Passambajang metaꞌda pangtulung
86
Passambajangna Raja Daud.Oo Puang Allataala, pesaꞌdingngii to passambajangkuꞌ, Tapebalinaꞌ,
sabaꞌ tomapaꞌdiknaꞌ kukaasi-asi.
2 Metaꞌdanaꞌ Taparakaii to katuoankuꞌ,
sabaꞌ to-Tapakamojaꞌnaꞌ,
pasalamaꞌnaꞌ tee akuꞌ kaunan-Taꞌ
to matappaꞌ lako Kitaꞌ.
3 Oo Puang Allataala, Takamaseimoꞌ,
sabaꞌ pamula makaleꞌ ratu lako karuen massambajang lakonaꞌ Kitaꞌ.
4 Oo Puang Allataala, Tapamarioi tee kaunan-Taꞌ,
sabaꞌ kupatuju lako mandai Kitaꞌ to penawangkuꞌ.
5 Oo Puang Allataala, melo penawan-Taꞌ, Tatuli mangngaddampangan,
na teꞌda Tapaja mpakamojaꞌi to tometaꞌda tulung lako Kitaꞌ.
6 Oo Puang Allataala, Tapesaꞌdingngii tee passambajangkuꞌ,
Taparinawai tee petaꞌdangkuꞌ.
7 Ia ke masussanaꞌ, Kitaꞌ kunii metaꞌda tulung,
sabaꞌ Tapebalinaꞌ.
8 Oo Puang Allataala, teꞌda dewata ssusian-Kiꞌ.
Teꞌda mpadanni to Tapugauk.
9 a Oo Puang Allataala, sininna bangsa to Tapaden ratu la sujuꞌ ssompa-Kiꞌ
napakalaꞌbih-Kiꞌ.
10 Nasabaꞌ to makuasa-Kiꞌ Tapugaukki sininna to mejangngaran.
Kitaꞌ mandara Puang Allataala.
11 Oo Puang Allataala, patujunaꞌ pakkaeloran-Taꞌ
kutattaꞌ nturuꞌ kadan-Taꞌ.
Ajahhinaꞌ dikua nalantuk penawangkuꞌ ngkalajaꞌ-ngkasiriꞌ-Kiꞌ.
12 Oo Puang Allataala to kusompa,
la lantuk tongan penawangkuꞌ mangsukkuruꞌ lako Kitaꞌ,
kutuli mpakalaꞌbih-Kiꞌ teꞌda anggena.
13 Nasabaꞌ tattaꞌ-Kiꞌ gaja mpakamojaꞌnaꞌ,
na mangkami-Kiꞌ mpasalamaꞌnaꞌ jiong mai lino tomate.
14 Oo Puang Allataala, ia to tomatampo namaparrang
pada mangngattami la rrarinaꞌ,
naratu mangbaloleꞌ la ngkaꞌtu sungaꞌkuꞌ,
na teꞌda lajaꞌna lako Kitaꞌ.
15 Apa Kitaꞌ, Puang Allataala mamase na mangpakamojaꞌ,
liwaꞌ-Kiꞌ sabbaraꞌ,
na teꞌda Tapaja mangpakamojaꞌ.
Tattaꞌ-Kiꞌ mpugauk janjin-Taꞌ.
16 Metaꞌdanaꞌ Taparinawanaꞌ Takamaseinaꞌ,
pamawatangnaꞌ Tapasalamaꞌnaꞌ.
Tapasalamaꞌi tee akuꞌ kaunan-Taꞌ,
anakkana kaunan-Taꞌ baine.
17 Oo Puang Allataala, pugaukmi to tanda kameloan penawan-Taꞌ lako akuꞌ
namasiriꞌ to tongkabaꞌcinaꞌ
ke nakitai kumua Tatulungnaꞌ sola Tapakatananaꞌ.