Tattaꞌ Napugauk Puang Allataala to janjin-Na
89
1 a Kelong pangpangngajahna Etan, to-Ezrahi.2 Oo Puang Allataala, teꞌda anggena la kupukelong
kumua tattaꞌ-Kiꞌ mangpakamojaꞌ,
kupangpeissenanni lako sininna batiꞌ
kumua tattaꞌ-Kiꞌ mpugauk janjin-Taꞌ.
3 Nasabaꞌ kuissen kumua tattaꞌ-Kiꞌ mangpakamojaꞌ teꞌda anggena,
na tattaꞌ-Kiꞌ mpugauk janjin-Taꞌ.
Ia joo Tapugauk mawatang susi langiꞌ tangtiroge.
4 Tamangkada kumua, “Mangkamoꞌ mpaden janji lako Daud to Kupilei,
tompangjaman-Naꞌ Kumassapah,
5 b kumua, ‘La den tarruh simesaꞌ jio mai batiꞌmu la mangparenta,
na la Kupemawatangngi tarruh to kaparentanna teꞌda anggena.’ ”
6 Oo Puang Allataala, mangsukkuruꞌi lako Kitaꞌ to torro jao suruga,
sabaꞌ liwaꞌ mejangngaran to Tapugauk,
napukelong sininna malaekaꞌ-Taꞌ to kamamasean-Taꞌ,
sabaꞌ tattaꞌ-Kiꞌ mpugauk janjin-Taꞌ.
7 Oo Puang Allataala, teꞌda to jao langiꞌ la mpadan-Kiꞌ,
teꞌda too to tontorroi suruga la ssusian-Kiꞌ.
8 Laꞌbi dianggaꞌ-Kiꞌ na ia to ntorroi suruga.
Laꞌbi ditaratteꞌ-Kiꞌ na ia to sininna malaekaꞌ-Taꞌ jio mengguririkki-Taꞌ.
9 Oo Puang Allataala to makuasa, teꞌda mpadanni to kamakuasan-Taꞌ.
Oo Puang Allataala, mawatang-Kiꞌ, na tattaꞌ-Kiꞌ mpugauk janjin-Taꞌ llan sininna passalan.
10 Kitaꞌ mparentai narapaꞌ to tasik makkasolang,
Tasuai naradan to ombaꞌ liwaꞌ tonggo.
11 Taicak-icakki to ulu nagac tasik to disanga Rahab, namate,
na kamawatangan kuasan-Taꞌ Tataloi to sininna ewa-Taꞌ.
12 Kitaꞌ mpunnai lino sola langiꞌ.
Kitaꞌ mpaden lino sola sininna issinna,
13 mangpamula jaja mai ratu sauꞌ.
Na ia to Buntu Tabor sola Buntu Hermon butung tomangmaroah-roah mpakalaꞌbih-Kiꞌ.
14 Liwaꞌ-Kiꞌ makuasa
sola gaja mawatang.
15 Kamarurusan mangraꞌtah sola atoran,
iamo garontoꞌna kaparentan-Taꞌ.
Mamase-Kiꞌ sola tattaꞌ-Kiꞌ mpugauk janjin-Taꞌ,
napajan llan sininna to Tapugauk.
16 Oo Puang Allataala, maupaꞌ to tomario ssompa-Kiꞌ,
natuo jio olo-Taꞌ mperasai kamamasean-Taꞌ.
17 Allo-alloi mario namasumangaꞌ,
sabaꞌ kamarurusan-Taꞌ mangraꞌtah.
18 Taben kamalaꞌbiran sola kamawatangan to ummaꞌ-Taꞌ,
na kameloan penawan-Taꞌ napatalo.
19 Oo Puang Allataala, ia to tomangparenta Tapilei iamo llendungngikan.
Ia to rajakiꞌ taun-Na Tomalaꞌbih, Puang Allataala to nasompa to-Israel.
Janjin-Na Puang Allataala lako Raja Daud
20 Den tonna tee llan pengkitanna nabi to tattaꞌ nturuꞌ pakkaeloran-Taꞌ,
Tamangkada kumua,
“Mangka-Moꞌ ntulung mesaꞌ tobarani,
to Kupilei jio mai to-Israel, Kuangkaꞌi menjaji raja.
21 d Kupilei to Daud pangjama-Kuꞌ,
Kuminynyakkii minynyak malaꞌbih-Kuꞌ to ulunna,
mpaassahhi kumua menjaji rajami.
22 Kamawatangan-Kuꞌ tuli la llendungngii,
kuasang-Kuꞌ la mpawatangngi.
23 Teꞌda nalantaloi ewana,
na teꞌda too nalassessai tomajekkong.
24 Kulanynyaꞌi to sininna ewana,
Kupatei to tongkabaꞌcii.
25 La Kupakamojaꞌ, Kutattaꞌ mpugaukki to janjing-Kuꞌ lako Raja Daud,
na la Kupasamawatang-watangnai mangparenta.
26 La Kupemaluahhi to karajaanna,
pamula jio mai Tasik Tangnga ratu lako Saꞌdan Efrat.
27 Namangkada lako Akuꞌ nakua, ‘Kitaꞌmo Ambeꞌkuꞌ, Puang Allataala to kusompa.
Kitaꞌmo butung buntu batu pentilendungankuꞌ to mpasalamaꞌnaꞌ.’
28 f La Kuala anak pamungahhi,e
na menjaji raja kaminang malaꞌbih jio mai sininna raja llan lino.
29 Kupakamojaꞌ tarruhhi teꞌda anggena,
Kupemawatangngii to janjing-Kuꞌ lako kalena.
30 La Kupaden tarruh batiꞌna menjaji raja teꞌda anggena,
na ia to kaparentanna pada masainna den langiꞌ.
31 Apa ia ke ciaꞌi to batiꞌna nturuꞌi to atoran-Kuꞌ,
na teꞌda napugaukki to parenta-Kuꞌ,
32 napabokoꞌii penawa to pura Kupattantumo,
na teꞌda naparinawai to sininna parenta-Kuꞌ
33 la Kusessai, Kurambii, sabaꞌ tangmangpesaꞌdingngi,
Kupakannaii abalaꞌ, sabaꞌ dosana.
34 Apa la tattaꞌ Kupakamojaꞌ to Raja Daud,
teꞌda Kulampesakkannii to janjing-Kuꞌ lako kalena.
35 La tattaꞌ Kupugauk to janjing-Kuꞌ,
nang la jaji to mangka messun jio timung-Kuꞌ.
36 Pissen-Raꞌ massapah mpau sanga malaꞌbih-Kuꞌ,
kumua teꞌda Kulannuraga Raja Daud.
37 La Kupaden tarruh batiꞌna menjaji raja,
na ia to kaparentanna pada masainna den mataallo,
38 pada masainna den bulan,
to tattaꞌ menjaji saꞌbi jao mai langiꞌ.”
Bating kaditaloanna raja
39 Apa ia too, Takabirihhi to raja,
Tacaꞌbeanmi, Tapabokoꞌimi penawa to tomangka Tapilei.
40 Teꞌdamo Taingaranni to janjin-Taꞌ lako kaunan-Taꞌ,
Tacaꞌbeanmi doꞌ lombu to songkoꞌ karajaanna.
41 Taroꞌpokanni to temboꞌ kotana,
Tarondonanni to bentengna.
42 Sininna to toliu lalan nnalai bang to napunnai
napetawa-tawaii bali kampongna.
43 Tabenni kapataloan to ewana,
napumarioi.
44 Moi baliliꞌna raja Tapupenteꞌdai buaꞌna,
teꞌda Tatulungngi nateꞌdamo nakullei mangngewa.
45 Taanggeimi joo kakuasan raja to malaꞌbih,
Tapessambakanni to kadera malaꞌbihna doꞌ litak.
46 Tapacinggaꞌtuꞌri to wattu kamalolleranna,
Tapakasiriꞌi.
Passambajang metaꞌda dilaꞌparan
47 Oo Puang Allataala, pirapara masainna Tanii ssalainaꞌ?
Pirapara masainna la kunii mperasai kamalussuan penawan-Taꞌ?
48 Ingaranni kumua cinggaꞌtuꞌra to katuoankuꞌ.
Kitaꞌ mpadenni to tolino apa teꞌda namasain namate.
49 Teꞌda tau nasala kamatean,
nang la mentama ngasan lino tomate.
50 Oo Puang Allataala, ciapari na teꞌdamo Tapakamojaꞌkan susi tonna tee
susi to mangka Tajanji lako Raja Daud,
ton-Tamassapah kumua
la tattaꞌ Tapugauk to janjin-Taꞌ.
51 Oo Puang Allataala, parinawai to pangcaccana tau lako tee akuꞌ kaunan-Taꞌ,
masussanaꞌ, sabaꞌ teꞌda naanggaꞌnaꞌ bangsa laen.
52 Pangcapaꞌ mandamo jio timunna ewa-Taꞌ
ia to raja Tapilei napelleꞌ ewa umbo-umbo naola.
53 Dipakalaꞌbih to Puang Allataala teꞌda anggena.
Jajimi susi joo! Amin!