Passambajang ke masussakiꞌ
102
Passambajangna mesaꞌ tomapaꞌdik, to tangpakullemo, nasumarro lako Puang Allataala.2 Oo Puang Allataala, metaꞌdanaꞌ Tapesaꞌdingngii passambajangkuꞌ.
Dennaa upaꞌ nadeteꞌi matiꞌ olo-Taꞌ to sarrokuꞌ metaꞌda tulung.
3 Danggiꞌ Tasalainaꞌ ke masussanaꞌ.
Patanannii talinga ke sumarronaꞌ,
Tamadoiꞌ ntulungnaꞌ.
4 Cinggaꞌtuꞌra katuoankuꞌ
susi rambu cinggaꞌtuꞌra nataꞌde,
Gaja lussu kalekuꞌ
susi to nananang api.
5 Malammamoꞌ susi reu malaju,
na tangtiammaꞌ to kande kukande.
6 Mpematonggoinaꞌ gamarangkuꞌ sumarro,
gaja dokomi kalekuꞌ butung to balulang mandamo.
7 Susimoraꞌ mundan torro jio padang pallawangan,
baꞌtu totosik torro mesa jio kota to mangka nasalai tau.
8 Tangmammaꞌnaꞌ makarorrong,
susi denah mesa-mesa jao bubungan.
9 Nacapaꞌ-capaꞌnaꞌ ewakuꞌ pamula makaleꞌ ratu lako bonginna,
napetawa-tawainaꞌ na mpake sangangkuꞌ mangtangdoia.
10 Butung aumorab kupukande,
na wai matangkuꞌ butung kupuwai diisoꞌ,
11 sabaꞌ gaja Takagallinaꞌ,
butung to Taangkaꞌnaꞌ, Tapencaꞌbeannaꞌ.
12 Cinggaꞌtuꞌmora kutaꞌde, susi bajo-bajo ke lambunni allo,
mentangpakullemoꞌ, susi reu memmalaju.
13 Apa Kitaꞌ, oo Puang Allataala, mangparenta teꞌda anggena,
na kiingaran tarruh-Kiꞌ ratu lako batiꞌkiꞌ.
14 Nang Tapakamojaꞌ to kota Sion,
na wattunnami Takamasei.
15 Nasabaꞌ nakamaliꞌ sininna ummaꞌ-Taꞌ,
moi naroꞌpokmo.
Massei penawanna ngkitai,
sabaꞌ maicakmi.
16 Sininna bangsa la ngkalajaꞌ-ngkasiriꞌ Puang Allataala,
na sininna raja la ntaratteꞌ panggaukan malaꞌbih-Na,
17 ke Napakeꞌdeh poleꞌmi Puang Allataala to kota Sion,
mpangpekitan kamalaꞌbiran-Na.
18 Napesaꞌdingngimi to passambajangna tomakaasi-asi,
Naanggaꞌi to petaꞌdanna ummaꞌ-Na.
19 Ukiranni lako batiꞌ maneꞌ la jaji
to sininna Napugauk Puang Allataala,
dikua na ia to bangsa maneꞌ la den ke anuꞌ,
la mpakalaꞌbih Puang Allataala.
20 Nasabaꞌ jao mai ngenan-Na to matande malaꞌbih Nanii Puang Allataala ngkita lino.
Jao mai suruga Nanii mpematai tolino,
21 Nanii mpesaꞌdingngi sarrona toditarungku,
Nalaꞌparanni to toladipateimo,
22 dikua nadipakareba to sangan-Na jao Sion
Nadipakalaꞌbih jao kota Yerusalemc,
23 ke sirempunmi to sininna bangsa sola tau jio mai sininna karajaan
la massompa lako Puang Allataala.
24 Naalaii Puang Allataala kamaukuankuꞌ tongkumalolleꞌpa,
na teꞌda kulamalambeh sungaꞌ.
25 Kumangkada kukua, “Oo Puang Allataala to kusompa,
totuo-Kiꞌ teꞌda anggena,
danggiꞌ Taalai sungaꞌkuꞌ, namaneꞌ matangnga taunnaꞌ.”
26 d Kitaꞌ mpadenni tee lino tonna anuꞌ,
moi langiꞌ panggaragan-Taꞌ too.
27 Ia to Tapaden la lanynyaꞌ ngasan,
apa ia to Kitaꞌ, den tarruh-Kiꞌ.
Ia to Tapaden la memmaluse susi pakean,
butung baju pesullean Tacaꞌbean na teꞌdamo dikita.
28 Apa ia to Kitaꞌ, tattaꞌ bang-Kiꞌ den,
Tatuo tarruh teꞌda anggena.
29 Ia to batiꞌkiꞌ la tattaꞌ masannang
namanyaman, sabaꞌ Tajampangngi.