Puang Allataala sola ummaꞌ-Na
(1 Tawarikh 16:8-22)
105
Mangsukkuruꞌ kamuꞌ lako Puang Allataala, pakalaꞌbih-Hi,pangpeissenanni lako bangsa laen to Napugauk.
2 Pakkelongan-Ni kelong pangpujian,
pakarebai to panggaukan-Na mejangngaran.
3 Pumario-I, sabaꞌ malaꞌbih-Hi.
Melo ke napumasannangngi to tossompa-I.
4 Patuju lakoi Puang Allataala to penawammi,
petaꞌdai Napamawatang kamuꞌ,
tattaꞌ kamuꞌ ssompa-I.
5-6 Ee kamuꞌ batiꞌna Nabi Ibrahim pangjama-Na Puang Allataala,
ingaranni to sininna mejangngaran to Napugauk.
Ee anak ampona Yakub, to Napilei kamuꞌ Puang Allataala,
danggiꞌ mikalupaii to sininna atoran-Na.
7 Puang Allataala, Iamo Puang Allataala to tasompa,
ia to atoran-Na teꞌda tau nasala.
8 Naingaran tarruh to janjin-Na,
nateꞌda anggena joo parenta-Na
ratu lako mangsaꞌbu-saꞌbu papaꞌna batiꞌ.
9 a Nabenni joo janjin-Na lako Nabi Ibrahim,
Napassapanni lako Ishak.
10 b Napakanassai lako Yakub,
menjaji janji teꞌda anggena lako to-Israel.
11 Nakua Puang Allataala, “La Kubenko tana Kanaan,
to Kupattantu mupumanah.”
12 Ia tonna maneꞌ torro mentoratu to ummaꞌ-Na Puang Allataala jio tana Kanaan,
teꞌdapa napira.
13 Namale bang mellele-lele jio mai mesaꞌ bangsa lako bangsa laenna,
baꞌtu mellele jio mai mesaꞌ karajaan lako karajaan laenna.
14 c Apa teꞌda tau Naeloran Puang Allataala mpandasa ummaꞌ-Na.
Nacaccai to sininna raja sabaꞌ ummaꞌ-Na, Nakua,
15 “Danggiꞌ miricuii to to-Kupilei,
danggiꞌ mipugauk kagajatan lako nabing-Kuꞌ!”
16 d Naparatui Puang Allataala to pebarrangan namasussa diampa' to kande llan kampong,
Nasolang-solangngi to sininna la naputuona ummaꞌ-Na.
17 e Apa Nasuai Puang Allataala sala mesaꞌna to anakkana Yakub jolo doꞌ tana Mesir,
iamo to Yusuf to dibaluk menjaji kaunan.
18 f Dipumpungngi rante bassi to ajena,
na dirantei too bassi to kollongna,
19 arannai jaji to napau Yusuf tonna tee,
Napamanassai Puang Allataala kumua tongan joo kadanna Yusuf.
20 g Napangpesuanni Raja Mesir, to ngkuasai buda bangsa,
nadilaꞌparan Yusuf llan mai pangtarungkuan.
21 h Napakuasai Raja Mesir nnurusuꞌ bola raja
sola sininna kasugiranna,
22 nadipabarakkanni too nnatoroꞌ sininna tomapangkaꞌ situruꞌ pakkaeloranna
sola nnajahhi kamaccan tomatua-tua.
23 i Susimi joo naolanan Yakub namale doꞌ tana Mesir, tanana batiꞌna Ham,
natorro jio mentoratu.
24 j Napasabuda-budannai Puang Allataala to ummaꞌ-Na,
arannai laꞌbi mawatang na to-Mesir to mpukaunanni.
25 Napatibalikki Puang Allataala to penawanna to-Mesir,
namemmabaꞌci lako ummaꞌ-Na, nakalasii tooi.
26 k Nasuai Puang Allataala to Nabi Musa pangjama-Na,
sola Harun to mangka Napilei,
27 mpugauk tanda mejangngaran jiong tana Mesir,
tanana batiꞌna Ham.
28 l Napupemmapattangngi Puang Allataala to sininna tana Mesir,
apa ciaꞌi to to-Mesir nturuꞌ kadan-Na Puang Allataala.
29 m Napupenjaji rarai to wai,
nasimatean to bale.
30 n Nasinangkangan to tokkoꞌ llan tana Mesir,
na moi llan sapaꞌna raja natamai too.
31 o Mangkada-I Puang Allataala
nasiratuan to laliꞌ ncuccuꞌ rara
sola kasisiꞌ gaja buda, nasilele llan tana Mesir.
32 p Nasulleii bua uran to uran biasa joo wattu,
nasimellepaꞌ-leparan to kilaꞌ.
33 Nasolanganni Puang Allataala to tananan anggoroꞌ,
Napasisongkanni to baranaꞌ ara sola baranaꞌ laenna llan tana Mesir.
34 q Mangkada-I Puang Allataala,
nasiratuan to batik liwaꞌ laꞌdaꞌ,
35 mpurai sininna tananan,
nateꞌda asseleꞌ padang.
36 r Napatei ngasanni Puang Allataala to anak pamungah muane to la dirannuan,
llan sininna bola to-Mesir.
37 s Namaneꞌ ssolanni Puang Allataala to to-Israel messun jio mai tana Mesir,
napada mbawa bulawan sola peraꞌ,
nagaja simawatang na simauku.
38 Ia tonna messunmo to to-Israel
simarioanmi to to-Mesir,
sabaꞌ malajaꞌi lako to-Israel.
39 t Napatiballahhi Puang Allataala to saleuꞌ nnonganni ummaꞌ-Na ke alloi,
nasuloii arrang api ke bongii.
40 u Metaꞌdai kande to to-Israel,
Naparatuanni Puang Allataala pujo
sola kande jao mai langiꞌ, napubarahhi.
41 v Napiakki to buntu batu, natituꞌpaꞌ to wai,
nalolong jio padang makase susi salu.
42 Iamo Napugaukki Puang Allataala susi joo,
sabaꞌ nningaran-Ni janji malaꞌbih-Na
lako Nabi Ibrahim, tompangjaman-Ni.
43 Nasolanni messun to ummaꞌ-Na namasannang,
namario-rio to to-Napilei.
44 w Nabenni lako ummaꞌ-Na to tanana bangsa laen,
napunnaii to sininna asseleꞌ boꞌjoꞌna joo bangsa.
45 Susimi joo Napugauk Puang Allataala,
dikua natattaꞌ to ummaꞌ-Na mpugaukki to atoran-Na,
natattaꞌ nturuꞌi to sininna parenta-Na.
Halleluya!x