Sininna issinna lino mpakalaꞌbih Puang Allataala
98
Pangpujian.Mpukelong kamuꞌ kelong baru dipatujui lako Puang Allataala,
sabaꞌ ia to Napugauk liwaꞌ mejangngaran!
Patalo-I mpake kuasan-Na
na kamawatangan malaꞌbih-Na.
2 Napangpekitanmi Puang Allataala to kapataloan-Na,
Napapajanmi to kamarurusan-Na lako sininna tolino.
3 Tuli Naingaran Puang Allataala to to-Israel,
Natattaꞌ mpakamojaꞌi, Napugaukki to janjin-Na lako joo ummaꞌ-Na.
Nakita ngasanmo sininna tolino to kapataloan
Nabenkiꞌ Puang Allataala to tasompa.
4 Ee sininna tolino, mangmario-rio kamuꞌ lako Puang Allataala.
Pakalaꞌbih-Hi, pakkelongan-Ni, misiarrakan mario!
5 Pakkelongan-Ni Puang Allataala kelong pangpujian,
dipannonian cuꞌbekan.
6 Pannonianni mangrupa-rupa tarompeꞌa,
misiarrakan mario jio olo-Na Puang Allataala, Rajataꞌ.
7 Ee tasik sola sininna issinna, marioko nnongngoh!
Ee lino sola sininna to torro llan, siarrakan kamuꞌ!
8 Melo ke sininna salu mangmario-rio butung tomassalaꞌpa-laꞌpa
na sininna buntu mario-rio butung tosiarrakan.
9 jio olo-Na Puang Allataala.
Nasabaꞌ ratu-I la rraꞌtah kara-karana tolino,
Maruruh-Hi mangraꞌtah lako sininna bangsa,
natattaꞌ tangmangpasilaenan.