Puang Allataala rraꞌtah kara-karana tolino
94
Oo Puang Allataala to mangpabalahhi,pangpekitanmi to pangpabalah-Taꞌ.
2 Oo Tomangraꞌtah kara-kara tolino,
Tapabalahhimi to panggaukan gajaꞌna tomatampo.
3 Oo Puang Allataala, pirapara masainna Tapupangngelohna mangmasannang-sannang to togajaꞌ?
4 Kada gajaꞌ manda messun jio timunna,
napumatampo to panggaukan gajaꞌna.
5 Oo Puang Allataala, gaja napaꞌdikki to ummaꞌ-Taꞌ,
liwaꞌ napandasa to to-Tapilei.
6 Nagereꞌi to tomatemo muanena sola tomentoratu llan kampong,
moi pea biung napatei too.
7 Namangkada kumua, “Teꞌda Nakitai Puang Allataala tee tapugauk,
teꞌda Naparinawai Puang Allataala to nasompa Yakub.”
8 Ee kamuꞌ tobattuk llan tee kampong, parinawa meloi,
melajah kamuꞌ mangpikkiriꞌ melo!
9 Puang Allataala ngkabuaꞌi to talinga,
umbo nakua Natanglassaꞌdingngi to apa tapau?
Ia ngkabuaꞌi to mata,
umbo nakua Natanglangkitai to apa tapugauk?
10 Ia mangpangngajah lako sininna bangsa,
umbo nakua Natanglassessai to tosala?
Ia nnajahhi sininna tau,
umbo nakua Natanglannampui kapaissenan?
11 a Puang Allataala ntarruh penawanna sininna tolino,
Naissen kumua teꞌda buaꞌna to akkattana tolino.
12 Oo Puang Allataala, masannang to to-Tapangngajahhi,
to Taajahhi sininna atoran-Taꞌ.
13 Matana bang ke ratui to wattu kamaparrisan
ratu lako disessana to togajaꞌ to dicaꞌbean doꞌ garuang.
14 Nang teꞌda Nalassalaii Puang Allataala to ummaꞌ-Na,
teꞌda Nalampabokoꞌi penawa to taun-Na.
15 Ia joo wattu maruruhmi to tau mangraꞌtah,
naturuꞌi sininna tomacanning ati.
16 Indara la mpangngewannaꞌ lako tomangpanggaukan gajaꞌ?
Indara la mpangkadannaꞌ nnewai to tosigajaꞌ panggaukanna?
17 Ia kenna la tangngia Puang Allataala ntulungnaꞌ
garapamoꞌ mendoꞌ lino tomate.
18 Oo Puang Allataala, ia tongkusaꞌdingngi kumua tangpakullemoꞌ,
tattaꞌ-Kiꞌ mpakamojaꞌnaꞌ, iamo mpamawatang poleꞌnaꞌ.
19 Ia ke sabuda-budannai to sussainaꞌ,
Kitaꞌ mpakatananaꞌ namasannang penawangkuꞌ.
20 Teꞌda Talamesaꞌ penawa sola totangmaruruh mangraꞌtah kara-kara,
teꞌda Takabudai to tompake sala atoran nnakkattai kagajatan.
21 Sikangkoloꞌi mpaꞌdikki tomakassing,
napateii to totangsala.
22 Apa Puang Allataala butung buntu batu kunii mentilendung,
Puang Allataala to kusompa mpangkadannaꞌ.
23 Puang Allataala to tasompa la mpabalahhi panggaukanna togajaꞌ,
Nalanynyaꞌii, Napateii natumang dosana.