Kamamasean-Na Puang Allataala
103
Kelongna Raja Daud.Kupatuju lako Puang Allataala to penawangkuꞌ mpakalaꞌbih-Hi.
Kupalantuk tongan penawangkuꞌ mpakalaꞌbih sanga malaꞌbih-Na.
2 Kupatuju lako Puang Allataala to penawangkuꞌ mpakalaꞌbih-Hi,
teꞌda kulangkalupaii to sininna kameloan Napugauk.
3 Naaddampangannaꞌ jio mai sininna dosakuꞌ,
Napamalagahnaꞌ jio mai sininna sakingkuꞌ.
4 Napasalamaꞌnaꞌ jio mai kamatean,
Nabarakkaꞌinaꞌ pangpakamojaꞌ sola kamamasean.
5 Nabennaꞌ kameloan to mpasau penawangkuꞌ.
Napemawatangnginaꞌ, kubutung malolleꞌ poleꞌ susi langkan.
6 Maruruh to Puang Allataala
rraꞌtah kara-karana to todipakario-rio.
7 Mangkami Napau lako Nabi Musa to sininna akkatta-Na,
Napakitanni lako to-Israel to Napugauk.
8 a Mamase na mangpakamojaꞌ,
liwaꞌ sabbaraꞌ na teꞌda Napaja mangpakamojaꞌ.
9 Teꞌda Natuli mpasalakiꞌ,
na teꞌda too Nakabirih tarruhkiꞌ.
10 Ia to Nasessankiꞌ teꞌda napada bandaꞌna dosataꞌ,
ia to Napabalarankiꞌ teꞌda napada bandaꞌna kasalantaꞌ.
11 Apa pada tandena langiꞌ jiong mai lino,
pada toomi to pangpakamojaꞌ-Na Puang Allataala lako tongkalajaꞌ-ngkasiriꞌ-I.
12 Pada belana kalambunan jio mai kadellekan,
pada toomi joo mabelana Nanii ncaꞌbeanni to sininna kasalantaꞌ.
13 Nakamasei Puang Allataala to tongkalajaꞌ-ngkasiriꞌ-I
susi ambeꞌ ngkamasei anakkana.
14 Nasabaꞌ Naissen Puang Allataala kumua tolinorikiꞌ
to Nakabuaꞌ jio mai litak.
15 Ia to katuoanna tolino susiri reu cinggaꞌtuꞌra namate,
baꞌtu susiri bunga jio padang, teꞌda namasain membunga.
16 Ianna iriꞌmi angin, taꞌpa taꞌdemi,
moi ngenanna teꞌda toomo dikita.
17 Apa teꞌda anggena to pangpakamojaꞌ-Na Puang Allataala lako tongkalajaꞌ-ngkasiriꞌ-I,
naratu lako batiꞌna tattaꞌ mperasai kameloan penawan-Na,
18 lako toteꞌda nakalupai janjin-Na Puang Allataala,
natuli mpugaukki to parenta-Na.
19 Puang Allataala mangparenta jao suruga,
na makuasa mparentai to sininna apa mangka Napaden.
20 Ee sininna malaekaꞌ pangbaranin-Na Puang Allataala,
to mpesaꞌdingngi parenta-Na napugaukki,
pakalaꞌbih-Hi Puang Allataala.
21 Ee sininna malaekaꞌ jao suruga,
to mpugauk pakkaeloran-Na,
pakalaꞌbih-Hi Puang Allataala.
22 Ee sininna to Napaden
jio sininna ngenan Nakuasai,
pakalaꞌbih-Hi Puang Allataala.
Kupatuju lako Puang Allataala to penawangkuꞌ mpakalaꞌbih-Hi.