Suraꞌ mangpenappaꞌ:
Zabur 90–106
Puang Allataala pentilendunganna tolino
90
Passambajangna Musa, pangjama-Na Puang Allataala.Oo Puang Allataala, mellao jiona mai ratu lako batiꞌkiꞌ,
Kitaꞌmo kinii mentilendung.
2 Teꞌdapa Tapadenni to buntu
na lino sola issinna,
Kitaꞌmo Puang Allataala, to nang denmo tempon jiona mai,
teꞌda pamulanna na teꞌda anggena.
3 Ia ke nadeteꞌmi wattunna Tapupenjaji litak poleꞌ to tolino,
Tamangkada kumua, “Ee tolino, menjaji litak poleꞌko.”
4 a Ia to wattu sangsaꞌbu taunna pada to sangallora lako Kitaꞌ.
Ia joo wattu sangsaꞌbu taunna,
cinggaꞌtuꞌra labaꞌ susi to maneꞌ ssangboꞌra,
butung padari wattu mangronda tangnga bongi.
5 Kitaꞌ to taꞌpa ngkaꞌtu sungaꞌkiꞌ, susirakan tindo to taꞌpa tangdiingaran.
susirakan reu to cinggaꞌtuꞌra tuona,
6 ia ke makaleꞌi tuoi naloboh,
apa ianna karuenmo malajumi na makase.
7 Napasabakankan kamabirisan-Taꞌ
kicappuꞌ nasolangan kamagallian-Taꞌ.
8 Takita ngasan to kasalankiꞌ,
teꞌda kabunian lako Kitaꞌ to dosakiꞌ.
9 Ratu lako matekiꞌ kamabirisan-Taꞌ manda kiperasai,
ia to sungaꞌkiꞌ susi mandari penawa dipessuean.
10 Ia to wattu kinii tuo pitungpulora taunna,
ia ke mawatang unapakan, waꞌding nadeteꞌ karuapulona taunna.
Apa kamasussan mandamora sola kamaparrisan to la kiperasai,
mangkai joo too, lanynyaꞌmokan.
11 Indara mpahangngi to kamabirisan-Taꞌ?
Na kamagallian-Taꞌ namalajaꞌ to tau lako Kitaꞌ.
12 Ajahhikan rreken-reken sangngapapa la kinii tuo,
dikua kiwaꞌding macca mpugauk melona llan katuoankiꞌ.
13 Oo Puang Allataala, pirapara masainna la Tanii mabirih?
Takamaseimi tee kamiꞌ kaunan-Taꞌ.
14 Pasaui penawangkiꞌ mperasai pangpakamojaꞌ-Taꞌ ke makaleꞌ oi,
kiwaꞌding allo-allo makkelong mangsukkuruꞌ angge tuokiꞌ.
15 Benkan wattu kamasannangan
sipadan to wattu kinii mperasai kamaparrisan,
sipadan taun-taun to nanii ngkannakan abalaꞌ.
16 Akeꞌ Tapakitankan tee kamiꞌ kaunan-Taꞌ to Tapugauk,
akeꞌ Tapakitanni batiꞌkiꞌ to kuasa kamalaꞌbiran-Taꞌ.
17 Oo Puang Allataala to kisompa, dennaa upaꞌ Tabarakkaꞌikan,
nakeasseleꞌ melo to sininna kipugauk.