Pangpujian lako to mpaden langiꞌ sola lino
104
Kupatuju lako Puang Allataala to penawangkuꞌ mpakalaꞌbih-Hi.Oo Puang Allataala to kusompa, gaja malaꞌbih-Kiꞌ!
Mpubaju-Kiꞌ kamakuasan sola kamalaꞌbiran,
2 mpusalemuꞌ-Kiꞌ arrang.
Taballahhi to langiꞌ susi tenda.
3 Tapakeꞌdehhi to bola-Taꞌ jao wai jao langiꞌ.a
Tapukareta saleuꞌ, Tasakei paniꞌ angin.
4 b Na angin Tapupenjaji to-Tasua,
na palepaꞌ Tapupenjaji tompangjaman-Kiꞌ.
5 Kitaꞌ to mangka mpakeꞌdeh lino na mawatang jao aririnna,
na teꞌda lalo natigesuꞌ jio mai ngenanna.
6 Tasamboii wai tasik gaja luah to lino,
nanjaoanni potok buntu.
7 Apa ia ton-Tagarraꞌi, taꞌpa lolongngi joo wai
nagaja dirrih male butung to tolumpisu palai, sabaꞌ ssaꞌdingngi ongngoh gamaran-Taꞌ.
8 Nalolong jao mai buntu, male doꞌ lombok,
lako ngenan to Tapattantuanni.
9 Mangkami Tapattantu to katonan, to teꞌda nawaꞌding llambannii,
na teꞌda nalimbongngi poleꞌi tee lino.
10 Kitaꞌ mpupengkalimbuahhi to mata wai jiong lombok,
nalolong llan allaꞌ buntu menjaji salu,
11 nanii mangngisoꞌ olok-olok masiaꞌ,
nanii mpasau wakkena nyarang lampung.
12 Na jio joo randan salu nanii messerang manuk-manuk,
nannoni-oni llan mai allaꞌ daun kaju.
13 Taparatu to uran jao mai bola-Taꞌ jao langiꞌ doꞌ buntu,
naponno lino to asseleꞌ jaman-Taꞌ.
14 Kitaꞌ mpatuoanni reu to olok-olok.
Tapatuoanni mangrupa-rupa tananan to tolino,
nawaꞌding mpusarai naputuoi.
15 Susinna Tapatuoanni anggoroꞌ
namembua napumasannangngi.
Tapatuoanni kaju zaitun
namangngasseleꞌ minynyak to mpamacora lindo.
Taben tooi kande napumaukui.
16 Ia to kaju jio tana Libanon to Napatuo Puang Allataala, mpeloppo uran rambak,
iamo to kaju aras,
17 to nanii messerang manuk-manuk,
na kaju sanobarc nanii membuja kajoꞌ.
18 Jao buntu simatande nanii beke lampung menduruk,
na buntu batu nanii pelanduk membuni.
19 Kitaꞌ mpaden bulan to mpattantu wattu,
nakabuh to allo ke wattunnami.
20 Ia ke Taparatumi to malillin, bongimi,
sinangkanganmi to sininna olok-olok llan pangngalah.
21 Namangngaung-ngaung to anak singa nnangahhi to la naatta,
mpetaꞌda kande to Napasadianni Puang Allataala.
22 Ianna la mariwangmo sirempunmi
napole lako loꞌkoꞌna simammatan.
23 Na ia to tolino male njama jamanna,
ratu lako la kabuh allo.
24 Oo Puang Allataala, liwaꞌ buda to Tapugauk,
naliwaꞌ to kamaccan-Taꞌ mpugaukki.
Ponno lino to Tapaden.
25 Gaja luah to tasik dikita,
nanii olok-olok tangdipura direken
la simatonggona, la sibiccuꞌna.
26 d Iamo naolai nnorong kappalaꞌ wai,
nanii ulah Lewiatane, to Tapaden, maningo-ningo.
27 Sininna to Tapaden mangrannuan lako Kitaꞌ,
la mbenni kande ke wattunnami.
28 Ia ton-Tapasadianni, Tabenni,
naalai, nakandei sabarahna.
29 Apa ia ke Tapabokoꞌii penawa, simalajatanni.
Na ia ke Takaꞌtuimi to sungaꞌna, matemi,
namellitak poleꞌ.
30 Ia ke Taburrungngii penawa to to-Tapaden,
jaji omi to batiꞌ,
naden omo barunna llan lino.
31 Dennaa upaꞌ natattaꞌ to kamalaꞌbiran-Na Puang Allataala teꞌda anggena!
Dennaa upaꞌ Napumasannangngi penawan-Na sininna to Napaden!
32 Nakitai tee lino, na nino,
Natumbui to buntu, namerambu.
33 La mpakkelongannaꞌ Puang Allataala, angge tuokuꞌ,
la mpukelongnaꞌ kelong pangpujian lako Puang Allataala, ke tuo unapaꞌ.
34 Dennaa upaꞌ Napumasannangngi to kelongkuꞌ,
marionaꞌ sabaꞌ Puang Allataala mpamarionaꞌ.
35 Akeꞌ nalanynyaꞌ to tomadosa llan mai lino,
akeꞌ nacappuꞌ simatean to togajaꞌ.
Kupatuju lako Puang Allataala to penawangkuꞌ mpakalaꞌbih-Hi.
Halleluya!f