Puang Allataala Raja Malaꞌbih
99
1 a Puang Allataala Iamo Rajato cumadokko jao kerub.
Iamo joo natiroge to lino
na simbeꞌberan to sininna tolino.
2 Liwaꞌ makuasa Puang Allataala mangparenta jao mai Buntu Sion,
malaꞌbih na makuasa njaoanni sininna tau llan lino.
3 Melo ke sininna tolino mpukelong kelong pangsukkuruꞌ
mpakalaꞌbih sangan-Na Puang Allataala to makuasa na dikalajaꞌ.
Malaꞌbih to Puang Allataala!
4 Kitaꞌmo Raja makuasa, to ngkabudai atoran.
Kitaꞌ mpugauk katonganan.
Kitaꞌ mpugauk atoran sola kamarurusan jio tana Israel.
5 Tapakalaꞌbih-Hi Puang Allataala to tasompa,
sujuꞌ kamuꞌ ssompa-I jio olo kadera malaꞌbih-Na.
Malaꞌbih to Puang Allataala!
6 Musa sola Harun direken too imang,
na Samuel sala mesaꞌna to massambajang lako Puang Allataala.
Massambajangngi,
Napebalii Puang Allataala.
7 b Napangkadaii Puang Allataala llan mai saleuꞌ tindak deꞌ langiꞌ,
naturuꞌi to atoran-Na sola parenta-Na.
8 Oo Puang Allataala to kisompa,
moiraka Tamangkamo ssessai to ummaꞌ-Taꞌ, sabaꞌ kasalanna,
apa mangkami Tapebalii Taaddampanganni.
9 Pakalaꞌbih-Hi Puang Allataala to tasompa,
sujuꞌ kamuꞌ ssompa-I jao buntu malaꞌbih-Na,
sabaꞌ liwaꞌ malaꞌbih to Puang Allataala to tasompa.