Puang Allataala Tomangraꞌtah maruruh
92
Kelong to dipukelong ke Allo Katorroana.2 Oo Puang Allataala nang melo to mangsukkuruꞌ lako Kitaꞌ,
mpukelong kelong pangpujian mpakalaꞌbih sangan-Taꞌ,
Kitaꞌ Puang Allataala to njaoanni sininna dewata.
3 La dipangpeissenan ke makaleꞌi kumua mangpakamojaꞌ-Kiꞌ,
na dipakareba ke bongii kumua tattaꞌ-Kiꞌ mpugauk janjin-Taꞌ.
4 La dipakalaꞌbih-Kiꞌ, namukkun dipannoni to gitar sangpulo ritinna sola gambus na cuꞌbekan.
5 Oo Puang Allataala gaja napumasannang penawangkuꞌ to Tapugauk,
kumakkelong gaja rio sabaꞌ ia to panggaraga liman-Taꞌ.
6 Oo Puang Allataala, liwaꞌ mejangngaran to Tapugauk,
na gaja dalan sininna akkatta-Taꞌ!
7 Ia joo Tapugauk sola akkatta-Taꞌ teꞌda nalannissenni tobangoꞌ,
na teꞌda nalampahangngi tobattuk.
8 Moi nasamelo-melona to katuoanna to togajaꞌ susi tananan samaloppo-loppona,
nasakerangngan-rangnganna kasugiranna namasannang-sannang,
apa undinna nang la cappuꞌi dilanynyaꞌi.
9 Oo Puang Allataala, Kitaꞌ-kitaꞌ to makuasa teꞌda anggena.
10 Oo Puang Allataala, kiissen kumua nang la dilanynyaꞌi to ewa-Taꞌ,
na nang la dipasisarambuan to tomangpanggaukan gajaꞌ.
11 Apa Kitaꞌ mbennaꞌ kamawatangan susi tedong lampung,
Tabarakkaꞌinaꞌ kamasannangan.
12 Kukitai ewakuꞌ ditalo,
kusaꞌdingngi to apa digaukanni to sadia la nnewanaꞌ.
13 Ia to tomakassing, susii garontoꞌ kurma buda kacocokkona,
natuo maloppo susi kaju aras jio Libanon.
14 Susii garontoꞌ kaju ditanan jio tarampak Bola Puang Allataala.
La tuo melo jio Bola Puang Allataala susi garontoꞌ kaju mengkacocok na samelo-melona.
15 Moi namatuamo tattaꞌi mawatang,
susi garontoꞌ kaju tattaꞌ macikkiꞌ, maloppo na membua,
16 iamo mpamanassai kumua makassing to Puang Allataala na teꞌda Namajekkong.
Iamo butung buntu batu kunii mentilendung.