Mentilendung lako Puang Allataala
91
Ia to tomentilendung lako Puang Allataala to njaoanni sininna dewata,to torro mentiongan lako Tomakuasa,
2 la nakua mangkada lako Puang Allataala,
“Oo Puang Allataala to kusompa, Kitaꞌ kupubenteng mawatang kunii mentilendung,
Kitaꞌ Puang Allataala to kukatappaꞌi.”
3 Nang la Nalaꞌparanko Puang Allataala jio mai poja,
Napasalamaꞌko jio mai saki mematean.
4 Nalendungngiko mumanyaman mentiongan,
susi anak manuk nasamboi paniꞌna indona.
Tattaꞌ-I mpugauk janjin-Na susi perisai lendungngiko,
na susi rompo temboꞌ mawatang munii mentilendung.
5 Danggiꞌ mukalajaꞌi to melajatan ke bongii
baꞌtu cilaka tangdikalannai ke alloi,
6 Danggiꞌ mukalajaꞌ saki palelean ke bongii,
baꞌtu saki mematean ke alloi.
7 Moi naden sangsaꞌbu tau simatean jio saꞌde kairimmu,
na sangpulo saꞌbu jio saꞌde kananmu,
apa teꞌda iko mulatiapa-apa.
8 La mupengkitai bangri,
mukitai to togajaꞌ dipabalahhi panggaukanna.
9 Puang Allataala Iamo mupupentilendung,
Puang Allataala to njaoanni sininna dewata Iamo mupupentiongan.
10 Teꞌda nalangkannako cilaka,
na teꞌda nalangkandoppiꞌi abalaꞌ to bolamu,
11 asabaꞌ la Nasuai to malaekaꞌ-Na
njagaiko umbo-umbo munii male.
12 b La naangkaꞌko limanna malaekaꞌ,
dikua danggiꞌ mutitodo lako batu.
13 c La mutengkai bang to ulah sola singa,
na singa malolleꞌ sola ulah keipoh la mulese-lese.
14 Nakua Puang Allataala, “La Kupasalamaꞌ to tongkamaliꞌ-Naꞌ,
la Kulendungngi to tonnakui-Naꞌ kumua Akuꞌ Puang Allataala.
15 La Kupebali ke metambai lako Akuꞌ,
la Kutulung ke masussai,
Kulaꞌparanni Kuanggaꞌi.
16 Kupamalambeh sungaꞌi nasau penawanna,
na la Kupakitanni kumua Akuꞌ mpasalamaꞌi.”