Puang Allataala to makuasa na malaꞌbih
97
Puang Allataala, Iamo Raja! Mangmasannang-sannang kamuꞌ to sininna issinna lino!Mangmario-rio kamuꞌ to totorro jio pulau.
2 a Nabombonni-I saleuꞌ sola kamalillinan,
kamarurusan na atoran iamo garontoꞌ kaparentan-Na.
3 Mangngulalaꞌ to api jio olo-Na,
ncappuꞌi ewa to ntalimbungngi.
4 Palepaꞌ-Na nnarrangngi lino,
natiroge to lino ngkitai joo kamakuasan-Na Puang Allataala.
5 Ia to buntu susi golla maccoloꞌ lolong
jio olo-Na Puang Allataala to ngkuasai lino.
6 Langiꞌ mpakarebai to kamarurusan-Na,
nakitai sininna tolino to kamalaꞌbiran-Na.
7 La dipakasiriꞌ sininna to tossompa tau-tau dewata
na dipakasiriꞌ too to tompumatampo dewata teꞌda buaꞌna.
Sininna dewata la sujuꞌ ssompa Puang Allataala.
8 Napumasannang to torro jao Sion sola jio kota laenna tana Yehuda
tonna saꞌdingngi to pangsessa Naraꞌtah Puang Allataala.
9 Oo Puang Allataala, Kitaꞌ-kitaꞌ to ngkuasai lino,
malaꞌbih-Kiꞌ njaoanni sininna dewata.
10 Ee kamuꞌ tongkamaliꞌ Puang Allataala,
kabaꞌcii to panggaukan gajaꞌ!
Nasabaꞌ Puang Allataala njagai ummaꞌ-Na,
na Ia too llaꞌparanni jio mai kuasanna togajaꞌ.
11 Mangngarrangmi to arrang-Na Puang Allataala lako tomakassing,
namasannang to tomaruruh penawanna.
12 Ee sininna tomakassing, mangmario-rio kamuꞌ,
sabaꞌ sininna to Napugauk Puang Allataala lako kamuꞌ.
Mangsukkuruꞌ kamuꞌ lako Puang Allataala to malaꞌbih.