiingaran tuu lako tau.
16 Teꞌda lalo mamasena joo tau,
apa male melako bang nnulaꞌ tomaparriꞌ,
tokaasi-asi na totangpakulle la napatei.
17 Nakabudai mangtangdoi,
akeꞌ napoleii petangdona.
Tangnakabudai mangbarakkaꞌi,
akeꞌ nateꞌda nadibarakkaꞌi.
18 Naanggaꞌ biasa bangmo to mangtangdoi,
butung napukuliꞌmo.
Akeꞌ napoleii petangdona susi ke nnisoꞌi wai,
baꞌtu susi minynyak siammak buku.
19 Akeꞌ na ia to petangdona butung napubaju,
baꞌtu butung tattaꞌ napessaꞌwak.
20 Oo Puang Allataala, akeꞌ Tasessa susii joo to tompasalanaꞌ,
tomale bang mpau gajaꞌnaꞌ.
21 Oo Puang Allataala to kusompa, Tatulungnaꞌ,
nadipakalaꞌbih to sangan-Taꞌ.
Pasalamaꞌnaꞌ, sabaꞌ tattaꞌ-Kiꞌ mangpakamojaꞌ
na melo penawan-Taꞌ.
22 Kaasi-asinaꞌ namaparriꞌ katuoankuꞌ,
naliwaꞌ paꞌdik penawangkuꞌ.
23 Cinggaꞌtuꞌmora kutaꞌde,
susi bajo-bajo ke la lambunmi allo,
baꞌtu susi batik dipempiꞌpikan.
24 Mbeꞌbeh ajekuꞌ tangkumande,
kugaja doko.
25 b Nacumbelleꞌinaꞌ to tongkitanaꞌ,
na nniling-iling.
26 Oo Puang Allataala to kusompa, Tatulungnaꞌ,
Tapasalamaꞌnaꞌ, sabaꞌ tattaꞌ-Kiꞌ mangpakamojaꞌ,
27 naissenni ewakuꞌ kumua,
Kitaꞌmo Puang Allataala to mpugaukki joo.
28 Moi natangdoinaꞌ ewakuꞌ
apa Tabarakkaꞌinaꞌ.
Akeꞌ namasiriꞌ to ewakuꞌ,
dennaa upaꞌ Tapamarionaꞌ tee akuꞌ kaunan-Taꞌ.
29 Akeꞌ nabutung mpubaju katangdianggasan to tompasalanaꞌ,
nabutung mpellunggu siriꞌna.
30 La mangsukkuruꞌ tongannaꞌ lako Puang Allataala.
La kupakalaꞌbih-Hi llan kasirempunan ummaꞌ-Na.
31 Nasabaꞌ Iamo mpangkadan tokaasi-asi,
Napasalamaꞌi jio mai to tolassessai.