Kamakuasan-Na Puang Allataala dipangpeissenan
(1 Tawarikh 16:23-33)
96
Mpukelong kamuꞌ kelong baru lako Puang Allataala!Ee sininna issinna lino, pakkelonganni to Puang Allataala!
2 Makkelong kamuꞌ mpakkelongan Puang Allataala, mipujii sangan-Na.
Pakarebai allo-allo kumua, Napasalamaꞌmikiꞌ.
3 Pangpeissenanni lako sininna bangsa to kamalaꞌbiran-Na,
curitai lako sininna tolino to mejangngaran Napugauk.
4 Nasabaꞌ liwaꞌ mawatang na malaꞌbih to Puang Allataala,
sipatoꞌ-I dikalajaꞌ na ia to sininna dewata,
5 sabaꞌ ia to dewatanna bangsa laen, teꞌda buaꞌna, tau-taura,
apa Puang Allataala Ia mpaden langiꞌ.
6 Malaꞌbih na makuasa to Puang Allataala,
kamawatangan na kamaballoan mponnoi Bola-Na.
7 a Ee sininna tolino, pakalaꞌbih-Hi Puang Allataala,
pakalaꞌbih-Hi to kamalaꞌbiran-Na sola kamawatangan-Na!
8 Pakalaꞌbih-Hi to sangan-Na Puang Allataala,
bawai to passompami mimentama tarampak Bola-Na.
9 Ee sininna tolino, sujuꞌ kamuꞌ ssompa Puang Allataala, mpake pakean maballo.
Malajaꞌ masiriꞌ kamuꞌ jio olo-Na!
10 Paui lako sininna tolino kumua,
“Puang Allataala Iamo Raja!
Tongan Napakeꞌdeh tee lino na mawatang tangtigesuꞌ.
Namaruruh rraꞌtah kara-karana sininna tolino.”
11 Ee langiꞌ sola lino, mangmario-rio kamuꞌ!
Ee tasik, nnongngohko mangmasannang-sannang sola issimmu!
12 Ee padang sola sininna to tuo jio padang,
mangmario-rio kamuꞌ!
Na sininna garontoꞌ kaju llan pangngalah,
mangmaroah-roah kamuꞌ
13 jio olo-Na Puang Allataala,
sabaꞌ ratu-I la rraꞌtah kara-karana tolino.
Maruruh-Hi mangraꞌtah lako sininna bangsa
natattaꞌ tangmangpasilaenan.