Suraꞌ mangpellimanna:
Zabur 107–150
Pammase-Na Puang Allataala lako ummaꞌ-Na
107
1 a Mangsukkuruꞌ kamuꞌ lako Puang Allataala, sabaꞌ melo penawan-Na,sabaꞌ tattaꞌ-I mangpakamojaꞌ teꞌda anggena.
2 Tuli la mipau to kameloan penawan-Na sola pangpakamojaꞌ-Na Puang Allataala,
sabaꞌ mangkamikiꞌ Napasalamaꞌ jio mai kamaparrisan.
3 Mangkamo kamuꞌ Napasirempun jio mai kampongna tau laen,
salan mai kadellekan, llan mai kalambunan, jaja mai na lloꞌ mai.
4 Den to tomale bang llingkai padang pallawangan,
teꞌda naissenni to lalan mangnguju lako kota to nanii tau torro.
5 Sitangbarasanmi nasimawakkean,
na teꞌdamo rannunna.
6 Liwaꞌmi masussa, nasumarro lako Puang Allataala,
Nalaꞌparanni jio mai kamasussanna.
7 Nasolanni Puang Allataala nnolai lalan tongan
mangnguju lako kota to nanii tau torro.
8 Melo ke mangsukkuruꞌi lako Puang Allataala, to gaja mangpakamojaꞌ,
na gaja mejangngaran to Napugauk lako tolino,
9 sabaꞌ Puang Allataala mbenni wai nasau wakkena,
Napebarahhii kande marasa to totangbarah.
10 Den to toditarungku llan ngenan mapattang,
namapaꞌdik dipumpung rante bassi,
11 sabaꞌ ciaꞌi nturuꞌ parenta-Na Puang Allataala,
nateꞌda naanggaꞌi to pangpakaingaꞌ-Na Tonjaoanni sininna dewata.
12 Napapassannii Puang Allataala jaman mabandaꞌ namoroꞌ penawanna,
melolinni, nateꞌda tau ntulungngi.
13 Liwaꞌmi masussa, nasumarro lako Puang Allataala,
Napasalamaꞌi jio mai kamasussanna.
14 Nasolanni Puang Allataala messun llan mai ngenan mapattang,
Nakaꞌtuanni to pepumpung rante bassi.
15 Melo ke mangsukkuruꞌi lako Puang Allataala, to gaja mangpakamojaꞌ,
na gaja mejangngaran to Napugauk lako tolino,
16 sabaꞌ Nagajaꞌ-gajaꞌi Puang Allataala to salliꞌ tambaga,
Naleꞌto-leꞌtoi to peteneꞌ bassinna.
17 Den to tomembangoꞌ na memmaparriꞌ, natumang dosana,
nadisessa sabaꞌ kasalanna.
18 Tikollokmi ngkita kande,
na teꞌdamo namasain namate.
19 Liwaꞌmi masussa, nasumarro lako Puang Allataala,
Napasalamaꞌi jio mai kamasussanna.
20 Namangkada Puang Allataala, Napamalagahhi,
Napasalamaꞌi jio mai kamatean.
21 Melo ke mangsukkuruꞌi lako Puang Allataala, to gaja mangpakamojaꞌ,
na gaja mejangngaran to Napugauk lako tolino.
22 Melo ke mpassompanni karoba pangsukkuruꞌ,
melo ke marioi mpangpeissenanni to Napugauk Puang Allataala.
23 Den to tomale mangkappalaꞌ
mangdangkang nnolai tasik maluah.
24 Nakita kalena to Napugauk Puang Allataala jiong tasik
to liwaꞌ mejangngaran.
25 Mangkada-I naratu to angin baraꞌ,
mpupanglulun-lulun ombaꞌ sigaja tande.
26 Natiangkaꞌ sigaja tande to kappalaꞌ,
namaneꞌ tipessambak doꞌ garontoꞌ tasik gaja dalan.
Moroꞌmi penawanna
ngkitai joo abalaꞌ.
27 Simasakianni ulunna natijuꞌjun-juꞌjun susi tomalango
napussak.
28 Liwaꞌmi masussa, nasumarro lako Puang Allataala,
Nalaꞌparanni jio mai kamasussanna.
29 Naparentai to angin baraꞌ naradan,
napaja too to ombaꞌ.
30 Masannangmi, sabaꞌ radanmi to angin baraꞌ.
Nasolanmi Puang Allataala lako kakendenan kappalaꞌ, to napangngujui.
31 Melo ke mangsukkuruꞌi lako Puang Allataala, to gaja mangpakamojaꞌ,
na gaja mejangngaran to Napugauk lako tolino.
32 Pakalaꞌbih-Hi Puang Allataala llan tangnga-tangnga ummaꞌ-Na,
puji-I llan kasirempunan tomatua-tua.
33 Naparentai to saꞌdan namenjaji padang pallawangan,
na ia to tana mata wai Napupenjajii tana tangnatuoi tananan,
34 na ia to padang maloppo Napupenjajii padang maceꞌla,
natumang panggaukan gajaꞌna to totorro jio.
35 Apa Napupenjaji limbongngi to padang pallawangan,
Napupenjaji mata waii to padang makase,
36 Nanii Puang Allataala mpatorroi to totangbarah,
nangkabuaꞌ kota nanii torro.
37 Naambohhii banne to baraꞌbah, na ntanan anggoroꞌ,
na buda asseleꞌna.
38 Nabarakkaꞌii Puang Allataala buda batiꞌ,
na ia to patuoanna sabuda-budanna.
39 Nataloi ewana namenciꞌdiꞌmora,
nagaja paꞌdik dipandasa.
40 Napupenjajii Puang Allataala totangdianggaꞌ to tomangparentana,
Napupangngelohnai male llingkai padang tangnatuoi tananan to teꞌda lalanna.
41 Apa Nalendungngi Puang Allataala to tokaasi-asi jio mai kadipandasan,
na sabuda-budanna batiꞌna susi budanna domba.
42 Nakitai tomaruruh penawanna namario,
nadipatangsumu to tomajekkong.
43 Dennaa upaꞌ naparinawai tomacca sininna to mangka dipau,
naakuii kumua tattaꞌ-I Puang Allataala mangpakamojaꞌ.