Moi nasalamo to ummaꞌ-Na, tattaꞌi Napakamojaꞌ Puang Allataala
106
1 b Halleluya!aMangsukkuruꞌ kamuꞌ lako Puang Allataala, sabaꞌ melo penawan-Na,
sabaꞌ tattaꞌ-I mangpakamojaꞌ teꞌda anggena.
2 Teꞌda tau ngkullei ncurita kamawatangan-Na Puang Allataala,
teꞌda too tongkullei mpakalaꞌbih-Hi susi to sipatoꞌna.
3 Masannang to totattaꞌ maruruh
natuli nturuꞌ pakkaeloran-Na Puang Allataala.
4 Oo Puang Allataala, ingaranni Takamasei todanaꞌ,
ke Takamaseii to ummaꞌ-Taꞌ.
Pasalamaꞌ todanaꞌ ke Tapasalamaꞌi.
5 Dennaa upaꞌ kukitai to kamasannanganna to to-Tapilei,
kumasannang sola ummaꞌ-Taꞌ,
kuturuꞌ mario mangpuji sola taun-Taꞌ.
6 Madosamokan susi tojolokiꞌ,
salamokan, sabaꞌ mangpanggaukan gajaꞌkan nnewa-Kiꞌ.
7 c Ia tonna jiong tana Mesir to tojolokiꞌ,
teꞌda napahangngi to liwaꞌ mejangngaran Tapugauk,
teꞌda naingaranni tonna jio randan Tasik Teberau
kumua liwaꞌi Tapakamojaꞌ,
kannori nnewa-Kiꞌ,
Kitaꞌ Allataala to njaoanni sininna dewata.
8 Apa Napasalamaꞌi Puang Allataala to ummaꞌ-Na,
la Nanii mpapajan kamawatangan-Na,
dikua nadipakalaꞌbih to sangan-Na.
9 d Naparentai to Tasik Teberau na memmakase,
Nasolanni to ummaꞌ-Na llingkaii joo tasik maluah,
susi ke nnola jioi padang pallawangan.
10 Susimi joo Puang Allataala mpasalamaꞌ ummaꞌ-Na jio mai tongkabaꞌcii,
Nalaꞌparanni jio mai kuasanna tonnewai.
11 Apa Naparatu poleꞌi Puang Allataala to wai tasik, Nasitallanan to ewana,
na moi mesaꞌ teꞌda salamaꞌ.
12 e Maneꞌri nakatappaꞌi ummaꞌ-Na to kadan-Na
namakkelong mpakalaꞌbih-Hi.
13 Apa teꞌda nasangngapa natangningaran omi to mangka Napugauk Puang Allataala,
na samangpanggaukanna bang, teꞌda nametaꞌda pangpatujun-Na Puang Allataala.
14 f Madoangngi ngkande kande malundaꞌ tonna jio padang pallawangan,
nancobai Puang Allataala jio joo padang makase.
15 Nabenni Puang Allataala to kande nakadoangngi,
apa Naparatuan tooi saki mematean.
16 g Ia tonna jio padang makase mangtenda to tojolokiꞌ,
masere atii lako Nabi Musa sola lako Harun,
imang malaꞌbih-Na Puang Allataala,
17 natipangdua to padang, naammaꞌi to Datan sola Abiram,
nabumbunni litak sintong repokkona.
18 Naparatuanni Puang Allataala api to togajaꞌ laenna llan allaꞌna to-Israel,
nacappuꞌ maꞌbong.
19-20 i Jio garontoꞌ Buntu Sinaih nanii to-Israel ntampa bulawan napasusi anak sapin muane ngkande reu,
nasompai joo patung natampa.
Susimi joo nasulleii patung to kamalaꞌbiran-Na Puang Allataala.
21-22 Teꞌdamo naingaranni to Puang Allataala mpasalamaꞌi,
to mangka mpugauk panggaukan mejangngaran jiong tana Mesirj sola jio Tasik Teberau.
23 Madoang-Ngi Puang Allataala la llanynyaꞌii to ummaꞌ-Na,
apa Nabi Musa, taun-Na to Napilei, mpangkadanni.
Iamo Napaja Puang Allataala mabirih,
na teꞌda Nalanynyaꞌii to ummaꞌ-Na.
24 k Ciaꞌi ummaꞌ-Na mentama joo tana liwaꞌ ballo,
sabaꞌ teꞌda namatappaꞌ lako kadan-Na Puang Allataala.
25 Kannori sipangnuku-nukuan llan tendana lako Puang Allataala,
naciaꞌ mpesaꞌdingngi-I.
26 Iamo Namassapah Puang Allataala,
kumua la Napupangngelohnai to tojolotaꞌ mate jio padang pallawangan,
27 l na ia to batiꞌna la Napaliꞌ Puang Allataala lako bangsa laen,
na sisarak-sarak lako kampongna tau laen.
28 m Ssompai tau-tau dewata Baal Peor to tojolotaꞌ,
na ngkande kande dipassompan lako dewatan to teꞌda namakkenyawa.
29 Gaja Napumabirih Puang Allataala joo panggaukan,
Naparatuanni saki laꞌdaꞌ.
30 Apa napateii Imang Pinehas joo tokasalan,
naradan joo saki.
31 Ia joo napugauk Imang Pinehas,
diingaran tarruh ratu lako batiꞌ mangpapaꞌ-papaꞌ,
sabaꞌ dianggaꞌ panggaukan melo.
32 o Mpamabirihhi Puang Allataala to to-Israel jio toꞌ kalimbuah Meriba,
napumacilakai Nabi Musap.
33 Natakkaliwaꞌ mangkada to Nabi Musa,
sabaꞌ napamakani-kanii to-Israel.
34 q Teꞌda nalanynyaꞌii to-Israel to bangsa jio tana Kanaan,
susi to Naparentanni Puang Allataala,
35 apa kannori male siamaꞌ,
sola nturuꞌ panggaukanna bangsa tangssompa Puang Allataala.
36 Namassompa toda lako dewata to nasompa bangsa laen,
iamo mpoja to-Israel namasolang.
37 r Ia to anakkana napangkaroban
lako dewatanna to-Kanaan.
38 s Mpatibolloi rarana totangkasalan,
rarana anakkana.
Napangkarobanni lako dewatanna to-Kanaan,
iamo ncarepaii joo kampong.
39 Ncarepaii kalena napubuaꞌ joo panggaukanna,
teꞌda natattaꞌ mpugauk janjinna lako Allataala.
Susii baine kemuanemo manggauk sala sola muane laen.
40 t Nakagallii Puang Allataala to ummaꞌ-Na,
namakoꞌdoꞌ ngkita taun-Na.
41 Iamo joo Napupangngelohnai Puang Allataala to bangsa laen ngkuasaii,
Napupangngelohnai naparenta tongkabaꞌcii.
42 Napaꞌdikkii ewana,
na ntaloan bangmo kalena.
43 Tuli Napasalamaꞌi Puang Allataala,
apa laꞌbi nakabudai to akkatta gajaꞌna nnewa Puang Allataala,
namasolang natumang salana.
44 Apa Naparinawai Puang Allataala to kamasussanna,
tonna saꞌdingngi to sarrona.
45 Naingaran Puang Allataala to janjin-Na,
Nakamaseii to ummaꞌ-Na,
sabaꞌ teꞌda Napaja mpakamojaꞌi.
46 Napatibalikki Puang Allataala to penawanna to tompaliꞌi,
nabalik ngkamaseii.
47 u Oo Puang Allataala to kisompa, pasalamaꞌkan,
papolemokan jio mai sininna bangsa to dinii mpaliꞌkan,
kimangsukkuruꞌ mpakalaꞌbih sangan-Taꞌ,
kimasumangaꞌ mpakalaꞌbih-Kiꞌ.
48 Dipakalaꞌbih to Puang Allataala to nasompa to-Israel,
dipakalaꞌbih teꞌda anggena.
Melo ke pada mangkadai to ummaꞌ-Na kumua, “Amin!”
Halleluya!