Sarrona tokaꞌtu rannu
88
Kelongna batiꞌ Korah. Dipatuju lako tomangpalunna tomakkelong, nturuꞌ kelong “Mahalat Leanot”. Kelong pangpangngajahna Heman, to-Ezrahi.2 Oo Puang Allataala Tompasalamaꞌnaꞌ,
metambanaꞌ sumarro lako Kitaꞌ ke alloi,
mangngolonaꞌ metaꞌda tulung lako Kitaꞌ ke bongimi.
3 Dennaa upaꞌ Tapesaꞌdingngii tee sarrokuꞌ,
Tatarimai tee petaꞌdangkuꞌ.
4 Gaja buda kamasussan kuperasai,
susinaꞌ to la mate mandamo.
5 Teꞌda lalomo pakullekuꞌ,
disangamoꞌ to la mate.
6 Butung llanmoꞌ allaꞌ tomate,
susi to tomate dipatei, tibujuh llan liang,
susi to teꞌdamo Taingarannaꞌ,
na teꞌdamo Tatulungnaꞌ.
7 Tacaꞌbeannaꞌ doꞌ garuang gaja dalan,
tama liang mapattang.
8 Masussanaꞌ, sabaꞌ Takagallinaꞌ,
butung to napessambakan melako ombaꞌ.
9 Tapamabelami to sininna sobaꞌkuꞌ jio mai kalekuꞌ,
Tapupemmabaꞌcii lako akuꞌ.
Nakapuꞌmoꞌ kamasussan na tangkukullemi laꞌpah.
10 Makaluꞌdungmi matangkuꞌ kumarrak,
sabaꞌ masussanaꞌ.
Oo Puang Allataala, siupuh allonaꞌ sumarro,
mempalaꞌ metaꞌda doang lako Kitaꞌ.
11 La nakitaparaka to tomatemo to tanda mejangngaran Tapugauk?
Teꞌdamo nalamiꞌcok mangsukkuruꞌ lako Kitaꞌ.
12 La dipangpeissenanparaka jiong lamunan to kamamasean-Taꞌ?
Teꞌdamo naladipangpekareban jiong lino tomate kumua tattaꞌ-Kiꞌ mpugauk janjin-Taꞌ.
13 La naissenparaka to tollanmo lino tomate to apa mejangngaran Tapugauk?
Teꞌdamo naissenni to tojiongmo lamunan to kameloan penawan-Taꞌ.
14 Apa ia tee akuꞌ oo Puang Allataala, metambanaꞌ metaꞌda tulung lako Kitaꞌ,
makaleꞌ oi massambajang omoꞌ lako Kitaꞌ.
15 Oo Puang Allataala ciapari Tasalaimoꞌ,
ciapari nateꞌdamo Taingarannaꞌ?
16 Sipamula biccuꞌpaꞌ kumaparriꞌmo, nabajo-bajoi bangmoꞌ kamatean,
nagaja sussamoꞌ mperasai pangsessa-Taꞌ.
17 Napandasamoꞌ kamalussuan penawan-Taꞌ,
nasolangngimoꞌ pangsessa-Taꞌ to liwaꞌ paꞌdik.
18 Allo-allonaꞌ naguririkki kamagallian-Taꞌ,
butung natalimbungnaꞌ wai buda.
19 Tapamabelami to sininna solakuꞌ jio mai kalekuꞌ to gaja kusipakamojatan.
Mesa-mesamoraꞌ, kapussakan mandamo kupusobaꞌ.